2017 ވަނަ އަަހަރުގެ ތެރޭގައި އަނިޔާވެރި ގޮތަކަށް މަަރާލާފައިވާ ރ. މީދޫ، ފެންފިޔާޒުގެ މުހައްމަދު އަނަސްގެ މަރުގެ މައްސަލައިގައި ހިމެނޭ އެންމެންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ހުކުމް ކޮށްފިއެވެ.
އަނަސް އަށް ހަމަލާދީ މަރާލާފައިވަނީ 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭގެ ވަގުތެއްގައެވެ.
އަނަސް އަށް ހަމަލާ ދީފައިވަނީ އޭނާއަށް ފާރަލަމުން އޭނާ ފަހަތުން ގޮސް ލިޓަސް ސާވިސް ސެންޓަރު ތެރޭގައެވެ.
އަނަސްގެ މަރުގެ މައްސަލައިގައި ދައުލަތުން 7 މީހެއްގެ މައްޗަށް ދައުވާ އުފުލިއެވެ.
އެމީހުންގެ ތެރޭގައި ދަފްތަރު ނަމްބަރު 1746 ސިމާހު މޫސާ އާއި ސ ފޭދޫ ވެސްޓަންވިލާ ހަސަން މަހްފޫޒް އާއި ތ ކިނބިދޫ ގުލްފާމްގޭ މުހައްމަދު ޝާޒް އާއި ލ ގަން ތުނޑި ނަންނާރިގެ ޖުނައިހު އަބްދުﷲ އާއި މާފަންނު ދިމިސްގު އުސްމާން ޝަރީފްއާއި ޅ ކުރެންދޫ އަސުރުމާގޭ އަހްމަދު ޒަޔާންގެ އިތުރުން މާފަންނު ލޮނުމިދިލިިގޭ އަފްރާހު އަބްދުއްރައްޒާގް އެވެ.
އަނަސްގެ މަރުގައި ދައުވާ އުފުލި 7 މީހުންގެ ތެރެއިން ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވިކަމުގެ ދައުވާ 4 މީހެއްގެ މައްޗަށް އުފުލިއެވެ. އެމީހުންނަކީ ޖުނައިހު އަބްދުﷲ އާއި ހަސަން މަހްފޫޒް އާއި މުހައްމަދު ޝާޒްގެ އިތުރުން ސިމާހް މޫސާއެވެ.
ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާ ބާކީ ތިބި 3 މީހުންގެ މައްޗަށް އުފުލިއެވެ. އެމީހުންނަކީ އަހްމަދު ޒަޔާން، އުސްމާން ޝަރީފް އަދި އަފްރާހު އަބްދުއްރައްޒާގް އެވެ.
އަނަސްގެ މަރުގެ މައްސަލައިގައި އެންމެ ފަހުން ބޭއްވި ޝަރީއަތުގައި ވަނީ މައްސަލައިގެ ހުކުމް ކޮށްފައެވެ.
ކްރިމިނަލް ކޯޓްގައި މިފެބްރުއަރީ މަހުގެ 25 ވަނަ ދުވަހު ބޭއްވި ޝަރީއަތުގެ އަޑުއެހުމުގައި މައްސަލަ ބެއްލެވި ގާޒީ އަލީ ނަދީމް ވަނީ ތުހުމަތުކުރެވޭ މީހުންގެ މައްޗަށް މައްސަލަ ސާބިތު ނުވާ ކަމަށް ނިންމާފައެވެ.
ދައުލަތުގެ ފަރާތުން މައްސަލަ ސާބިތުކުރުމަށް ހެކީގެ ގޮތުގައި ހުށަހެޅި ވީޑިއޯ ފުޓޭޖްތަކާއި ފޮޓޯތަކުން ފެންނަ މީހުންކަން ސާބިތުކުރެވޭނެ ވަރަށް ހެކިނެތްކަމަށް ގާޒީ ވަނީ ވިދާޅުވެފައެވެ.
ދައުވާ އުފުލާފައިވާ މަހުފޫޒާއި ދެކޮޅަށް 18 ހެއްކެއް ހުށަހެޅި ނަމަވެސް މިއިން އެއްވެސް ކަމެއް ޝަރީއަތަށް ޝައްކެތް ނެތް މިންވަރަށް ސާބިތުކޮށް ނުދޭ ކަމަށް ވެސް ގާޒީ ވިދާޅުވިއެވެ. އަދި އަފްރާހާ ދެކޮޅަށް 11 ހެކި، ސިމާހު އާ ދެކޮޅަށް 14 ހެކި އަދި އުސްމާނާ ދެކޮޅަށް 15 ހެކި ހުށަހަޅާފައިވީ ނަމަވެސް ސީސީޓިވީ ފުޓޭޖުންނާއި ފޮޓޯތަކުން ފެންނަނީ އެމީހުން ކަން ޔަގީން ކުރުމަށް އިތުރު އެއްވެސް ހެއްކެއް ހުށަނާޅާ ކަންވެސް ގާޒީ ވަނީ ފާހަގަކުރައްވާފައެވެ.
މީގެއިތުރުން މައްސަލައިގެ ތަހުގީގު ރިޕޯޓަކީ ސިއްރު ރިޕޯޓެއްކަން ފާހަގަކުރައްވައި ގާޒީ ވިދާޅުވެފައިވަނީ ޝަރީއަތުން ހެކި ވަޒަންކުރުމުގައި ބުރަދަނެއް ދެވިދާނެ ރިޕޯޓެއްގެ ގޮތުގައި އެރިޕޯޓް ބަލައިގަނެވެން ނެތް ކަމަށެވެ.
މީގެ އިތުރުން މައްސަލައިގައި ފުލުހުން ހުށަހެޅި އިންޓަލިޖެންސް ރިޕޯޓަަކީވެސް ޝަރީއަތުން އެއާއިމެދު ރިއާޔަތްކުރެވެން އޮތް އެއްޗަކަށް ނުވާ ކަމަށްވެސް ގާޒީ ވަނީ ނިންމާފައެވެ.
