ރާއްޖޭގެ ބޭންކިންގ އަދި ޕަބްލިކް ފައިނޭންސް ނިޒާމުގެ އިތުބާރު ގެއްލުވާލުމަށް ޓަކައި ބައެއް ފަރާތްތަކުން ގުޅިގެން މަސައްކަތް ކުރަމުންދާކަމަށް ފާހަގަކުރެވިފައިވާކަމަށް އިކޮނޮމިކް މިނިސްޓްރީން ބުނެފިއެވެ.
ރާއްޖޭގެ އިގްތިސާދީ ހާލަތު ދަށްވެ، ސަރުކާރުން އައިއެމްއެފްގެ ޕްރޮގްރާމަށް ދާން ތައްޔާރުވަމުންދާކަމަށް ސޯޝަލް މީޑިއާގައި ބައެއް ފަރާތްތަކުން ދައްކަމުންދާ ވާހަކަތަކާއި ގުޅޭގޮތުން އިކޮނޮމިކް މިނިސްޓްރީން މިއަދު ނެރުނު ނޫސް ބަޔާނެއްގައި ބުނެފައިވަނީ، މި ތުހުމަތުތަކަކީ ދޮގު އަދި މުޅިން އަސާސެއް ނެތް ތުހުމަތުތަކެއް ކަމުގައެވެ.
މިއީ ސަރުކާރުން ފަށާފައިވާ އިޤްތިޞާދީ އަދި މާލީ ބޮޑެތި އިޞްލާޙުތައް ފުނޑުފުނޑުކޮށްލުމަށް ކުރާ މަސައްކަތްތަކެކެވެ. ދެމެހެއްޓެނިވި ގޮތެއްގައި ހަރުދަނާ އިޤްތިޞާދެއް ބިނާކުރުމަށް ޓަކައި އިޞްލާޙީ އެޖެންޑާގެ ދަށުން ކުރިއަށް ދާއިރު، ރާއްޖޭގެ ބޭންކިންގ ނިޒާމުގައި ޢާންމު މަސްލަހަތާއި އަމަންއަމާންކަން ދެމެހެއްޓޭނެކަމުގެ ޔަޤީންކަން ސަރުކާރުން އަރުވަމެވެ.
އިކޮނޮމިކް މިނިސްޓްރީގެ ބަޔާނުގައި ވިދާޅުވެފައި ވެއެވެ.
މިނިސްޓްރީގެ ބަޔާނުގައި އިތުރަށް ވިދާޅުވެފައިވަނީ، މީގެ އިތުރުން، އިޤްތިޞާދީ ކުރިއެރުމާއި ބެހޭގޮތުން ތަރައްޤީގެ ބައިވެރިންގެ ފަހުގެ ރިޕޯޓްތަކުން ވެސް ފާހަގަކުރެވިފައިވާ ފަދައިން، އިޤްތިޞާދީ ގޮތުން ކުރިމަތިވި ގޮންޖެހުންތަކާއެކުވެސް، އިޤްތިޞާދީ ދުވެލި ކުރިއަރާނެ ކަމަށް ލަފާކުރެވޭ ވަރަށްވުރެ، ޙަޤީޤީ އިޤްތިޞާދު މިދަނީ ރަނގަޅު ވަމުންކަން ސަރުކާރުން ފާހަގަ ކޮށްފައި ވެއެވެ.
އިޤްތިޞާދު ހަރުދަނާކުރުމަށާއި، އިތުބާރު އުފެއްދުމަށް އެންމެން ގުޅިގެން ކުރާ މަސައްކަތަށް ބުރޫއަރާފަދަ ހަގީގަތާ ޚިލާފު ހަގީގަތާ ޚިލާފު ވާހަކަތައް ނުފެތުރުމަށް ހުރިހާ ފަރާތްތަކަކަށް އިލްތިމާސްކުރާކަމަށްވެސް މިނިސްޓްރީގެ ބަޔާނުގައި ވިދާޅުވެފައި ވެއެވެ.
ރާއްޖެއިން އައިއެމްއެފްެ މާލި އެހީތެރިކަން ހޯދުމަށް މަސައްކަޔް ކުރަމުންދާކަމަށް ދެކެވޭ ވާހަކަތައް މީގެކުރިންވެސް ސަރުކާރުން ދޮގުކޮށްފައި ވެއެވެ. އެ ރިޕޯޓުތައް ދޮގުކޮށް އިކޮނޮމިކް މިނިސްޓަރ ސައީދު ކުރެއްވި އެކްސް ޕޯސްޓެއްގައި ވިދާޅުވީ، ރާއްޖޭގެ މާލީނިޒާމްގެ އިތުބާރުގެއްލުވާލަން ފިލާތިބެ ބަޔަކު މަސައްކަތްކުރަނީ އިންތިޒާރުކުރި ގޯސްހާލަތަށް ރާއްޖެވައްޓާ ނުލެވުމުން ސިޔާސީގޮތުން މާޔޫސްވެގެން ކަމުގައެވެ. އަދި ރާއްޖެވަކި ޕްރޮގްރާމެއްގައި ބައިވެރިވާކަށްނުޖެހޭނެ ކަމަށާއި، އިޤްތިޞާދީޙާލަތު އައްނަނީ ކުރީންލަފާކުރި ވަރަށްވުރެންވެސް ބާރަށް ރަނގަޅުވަމުން ކަމަށްވެސް ސައީދު ވިދާޅިއެވެ.
ގައުމުތަކަށް ކުރިމަތިބާ މާލީ ކާރިސާތަކުގައި އެހީތެރި ވެދިނުމުގެ ގޮތުން އައިއެމްފްއިން މާލީ އެހީތެރިކަން ގައުމުތަކަށް ފޯރުކޮށް ދެއެވެ. އެހެންނަމަވެސް އެ ހާލަތުގައި އައިއެމްއެފްގެ މާލީ އެހީތެރިކަން ލިބެނީ ޚަރަދު ކުޑަކުރުމުގެ ގޮތުން ވަަރަށް ހަރުކަށި އިގްތިސާދީ ފިޔަވަޅުތައް އެޅުމަށް އެގައުމުތަކުގެ ސަރުކާރުތަކުން އެއްބަސް ވުމުންނެވެ.
އޭގެ ތެރޭގައި ސަބްސިޑީތައް ކަނޑާލުމާއި، ރިކަރަންޓް ޚަރަދުތައް ބޮޑުތަނުން ކުޑަކުރުމާއި، ވަޒީފާތަކުގެ އަދަދު އިތުރު ނުކުރުމާއި، ޕްރޮޖެކްޓްތައް ކުރިޔަށް ގެންދިއުން ހުއްޓާލުންފަދަ ފިޔަވަޅުތައްވެސް ހިމެނެއެވެ.
އަވައްޓެރި ސްރީލަންކާއަށް ކުރިމަތިވި އިގްތިސާދީ ކާރިސާގައި އައިއެމްއެފްގެ އެހީތެރިކަން ހޯދުމަށް އެ ފިޔަވަޅުތައް ހިމެނޭ އައިއެމްއެފްގެ ޕްރޮގްރާމަށް ދިއުމަށް އެގައުމަށް މަޖުބޫރު ވިއެވެ.
