ޓްރޯމާ ކެއާ އެންޑް ބޭސިކް ފަސްޓް އެއިޑް ކުލާސްތަކެއް ފ. ދަރަނބޫދުއާއި ނިލަންދޫގައި ކުރިއަށް ގެންގޮސްފިއެވެ.
އެ ކުލާސްތަކުގައި، ފުރަތަމަ އެހީއަކީ ކޮބައިކަމާއި ފުރަތަމަ އެހީ މީހަކަށް ނުވަތަ ބަޔަކަށް ބޭނުންވާނެ ހާލަތައް ކިޔައިދީފައިވެއެވެ. އަދި ފުރަތަމަ އެހީ ދިނުމުގައި ހާއްސަ ސަމާލުކަމެއް ދޭންޖެހޭ ކަންތައްތަކާއި ސިއްހީ ހިދުމަތްދޭ މަރުކަޒަކަށް އެމީހާ ގެންދެވެންދެން އެހީތެރިކަން ފޯރުކޮށްދޭނެ ގޮތްތައް ކިޔައިދީފައިވެއެވެ.
އޭގެ އިތުރުން ޓްރޯމާ ކެއާއަކީ ކޮބައިކަމާއި ޓްރޯމާ ކެއާ ދޭންޖެހޭނެ ހާލަތްތައް ކިޔައިދީފައިވެއެވެ. އަދި ހާދިސާތަކުގައި އެކިކަހަލަ އަނިޔާލިބިފައިވާ މީހަކާމެދު އެންމެ ފުރަތަމަ އަމަލުކުރާނެގޮތާއި ސިއްހީ ހިދުމަތްދޭ މަރުކަޒަކަށް މީހާ ގެންދިއުމުގައި ސަމާލުކަންދޭންޖެހޭ ކަންކަން ކިޔައިދީފައިވެއެވެ.
މައުލޫމާތު ދިނުމުގެ ކުލާސްތައް ކުރިއަށް ގެންގޮސްފައިވަނީ ފުރަތަމަ އެހީ އަދި ޓްރޯމާ ކެއާ ދިނުމަށް ބައިވެރިންނަށް ދަސްކޮށްދިނުމުގެ އަމަލީ ހަރަކާތްތަކާ އެކުގައެވެ.
މި ހިނގާ މާރިޗު މަހުގެ 3 ވަނަ ދުވަހު މި ކުލާސް ދަރަނބޫދޫ ފެނަކަ މުވައްޒަފުންނަށް ކުރިއަށް ގެންގޮސްފައިވެއެވެ. އަދި ނިލަންދޫގައި ހުންނަ ފ. އަތޮޅު ތައުލީމީ މަރުކަޒުގެ ސްކައުޓް ދަރިވަރުންނާއި ކެޑޭޓު ދަރިވަރުންގެ އިތުރުން މުދައްރިސުންނަށް ވެސް ކުރިއަށް ގެންގޮސްފައިވެއެވެ. އެގޮތުން 131 މީހުންނަށް މައުލޫމާތު ދީފައިވެއެވެ.
މި ކުލާސްތައް ކުރިއަށް ގެންގޮސްފައިވަނީ ވޯކްފޯސް ހެލްތު އެންޑް ވެލްބީންގއާއި ފ. އަތޮޅު ފުލުހުން ގުޅިގެންނެވެ.
ކޮމެންޓު ފޮނުވާ