ގައުމިއްޔަތުގެ ނަމުގައި މި ސަރުކާރުން "ފިތުނައިގެ އޮށް" އިންދަމުންދާ ކަމުގައި އެމްޑީޕީގެ ރައީސް ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ ކުރިޔަށް އޮތް ރައްޔިތުންގެ މަޖިލިހުގެ ކެމްޕޭންގައި ރަށްރަށަށް ކުރައްވަމުން ގެންދަވާ ދަތުރުފުޅުގައި ހއ. ދިއްދޫއަށް ވަޑައިގެން ރޭ އެރަށުގައި ވާހަކަ ދައްކަވަމުންނެވެ.
ޝާހިދު ވިދާޅުވީ ދިވެހިންނަކީ އެއް ދީނަކަށް ތަބާވާ، އެއްނަސްލަކަށް ނިސްބަތްވާ އެއްބައެއްގެ ގޮތުގައި ތިބި ބަޔަކަށް ވިނަމަވެސް، މި ސަރުކާރުން ވިސްނާދެމުންދަނީ ތިމާމެންނާއެކީ ތިބޭ މީހުން ނޫން އެހެން އެންމެންނަކީ ދިވެހިން ނޫންކަމަށް ބުނެ ރޮނގެއް ދަމާލަމުންދާ ކަމުގައެވެ.
އަދ¥ި ޝާހިދުވަނީ ސަރުކާރުގައި ތިބި މީހުންނާއި ވެރިން މިކަހަލަ ފިތުނައިގެ ވާހަކަތައް ދައްކާއިރު ހަނު ނީންނެވުމަށް ރައީސް މުއިއްޒުއަށް ގޮވާލައްވާފައެވެ.
އެ އޮށް މިހާރު އެ އިންދަވަނީ ގައުމިއްޔަތުގެ ނަމުގައި. އަޅުގަނޑު ރައީސުލްޖުމްހޫރިއްޔާ، ޑރ. މުހައްމަދު މުއިއްޒަށް ދަންނަވަން، މަނިކުފާނުގެ ސަރުކާރުގައި ތިބި މީހުން، ވެރިން މިކަހަލަ ފިތުނައިގެ ވާހަކަތައް ދައްކާއިރު ހަނު ނީންނަވާށޭ.
ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް މުއިއްޒަކީ ގައުމުގެ ވަލިއްޔުލްއަމްރު ކަމަށާއި ގައުމު އެކަތިގަޑަކަށް ހަދާ، ގައުމު އެއްބައިވަންތަ ކުރުވުމުގެ ޒިންމާ ރައްޔިތުން ހަވާލުކޮށްފައިވަނީ އެކަނިކުފާނާ ކަމުގައެވެ. އަދި ރައްޔިތުންގެ މެދުގައި ނަފްރަތު އުފެއްދުމަށް ކުރެވޭ މަސައްކަތް ހުއްޓާލުމަށް ޝާހިދު ރައީސް މުއިއްޒުއަށް ގޮވާލެއްވިއެވެ.
