މި ސަރުކާރުން މިހާތަނަށް ގެއްލުމުގެ ބަދަލުގެ ގޮތުގައި 56 މިލިއަން ރުފިޔާ ދޫކޮށްފައިވާކަމަށް، ސަރުކާރުން އެންމެ ފަހުން އާންމު ކޮށްފައިވާ ވީކްލީ ފިސްކަލް ޑިވެކޮޕްމަންޓް ރިޕޯޓު ދައްކައިފިއެވެ. އެހެންނަމަވެސް އެފައިސާ ދޫކޮށްފައިވަނީ ކޮން ފަރާތަކަށްކަމެއް ހާމަކޮށްފައެއް ނުވެއެވެ.
ފިނޭންސް މިނިސްޓްރީން އާންމުކޮށްފައިވާ ފާއިތުވި ފެބްރުއަރީ 22 އާއިހަމައަށް ދައުލަތުގެ އާމްދަނީއާއި ޚަރަދުގެ ތަފްސީކު ދައްކުވައިދާ ސްޓެޓިސްޓިކަލް ރިޕޯޓުން ދައްކާ ގޮތުގައި އެ ދުވަހާއި ހަމައަށް ގެއްލުމުގެ ބަދަލުގެ ގޮތުގައި ޚަރަދު ކޮށްފައިވާކަމަށް ދައްކާއިރު، ފާއިތުވެދިޔަ އަހަރުގެ މި މުއްދަތުގަައި 96.6 މިލިއަން ރުފިޔާ ބަދަލުގެ ގޮތުގައި ދޫކޮށްފައި ވެއެވެ.
ފިނޭންސް މިނިސްޓްރިން ހާމަކޮށްފައިވާ ފިސްކަލް ޑިވެލޮޕްމަންޓް ރިޕޯޓުން ދައްކާ ގޮތުގައި ބަދަލު ދިނުމަށް މިއަހަރުގެ ބަޖެޓްގައި 101 މިލިއަން ރުފިޔާ ހިމަނާފައި ވެއެވެ. ފިނޭންސް މިނިސްޓްރީން ކުރިން ބުނެފައިވަނީ އެ ރުފިޔާއަކީ އާބިޓްރޭޝަނަކަށް ދައްކަން ޖެހޭ ފައިސާ ކަމުގައެވެ.
އެގޮތުން މިނިސްޓްރީން ކުރިން ހާމަކޮށްފައިވާ ގޮތުގައި ވީކްލީ ފިސްކަލް ޑިވެލޮޕްމަންޓްސް ރިޕޯޓުން މި އަހަރު ބަދަލުގެ ގޮތުގައި ދިނުމަށް ހަމަޖެހިފައިވާ ކަމަށް ފެންނަ އަދަދަކީ އިންޓަރނޭޝަނަލް އާބިޓްރޭޝަންއަކާ ގުޅިގެން އެ "ޓްރާންސެކްޝަން" ޕަބްލިކް އެކައުންޓިންގ ސިސްޓަމްއަށް ޕޯސްޓްކުރުމުން ރިޕޯޓު ކުރެވިފައިވާ އަދަދެއް ކަމުގައެވެ.
އަދި 17 ނޮވެމްބަރު 2023 ގައި، މި ސަރުކާރު ހަވާލުވިއިރު، ގެއްލުމުގެ ބަދަލުގެ ގޮތުގައި އެކި ފަރާތްތަކަށް ދައުލަތުގެ ބަޖެޓުން ޚަރަދުކުރުމަށް ނިންމާފައިވާ ނިންމުންތަކާއި ގުޅިގެން ދޫކުރުމަށް ހަމަޖެހިފައިވާ ފައިސާގެ އިތުރުން އިންޓަރނޭޝަނަލް އާބިޓްރޝަނުން ދައުލަތާ ދެކޮޅަށް ނިންމާފައިވާ މައްސަލަތަކާ ގުޅިގެން ބައެއް ފަރާތްތަކަށް ފައިސާ ދޫކުރުމަށް ނިންމާފައިވާ ކަމަށްވެސް ފިނޭންސް މިނިސްޓްރީން ކުރިން ބުނެފައި ވެއެވެ.
މި ސަރުކާރު ވެރިކަމަށް އައުމަށްފަހު، ފާއިތުވި ނޮވެމްބަރުމަހުގެ 21 ވަނަ ދުވަހު ވަނީ، ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކޮށް، ގެއްލުމުގެ ބަދަލު ދިނުމަށް އުފައްދާފައިވާ ސެޓްލްމަންޓް ކޮމެޓީ އުވާލައްވާފައެވެ.
"ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުޞޫލު" ގެ ނަމުގައި 28 ނޮވެމްބަރު 2022 ން ފެށިގެން ޢަމަލުކުރަމުން ގެންދަނީ، ޤާނޫނީ އޮނިގަނޑެއްނެތި އަދި ޤާނޫނީ ބާރެއްނެތި އެކުލަވާލާފައިވާ އުޞޫލަކަށްކަމަށް ދައުލަތުގެ ބަންޑާރަ ނާއިބު ރައީސުލްޖުމްހޫރިއްޔާއަށް ލަފާދެއްވާފައިވާކަމަށް ރައީސް އޮފީހުން އޭރު ވިދާޅުވެފައި ވެއެވެ.
ރައީސް އޮފީހުން ވިދާޅުވެފައިވަނީ، 28 ނޮވެމްބަރު 2022 ން ފެށިގެން ޢަމަލުކުރަމުން ގެންދިޔަ މި އުޞޫލާއި މެދު ދައުލަތުގެ ބަންޑާރަ ނާއިބު ރައީސުލްޖުމްހޫރިއްޔާއަށް މިދެއްވި ލަފާގައި، މިއީ ޤާނޫނީ އޮނިގަނޑެއްނެތި އަދި ޤާނޫނީ ބާރެއްނެތި އެކުލަވާލާފައިވާ އުޞޫލެއްކަން ފާހަގަކުރެއްވުމުގެ އިތުރުން، މި އުޞޫލުގެ ދަށުން މައްސަލަތައް ޙައްލުކުރުމުގެ ނަމުގައި އެކި ފަރާތްތަކަށް މާލީ ބަދަލުތައް ދިނުން ފަދަ ކަންކަން ދައުލަތުގެ ބަންޑާރަ ނާއިބުގެ އޮފީހުގެ އެއްވެސް ބައިވެރިވުމެއް ނެތި، އަދި އެއްވެސް ލަފައެއްވެސް ނެތި ކުރިއަށް ގެންދިޔައީ، ޤާނޫނުއަސާސީގެ 133 ވަނަ މާއްދާގެ (ނ) އާއި ޚިލާފަށްކަން ފާހަގަކުރައްވާފައި ވާކަމަށެވެ.
