އިދިކޮޅު ފަރާތްތަކުން ގެންގުޅެނީ މުޅިން އެހެން ފަރާތެއްގެ މާ ބޮޑެތި މަސްލަހަތުތަކެއް ހިމާޔަތްކުރުމުގެ އެޖެންޑާއެއް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖޭގެ އުތުރަށް ކުރައްވަމުން ގެންދަވާ ދަތުރުފުޅުގައި މިއަދު ހެނދުނު ށ. ކަނޑިތީމު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ތަރައްގީ ގެނެސްދޭން ސަރުކާރުން ކުރަމުންދާ މަސައްކަތަކަށް ރައްޔިތުންގެ މަޖިލިހުގެ ބޮޑު މެޖޯރިޓީއަކުން ހުރަސް އަޅަމުންދާކަމުގައެވެ.
އެގޮތުން ރައީސް ވިދާޅުވި ސަރުކާރުން ބޭނުންވާ ކަންކަން ފަސޭހަކަމާއެކު ކުރެވޭނީ ސަރުކާރާ އެއްވިސްނުމެއްގައި މަސައްކަތް ކުރާނެ މެމްބަރުން ރައްޔިތުންގެ މަޖިލިހުގައި ތިއްބަވައިގެން ކަމުގައެވެ.
އެ ފަރާތްތަކުގެ އަމިއްލަ ވަކި މަސްލަހަތުތަކެއް އަދި މިހާރު ފެންނަ ގޮތަށް މިދިޔަ ތިން މަސްދުވަހުގެ ތެރޭގައި ކަންކަން ފެނުނު ގޮތުން ވިއްޔާ އަދި އޭރު އެ ބޭފުޅުން ވެރިކަމުގައި ތިއްބެވިއިރު ވެސް ގައުމާ ދޭތެރޭގައި ކަންތައްތައް ކުރި ގޮތަށް ބަލާއިރުގައި މުޅިން އެހެން ފަރާތެއްގެ މާ ބޮޑެތި މަސްލަހަތުތަކެއް ހިމާޔަތްކުރުމުގެ އެޖެންޑާއެއް ގެންގުޅެނީ.
މިއަދުގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވި މިއަހަރަށް ލަފާކުރި ބަޖެޓް މަޖިލިހުން ފާސްކުރީވެސް ސަރުކާރަށް ޖެއްސުން ކުރުމުގެ މަގުސަދުގައި، ޕްރޮޖެކްޓްތަކަށް އެކަށިގެންވާ ވަރަށް ބަޖެޓް ނުކޮށް ކަމަށެވެ. އަދި އެކަމުގެ ގޮންޖެހުންތަކާ ސަރުކާރަށް ކުރިމަތިލާންޖެހިފައިވާކަމަށްވެސް ރައީސް މުއިއްޒު ވިދާޅުވިއެވެ.
މާ ބޮޑަށް ސިޔާސީވެފައި މި އޮންނަނީ. ޕާޓީލައިނުން ވަރަށް ބޮޑަށް އަދި އަމުދުން މިހާރުގެ އިދިކޮޅު ޕާޓީން ވަރަށް ބޮޑަށް ޕާޓީލައިން ނަގަނީ ކަންކަމުގައި. ތަރައްގީގެ ވިސްނުމެއް ނޫން، ގައުމަށް ފައިދާހުރި ކަންކަމެއް ނޫން.
ރައީސް ވިދާޅުވި އެވެ.
ކޮމެންޓު ފޮނުވާ