އެމްޑީޕީގެ ރައީސްކަމަށް ކުރީގެ ފޮރިން މިނިސްޓަރު ޝާހިދު ކުރިމަތިލައްވަން ނިންމަވާފައިވާކަމަށް ބައެއް ފަރާތްތަކުން މައުލޫމާތު ދީފިއެވެ. އެހެންނަމަވެސް ޝާހިދު މިކަން އަދި ރަސްމީކޮށް އިއުލާން ކޮށްދެްވާފައެއް ނުވެއެވެ.
އެމްޑިޕީގެ ބައެއް ފަރާތްތަކުން ވިދާޅުވި ގޮތުގައި، ބެލެވޭ ގޮތުގައި، މިހާރު އިއުލާން ކޮށްފައިވާ އެޕާޓީގެ ރައީސްކަމަށް ކުރިމަތިލައްވާނީވެސް ޝާހިދު އެކަންޏެވެ.
އެމްޑީޕީގެ އަސާސީ ގަވާއިދުގައިވާގޮތުން އެންމެ ބޭފުޅަކު ރައީސްކަމަށް ކުރިމަތިލައްވައިފިނަމަ އެމަގާމަށް ބޭފުޅަކު ހޮވުމަށް ޕާޓީގެ މެމްބަރުންގެ މެދުގައި އާންމު އިންތިޚާބެއް ނުބާއްވާނެއެވެ.
ފާއިތުވި ނޮވެމްބަރުމަހު އެމްޑީޕީން ވަނީ އެޕާޓީގެ ވަގުތީ ރައީސްކަމަށް ކުރީގެ ރައީސް ސާލިހު ހަމަޖައްސާފައެވެ. އެހެންނަމަވެސް ރައީސް ސާލިހު ދެން އެޕާޓީގެ ރައީސްކަމަށް ވާދަ ނުކުރައްވާނެކަމަށް ވަނީ މައުލޫމާތު ލިބިފައެވެ.
އެމްޑީޕީގެ ރައީސްގެ މަޤާމުގެ އިންތިޚާބު 02 މާރޗް 2024 ވާ ހޮނިހިރު ދުވަހު ބޭއްވުމަށް އެޕާޓީންވަނީ ހަމަޖައްސާފައެވެ.
އެމްޑީޕީން ކުރި އިއުލާނުގައި ބުނެފައިވަނީ،ޕާޓީގެ ރައީސްކަމަށް ކުރިމަތިލުމަށް އެދޭ މެންބަރުންނަށް އެފުރުޞަތު 20 ފެބްރުއަރީ 2024 ވަނަ ދުވަހުގެ 14:00 އާއި ހަމައަށް ހުޅުވާލެވިފައިވާ ވާކަމަށެވެ.
މިކަމަށްއެދޭ މިޕާޓީގެ މެންބަރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ފުރިހަމަކޮށްފައިވާ ކުށާއި ދަރާނީގެ ރިކޯޑާއި އެކު ފުރިހަމަކޮށް ފައި ހުށަހަޅަންޖެހޭނެ ކަމަށްވެސް ބުނެފައި ވެއެވެ.
