ފާއިތުވި ޖެނުއަރީމަހުގެ 29 ވަނަ ދުވަހު، ރައްޔިތުންގެ މަޖިލީހުންގެ މަޖިލީހުން ރުހުން ނުދިނުމަށް ފާސްކޮށްފައިވާ 3 ވަޒީރުންގެ ނަންތައް އަލުން ރައްޔިތުންގެ މަޖިލީހަށް ރައީސް މުއިއްޒު ފޮނުއްވުމާއި ގުޅިގެން، އެ ތިން ނަންފުޅާމެދު ސަރުކާރުން އަލުން ވިސްނުމަށް ގޮވާލާ ގަރާރެއް ރައްޔިތުންގެ މަޖިލީހަށް ހުށަހަޅުއްވައިފިއެވެ.
މި ގަރާރު ރައްޔިތުންގެ މަޖިލީހަށް ހުށަހެެޅުއްވީ ގަލޮޅު އުތުރު ދާއިރާގެ ދަ ޑިމޮކްރެޓްސް މެމްބަރު އަދި މަޖިލިހުގެ ކުރީގެ ނައިބު ރައީސް އީވާ އެވެ.
ރައްޔިތުންގެ މަޖިލިހުން ރުހުން ނުދިނުމަށް ފާސްކުރި ތިން ވަޒީރުންނަކީ ބަންޑާރަ ނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރެވެ.
އީވާ މަޖިލީހަށް ހުށަހެޅުއްވި ގަރާރުގައި ވިދާޅުވެފައިވަނީ ތިން ވަޒީރަކަށް ރުހުން ދޭން ނުފެންނަ ކަމަށް މަޖިލިހުން ނިންމާފައި ވަނިކޮށް މިދިޔަ މަހުގެ 29 ވަނަ ދުވަހު، ރައީސް ޑރ. މުހައްމަދު މުއިއްޒު އެ ތިން ވަޒީރުން ވެސް މަގާމުތަކަށް އައްޔަން ކުރެއްވުމަކީ ގާނޫނުއަސާސީން ރައްޔިތުންނަށް ދީފައިވާ ބާރު ކަނޑުވާލައި ވެރިކަން ހިންގުމުގެ ބާރު ޖަވާބުދާރީ ކުރުވުމަށް މަޖިލިހަށް ދީފައިވާ ބާރު ނިގުޅައިގެންދާ ފަދަ އަމަލެއް ކަމުގައެވެ.
އަދި މިއީ ގާނޫނުއަސާސީން ރައްޔިތުންގެ މަޖިލިހަށް މަތިކޮށްފައިވާ ޒިންމާ އާއި ޑިމޮކްރެޓިކް ހަމަތަކާއި ބައިނަލްއަގުވާމީ އުސޫލުތަކާ ހިލާފު ނިންމުމެއް ކަމަށް ވެސް ގަރާރުގައި ވިދާޅުވެފައި ވެއެވެ.
އިވާގެ ގަރާރުގައި ވިދާޅުވެފައިވަނީ، މަޖިލީހުގެ އިމްތިޔާޒްތަކާއި ބާރުތަކުގެ ގާނޫނު ގައި ވާގޮތުން، މަޖިލީހުން ރުހުން ނުދީފިނަމަ އެ މީހަކު އެ މަގާމަށް ދެން އައްޔަނު ނުކުރެވޭނެ ކަމުގައެވެ.
އަދި ރުހުން ނުދިނުމަށް ރައްޔިތުންގެ މަޖިލީހުން ފާސްކުރުމާއެކު އެ މީހަކު އެމަގާމުން ވަކިވީ ކަމަށްވެސް އީވާގެ ގަރާރުގައި ވިދާޅުވެފައި ވެއެވެ.
އޭގެ އިތުރުން މި ގަރާރުގައި ވިދާޅުވެފައިވަނީ، ރުހުން ނުދިން ތިން ވަޒީރަކު އަލުން މަގާމުގެ މަސްއޫލިއްޔަތު އަދާކުރަން ފަށާފައިވާއިރު އެއީ ގާނޫނީ ބާރުވެރިކަމަށް ކަނޑައެޅިގެން ގޮންޖައްސަވާ ގާނޫނު އަސާސީއާ ހިލާފު ނިންމުމެއް ކަމުގައެވެ.
އީވާގެ ގަރާރުގައި ސަރުކާރަށް ގޮވާލާފައިވަނީ، ސަރުކާރުގެ ނިންމުމުގެ ސަބަބުން ސަރުކާރަށް ކުރާ އިތުބާރު ނެތިގެންދާނެ ފަދަ އުނދަގޫ ހާލަތަކަށް ހިނގައިދާނެ ކަމަށެވެ. އެހެންކަމުން ގައުމުގެ މަސްލަަހަތު އިސްކޮށް އެކަންކަމާ މެދު އަލުން ވިސްނާ ވަޑައިގެން ގާނޫނު އަސާސީއަށް އިހްތިރާމްކޮށް ގާނޫނު އަސާސީއާ އެއްގޮތަށް އަމަލު ކުރެއްވުމަށް އީވާގެ ގަރާރުގައި ސަރުކާރަށް ގޮވާލާފައި ވެއެވެ.
