ރައީސް ޑރ. މުހައްމަދު މުއިއްޒު ގދ. ގައްދު އަށް ވަޑައިގަންނަވާތީވެ އެމަނިކުފާނު ރައްޔިތުންނާ ބައްދަލު ކުރެއްވުމަށް ބޭއްވި ހަފްލާ ފުރިހަމަ ކުރަން އެންމެ މަތީ ފެންވަރަށް މަސައްކަތްކޮށްފައިވާނެ ކަމަށް ގައްދޫ ކައުންސިލުން މިއަދު ބުނެފިއެވެ.

ރައީސް ޑރ. މުއިއްޒު ދެކުނުގެ ހަތަރު އަތޮޅަކަށް ފެއްޓެވި ދަތުރުފުޅުގައި ގައްދޫ އަށް ކުރެއްވި ދަތުރުފުޅުގައި އެ ރަށުގެ ކައުންސިލްގެ ރައީސް މުހައްމަދު އަހުމަދާއި ނައިބު ރައީސް ހަދީޖާ އަހުމަދު ބައްދަލު ނުކުރެއްވި މައްސަލަ ވަނީ ހޫނުވެފައެވެ. ރައީސް ޑރ. މުއިއްޒު ވެސް އެ ކަންބޮޑުވުން ފާޅު ކުރެއްވިއެވެ. ރައީސަށް މަރުހަބާ ދަންނަވަން ބަނދަރު ސަރަހައްދަށް ގިނަ ބަޔަކު އެއްވި އިރު އެ ތަނަށް ވެސް ދެ ބޭފުޅުން ވަޑައެއް ނުގަންނަވައެވެ.

އަދި ރައްޔިތުންނާ ބައްދަލު ކުރެއްވުމަށް ސްކޫލްގައި ބޭއްވި ޖަލްސާގައި ވެސް ދެ ބޭފުޅުން ބައިވެރިވެވަޑައިގެންފައި ނުވާތީ އެކަން ވެސް ރައީސް ފާހަގަ ކުރެއްވިއެވެ.

ގައްދޫ ކައުންސިލަށް އަމާޒުވަމުން އަންނަ ފާޑު ކިއުންތަކާ ގުޅިގެން އެ ކައުންސިލުން ނެރުނު ބަޔާނެއްގައި ބުނީ ރައީސް ޑރ. މުއިއްޒު އިއްޔެ ގައްދު އަށް ވަޑައިގަންނަވާ ކަން އެނގުނީ ފެބްރުއަރީ 16 ވަނަ ދުވަހު ރައީސް އޮފީހުން ކައުންސިލަށް ފޮނުވި ނޯޓެއްގައި ކަމަށެވެ.

ރައީސުލްޖުމްހޫރިއްޔާއަކު ރަށަށް ޒިޔާރަތް ކުރައްވާ ހަފްލާއަކީ ރަސްމީ ހައިސިއްޔަތުން އެންމެ މަތީ ފެންވަރުގައި އެކަން އިންތިޒާމުކޮށް ފުރިހަމަކޮށް ނިންމަން ޖެހޭ ކަމެއް ކަމަށްވާ އިރު، މިކަން ރާވައި ހިންގުމުގެ ހުރިހާ ކަމެއް އެންމެ މަތީ ފެންވަރަށް ކައުންސިލާއި ގައްދޫ ސަރުކާރު އޮފީސްތަކާއި ކުންފުނިތަކުގެ ގާބިލްކަން ތަން ދިން އެންމެ މަތީ ފެންވަރަކަށް ގޮންޖެހުންތަކާއި ދަތި އުނދަގޫކޮށް ނަމަވެސް ފުރިހަމަ ކަމާއެކު ކޮށް ނިންމުމުގެ ޒިންމާ އާއި މަސައްކަތް ތަރުތީބު މަގުން ކޮށްފައިވާނެ ކަމަށް އެ ބަޔާނުގައިވެއެވެ.

ނަމަވެސް ރައީސުލްޖުމްހޫރިއްޔާގެ ދަތުރުފަތުރުގެ ކަންކަމުގައި ރައީސް އޮފީހާއި ސަރުކާރުގެ އޮފީސްތަކާއި ކުންފުނިތައް ނިސްބަތްވާ މައި އޮފީސްތަކުގެ އެކަށީގެންވާ އެއްބާރުލުން ލިބިފައި ނުވާ ކަމަށް ވެސް ބަޔާނުގައިވެއެވެ.

ރައީސް، ރައްޔިތުންނާ ބައްދަލު ކުރެއްވި ޖަލްސާގައި ގައްދޫ ކައުންސިލްގެ ރައީސް ވާހަކަ ދެއްކެވުމަށް ހަމަޖެހުނު އިރު، ވަޒީރުން ބޭނުންވާ ގޮތަށް ކައުންސިލްގެ ރައީސް ވާހަކަ ބައްޓަން ކުރަން އެންގެވުމަކީ ކައުންސިލުން ފުރިހަމަ ކުރަން ބޭނުންވާ ކަމެއް ނޫން ކަމަށް ވެސް އެ ބަޔާނުގައިވެއެވެ. އަދި ފަހު ވަގުތުގައި ރައީސްގެ ދަތުރުފުޅަކީ ސިޔާސީ ހީލަތްތެރި މަގްސަދެއް ހާސިލް ކުރުމުގެ މަގްސަދުގައި ކުރެއްވި ދަތުރުފުޅެއް ގޮތުގައި ބަދަލުކޮށްފައިވާ ކަމަށް ތުހުމަތުކޮށްފައިވެއެވެ.

ގައްދޫ ކައުންސިލުން ބުނި ގޮތުގައި ރައީސްގެ އިސްތިގުބާލަށް ކައުންސިލް މެމްބަރުން ނުކުންނެވުމަކީ އެބޭފުޅުންގެ އަމިއްލަ އިހްތިޔާރުގައި އޮންނަ ކަމެކެވެ.

"މި ކައުންސިލް، ސިޔާސީ ގޮތުން ރައީސުލްޖުމްހޫރިއްޔާ ބޭނުންވާ ގޮތަކަށް އަޅުދާސްތުވެ، ގުލާނެއް ނުކުރާނެއެވެ. ނަމަވެސް ގައްދުއަށާއި ރައްޔިތުންނަށް ސަރުކާރުން ކޮށްދެއްވަން ބޭނުންފުޅުވާ ހުރިހާ ކަމަކަށް އެންމެ ފުރިހަމަ އެއްބާރުލުން ދިނުމުގައި ކައުންސިލް އަބަދުވެސް ދެމިއޮންނާނެއެވެ." ގައްދޫ ކައުންސިލްގެ ބަޔާނުގައިވެއެވެ.

ގައްދޫ ކައުންސިލްގެ ބަޔާނުގައި ވަނީ ސިޔާސީ މަގްސަދު ހާސިލް ކުރުމަށް ހަގީގަތާ ހިލާފަށް ރައީސުލްޖުމްހޫރިއްޔާ ދައްކަވާފައިވާ ވާހަކަފުޅުތައް ހަރުކަށި އިބާރާތުން ކުށްވެރި ކުރައްވައިފައެވެ. އަދި ލޯކަލް ގަވަމަންޓް އޮތޯރިޓީ މެދުވެރިކޮށް ގައްދޫ ކައުންސިލާއި ރައްޔިތުން ބަލިކަށި ކުރުމަށް ކުރަމުންދާ ކަންކަން ހުއްޓާލުމަށް ވެސް ގޮވާލާފައިވެއެވެ.