މަޖިލީހުގެ ޖަލްސާތައް ނުބާއްވައި ތިބުމަކީ ބަލައިގަނެވޭނެ ކަމެއް ނޫންކަމުގައި ދަޑިމޮކްރެޓްސްގެ ރައީސް ހަސަން ލަތީފް ވިދާޅުވެއްޖެއެވެ.
ހަސަން ލަތީފް ކުރެއްވި އެކްސް ޕޯސްޓެއްގައި ވިދާޅުވީ މަޖިލީހުގެ ޖަލްސާތައް ނުބާއްވައި ތިއްބެވުމަކީ ބަލައިގަނެވޭނެ ކަމެއް ނޫން ކަމަށާއި، މަޖިލީހުގެ ގަވާއިދުގައިވާ ގޮތުގެ މަތީން ޖަލްސާތައް ބާއްވަންޖެހޭ ކަމަށެވެ.
އަދ ރައްޔިތުން މަޖިލީހުން ނިންމާންޖެހޭ އެތައް ބައިވަރު މަސައްކަތެއް ހުރިކަން ފާހަގަ ކުރައްވަމުން ހަސަން ވިދާޅުވީ ޖަލްސާތައް ނުބާއްވަން ޕީޖީ ލީޑަރުންނަށް ރައްޔިތުންގެ މަޖިލިހުގެ ރައީސަށް ލަފައެއް ނުދެއްވޭނެ ކަމަށެވެ.
މަޖިލިހުގެ ޖަލްސާތައް ނުބާއްވާކަމުގެ ކަންބޮޑުވުން ހަސަން ލަތީފް ފާޅުކުރެއްވިއިރު، މިދިޔަ ބުދަ ދުވަހު ބޭއްވި މަޖިލިހުގެ ޖަލްސާ ނިންމަވާލައްވަމުން މަޖިލިހުގެ ނައިބު ރައީސް އަހުމަދު ސަލީމް ވިދާޅުވީ މިއަދު ހެނދުނު 9:00 ގައި ޖަލްސާއެއް އޮންނާނެ ކަމަށެވެ. އެހެންނަމަވެސް މިއަދުގެ ޖަލްސާ އޮންނާނެ ކަން މަޖިލިހުގެ ވެބްސައިޓުން ވެސް އެނގޭކަށް ނެތެވެ.
އަދި މިއަދުގެ 11:00 އަށް މަޖިލީހުގެ ޕެޓިޝަން ކޮމިޓީގެ ބައްދަލުވުމެއް ބާއްވަން ވެސް ތާވަލުކުރިއެވެ. އެހެންނަމަވެސް އެ ކޮމިޓީގެ ބައްދަލުވުން ވެސް ވަނީ ފަހުން ކެންސަލްކޮށްފައެވެ. ޕެޓިޝަން ކޮމިޓީގައި މިއަދަށް އެޖެންޑާކޮށްފައި އޮތީ ގެދޮރުވެރިޔާ ސްކީމްގެ ދަށުން ފުލެޓު ލިބޭނެ ކަމަށް ގެޒެޓު ކުރެވިފައިވާ އެންމެހައި މީހުންނަށް އަދި ކަމުގެ މަސްލަހަތު އޮތް އެންމެންގެ ފުލެޓު ބާތިލުނުކުރާން އެދި ހުށަހަޅާފައި އޮތް ޕެޓިޝަނެއް ދިރާސާކުރުމެވެ.
