ބިދޭސީ މަސައްކަތްތެރިންގެ މެޑިކަލް ޗެކަޕް ހެދުމުގެ އާ އުސޫލު މިދިޔަ ބުރާސްފަތި ދުވަހު ތައާރަފްކޮށްފި އެވެ.
ހެލްތު މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މި ސިޔާސަތު ތައާރަފްކޮށްދެއްވީ މިނިސްޓަރ އޮފް ހޯމްލޭންޑް އެންޑް ސެކިއުރިޓީ އަލީ އިހުސާންއެވެ.
ހެލްތް މިނިސްޓްރީން ބުނީ މި އުސޫލު ބަދަލުކުރީ ފަތުރުވެރިން ފިޔަވައި ދިގު މުއްދަތަކަށް ރާއްޖޭގައި ދިރިއުޅޭ ބިދޭސީންގެ ހާލު ރަނގަޅުތޯ ބެލުމަށާއި ގައިންގަޔަށް އަރާ ބަލިތައް ފެތުރުން މަދުކޮށް ކޮންޓްރޯލް ކުރުމަށް ކަމަށެވެ.
ސިޔާސަތަށް ގެނައި ބަދަލުތައް:
1. ވޯކް ވިސާގެ އިތުރުން ޑިޕެންޑެންޓް ވިސާ، ރެސިޑެންޓް ވިސާ، ސްޓޫޑެންޓް ވިސާ، ކޯޕަރޭޓް ރެސިޑެންޓް ވިސާ އަދި މެރިޖް ވިސާ ހަދައި ފުރަތަމަ އަންނައިރު އާއި އަހަރަކު އެއް ފަހަރު ހެލްތް މިނިސްޓްރީން ކަނޑައަޅާ މިންގަނޑުތަކަކަށް މެޑިކަލް ހަދަން ޖެހުން.
2. މެޑިކަލްގައި ބަލާ ބަލިތަކަށް އެންޑެމިކް ގައުމުތަކުން ބިޒްނަސް ވިސާގައި ތިބޭ މިހުން ވިސާ އެކްސްޓެންޑް ކުރާއިރު މެޑިކަލް ހަދަން ޖެހުން
3. މެރިޖް ވިސާއަށް ފުރަތަމަ އެދޭއިރު މެޑިކަލް ހަދަން ޖެހުން
4. ކުރިން މެޑިކަލްގައި ބަލާ ބަލިތަކުގެ އިތުރަށް، ފައިލޭރިއާ އެންޑެމިކް ގައުމުތަކުގެ މީހުން ފައިލޭރިއާ އަށް ޓެސްޓްކުރުން (މިފަދަ މީހުން ޓެސްޓް ކުރުމަށްފަހު ޕޮސިޓިވް ވެއްޖެނަމަ، މެޑިކަލް ދޫކުރެވޭނީ ފައިލޭރިއާއަށް ބޭސް ކެއުމަށްފަހު)
ބިދޭސީންގެ މެޑިކަލް އުސޫލަށް ބަދަލު ގެނެސްފައި ވަނީ ބިދޭސީން ވިސާ އަށް ހުށަހަޅާއިރު މެޑިކަލް ހުށަހެޅުން ހުއްޓާލިތާ ދެ އަހަރެއްހާ ދުވަސް ފަހުން، ރާއްޖެއިން ނައްތާލާފައިވާ ފައިލޭރިޔާ ޖެހިފައި ތިބި ބިދޭސީ ބަޔަކު މި ފަހުން ރާއްޖޭން ފެނުމުންނެވެ.
