ކުރީގެ ރައީސް އިބުރާހިމް މުހައްމަދު ސާލިހު އެމްޑީޕީގެ އެޑްވައިޒަރަކަށް ހަމަޖައްސައިފިއެވެ.
އެމްޑީޕީގެ އެޑްވައިޒަރަކަށް ރައީސް ސާލިހު ހަމަޖައްސާފައިވާކަން ހާމަވީ އެޕާޓީގެ ރަސްމީ އެކްސް ހޭންޑްލްތަކުން މިހާރު ކުރަމުންދާ ޕޯސްޓުތަކުން ރައީސް ސާލިހާ މުޚާތަބްކޮށް "އެމްޑީޕީގެ އެޑްވައިޒަރ"ގެ ގޮތުން މުޚާތަބު ކުރާން ފެށުމާއި ގުޅިގެންނެވެ.
އެހެންނަމަވެސް، އެމަނިކުފާނަށް އެމްޑީޕީގެ އެޑްވައިޒަރުކަން ހަމަޖެއްސެވީ ގައުމީ މަޖިލިހުގެ ޖަލްސާއަކުންކަމެއް އަދި ސާފުވެފައެއް ނުވެއެވެ.
އެމްޑީޕީގެ އެޑްވައިޒަރ އަދި ކުރީގެ ރައީސުލްޖުމްހޫރިއްޔާ، ރައީސް @ibusolih މާފަންނު އުތުރު ދާއިރާއަށް ވާދަކުރައްވާ ކެންޑިޑޭޓް @ifhamh އާއެކު އެދާއިރާގައި ދޮރުން ދޮރަށް ހިންގެވުން ކުރިއަށްދަނީ.
2️⃣✅#VoteMDP #Ifu2024 #MisraabuHamaMagah #Majilis2024 pic.twitter.com/ejubTGJRsd
— MDP Secretariat (@MDPSecretariat) February 27, 2024
ފާއިތުވި ހަފްތާފައި އެމްޑީޕީންވަނީ އިންތިޚާބަކާ ނުލާ އެޕާޓީގެ ރައީސްކަމަށް ކުރީގެ ފޮރިން މިނިސްޓަރ ޝާހިދު ހަމަޖައްސާފައެވެ. އިންތިޚާބަކާ ނުލާ އެމަގާމަށް ޝާހިދު ހަމަޖެހިގެން ދިޔައީ އެހެން ފަރާތަކުން އެމަގާމަށް ވާދަކުރުމަށް ކުރިމަތި ނުލުމާއި ގުޅިގެންނެވެ.
ޝާހިދު އެމްޑީޕީގެ ރައީސްކަމަށް ހަމަޖެހިގެންދިޔަ ނަމަވެސް، ޕާޓީ ހިންގުމުގެ އެންމެ އިސް ފަރާތެއްގެ ގޮތުގައި ހުންނަވާނީ ޕާޓީގެ ޗެއަރޕާސަންއެވެ.
ރައީސް ސާލިހު އެމްޑީޕީގެ އެޑްވައިޒަރުގެ މަގާމަށް ހަމަޖެއްސުމުގެ ކުރިން ހުންނެވީ އެޕާޓީގެ ވަގުތީ ރައީސަކަށެވެ. އެހެންނަމަވެސް އެންމެ ފަހުން ބޭއްވުނު އެމްޑީޕީގެ މަޖިލިސް ކެމްޕޭންގެ އިފްތިތާހީ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، އެޕާޓީގެ ރައީސްކަމަށް ޝާހިދު އައްޔަން ކުރެއްވުނު ނަމަވެސް، އެމަނިކުފާނު ޕާޓީގެ ލީޑަރޝިޕުން ދުރަށް ވަޑައި ނުގަންނަވާނެ ކަމުގައެވެ.
ކޮމެންޓު ފޮނުވާ