ރައްޔިތުންގެ މަޖިލީހުގެ އަދަދު ގުނުމުގައި، މަޖިލިހުގެ ހުސް ގޮނޑިތައްވެސް ގުނަންޖެހޭނެކަމަށް ސުޕްރީމް ކޯޓުން ހުކުމް ކޮށްފައިވަނިކޮށް، އެ ހުކުމް ބަލައި ނުގަނެ، ރައްޔިތުންގެ މަޖިލިހުގެ އަދަދު ގުނުމުގައި ބަލާނީ މިހާރުގެ ޖުމްލަ މެމްބަރުންނަކީ 80 ކަމުގައި ރައްޔިތުންގެ މަޖިލިހުން ނިންމައިފިއެވެ.
މިއަދު ކުރިޔަށްދިޔަ މަޖިލިސް ޖަލްސާއަށް، ސުޕްރީމް ކޯޓުގެ ހުކުމަށް އަމަލުނުކޮށް، މަޖިލީހުގެ ޖުމްލަ އަދަދަކީ 80 ކަމަށް ބަލައިގެން މަޖިލިސް ޖަލްސާތައް ކުރިއަށް ގެންދިއުމަށް ހުށަހެޅުއްވީ ވިލިނގިލީ ދާއިރާގެ އެމްޑީޕީ މެންބަރު ސައުދު ހުސައިންއެވެ. އޭނާގެ ހުށަހެޅުމަށް ތާއީދު ކުރެއްވީ ގަލޮޅު އުތުރު ދާއިރާގެ މެންބަރު އީވާ އަބްދުﷲ އެވެ.
މި ހުށަހެޅުން މަޖިލީހުން ފާސްކޮށްފައިވަނީ 25 މެންބަރުންގެ ވޯޓުންނެވެ. ނުފެންނަ ކަމަށް ވޯޓު ދެއްވީ އެންމެ ދެ މެންބަރުންނެވެ. މެމްބަރުންގެ ބޮޑު އަޢުލަބިއްޔަތަކުން މި ހުށަހެޅުން ފާސްވުމާއެކު، މަޖިލީހުގެ ރައީސް އަސްލަމް ވިދާޅުވީ، ދެން މަޖިލިސް ޖަލްސާތަކުގައި މެންބަރުންގެ އަދަދުކަމަށް ބަލާނީ 80 ކަމަށެވެ.
މިއަދުގެ ރައްޔިތުންގެ މަޖިލިހުގެ ޖަލްސާތައް ފައްޓަވަމުން މަޖިލިސް ރައީސް އަސްލަމް ވިދާޅުވީ ދެން މަޖިލިސް ކުރިޔަށް ގެންދެވޭނީ، ސުޕްރިމް ކޯޓުގެ ހުކުމަށްފަހު، މަޖިލިހުގެ ގަވާއިދުގެ 242 ވަނަ މާއްދާއާމެދު ދެން އަމަލުކުރާނެ ގޮތެއް ނިމިގެން ކަމުގައެވެ.
މިމައްސަލައާއި ގުޅޭގޮތުން ސަރުކާރަށް ތާއީދުކުރާ މެމްބަރުން ވިދާޅުވީ ސުޕްރީމް ކޯޓުން އެ ގޮތަށް ހުކުމް ކޮށްފައިވާއިރު، އަމަލު ކުރަން ޖެހޭ ގޮތް ސާފުވާތީ އިތުރަށް ގޮތް ނިންމަން ނުޖެހޭނެ ކަމަށެވެ. ސަރުކާރު ހިންގާ ޕީއެންސީއަށް ނިސްބަތްވެވަޑައިގެންނަވާ ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް ވިދާޅުވީ މި މާއްދާ ބާތިލް ކުރަން މަޖިލީހުގެ ރައީސަށް ވެސް ކޮމިޓީއަށް ފޮނުވޭނެ ކަމަށެވެ.
އެކަމާ ގުޅިގެން އަސްލަމް ވިދާޅުވީ، އެކަން ކުރެވިދާނެ ކަމަށާއި ނަމަވެސް މަޖިލީހުގެ އެއްވެސް ޖަލްސާއެއް އިތުރަށް ކުރިއަށް ގެންދެވެން އޮތީ މި މައްސަލާގައި ގޮތެއް ނިންމިގެން ކަމަށެވެ.
ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވީ، 49 ގައި ކުރިން ހިމެނުނު މާއްދާތަކަކީ ގާނޫނު އަސާސީ 278 ރޫހާ ހިލާފު މާއްދާތަކެއް ކަމަށް ނިންމާފައިވާއިރު، އޭގެ ފަހުން 242 ވަނަ މާއްދާއަށް ގެނައި އިސްލާހުގެ މަފްހޫމަކީ ވެސް އެއް ނަތީޖާއެއް ކަމަށެވެ.
މަޖިލީހުގެ 242 ގެ އެއް ވަނަ މާއްދާއަށް އަމަލުކުރެވެން ނެތް ކަމުގައި ދަންނަވަން. އެހެންނަމަވެސް ސުޕްރީމް ކޯޓުން އެ މާއްދާ އުވާލައިފައިނުވޭ. އަދި މަޖިލީހުގެ ގަވައިދުގެ އެ މާއްދާ އުވާލެވޭނީ މަޖިލީހުން.
އަސްލަމް ވިދާޅުވި އެވެ.
އަސްލަމް ވިދާޅުވީ މަޖިލިހުގެ ވޯޓު ހަމަކުރުމަށް މެމްބަރުންގެ އަދަދު ގުނާއިރު، ހުސް ގޮނޑިތައްވެސް ހިމަނަންޖެހޭނެކަމަށް ސުޕްރިމް ކޯޓުން ނިންމިއިރު، މަޖިލިހުގެ ގަވާއިދުގައި އެކަމާއި ގުޅޭގޮތުން އޮތް މާއްދާ ބާތިލް ކޮށްފައި ނުވާތީ، ސަރުކާރުގެ މަގާމުތަކަށް ދާން މެމްބަރުކަމުން އިސްތިއުފާ ދިން މެމްބަރުންގެ ގޮނޑިތައް ނުހިމަނައި ޖުމްލަ އަޣުލަބިއްޔަތު ގުނާ މައްސަލައިގައި މަޖިލިހުން ގޮތެއް ނިންމައި ދިނުމަށެވެ.
އޭނާ ހުށަހެޅުއްވީ މަޖިލިސްގެ ގަވައިދުގެ 242 ގެ 1 ވަނަ މާއްދާގެ ގޮތުގައި އިތުރުކޮށްފައިވާ މާއްދާއާއި މެދު ގޮތެއް ނިންމައި އުވާލަދިނުމުގެ މައްސަލަ އެވެ.
އަސްލަމް ވިދާޅުވީ މަޖިލީހުގެ ޖަލްސާތައް ފެށޭނީ، ކޯރަމްއަކަށް ބެލުމަށްފަހުކަމަށާއި އަހަން ޖެހޭ މުހިންމު ވޯޓުތަކަށް ދެވެން އޮތީ ވެސް އެއަށް ފަހު ކަމަށެވެ. އެހެންކަމުން ދެން ގަވައިދާ މެދު ގޮތެއް ނިންނަން ކޮމިޓީއަކަށް ފޮނުވާނީ ތޯ ނިންމައިދޭން އަސްލަމް ތަކުރާރުކޮށް ވިދާޅުވި އެވެ.
އެއީ ސުޕްރީމް ކޯޓުން މަޖިލީހުގެ އެ މާއްދާ އުނިކޮށްފައެއް ނުވޭ.. އެހެންވީމަ ދެން، މަޖިލުހުންނޭ ދެން ގޮތެއް ނިންމާނީ..
އަސްލަމް ވިދާޅުވިއެވެ.
ރައްޔިތުންގެ މަޖިލީހުން މިއަދު މަޖިލިހުގެ ގަވާއިދުގެ 242ގެ 1 ވަނަ މާއްދާ އުނި ނުކޮށް މަޖިލިސް ކުރިޔަށް ގެންދިއުމަށް ނިންމާފައިވާއިރު ސުޕްރިމް ކޯޓުން އެ މާއްދާ އުވާލާފައެއް ނުވެއެވެ.
ރައީސް އަޒުލްކުރުމަށް މެމްބަރުން އަދަދު ގުންނަޖެހޭނީ ހުސްގޮނޑި ހިމަނައިގެން ކަމުގައި ސުޕްރިމް ކޯޓުން ހުކުމް ކޮށްފައިވަނީ ފާއިތުވި ފެބްރުއަރީމަހުގެ 29 ވަނަ ދުވަހުއެވެ.
ރައީސްއާއި ނާއިބު ރައީސް އަޒުލްކުރެވޭގޮތަށް ލުއިކަން ގެނެސް، މަޖިލިހުގެ ގަވާއިދަށް ގެނެސްފައިވާ އިސްލާހުގެ މައްސަލަ ބަންޑާރަނައިބުގެ އޮފީހުން ސުޕްރިމް ކޯޓަށް ހުށަހެޅި މައްސަލާގައި ކުރި ހުކުމްގައި ސުޕްރިމް ކޯޓުން ވިދާޅުވީ ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު 80 އަށް ހަދަން މަޖިލީހުގެ ގަވާއިދުގެ 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށާއި އެހެންނަމަވެސް އެ މާއްދާ މިހާރު ބާތިލުކޮށްފައިވާތީ ކުރެވޭނެ ކަމެއް ނެތް ކަމަށެވެ.
