ރައީސް އަޒުލުކުރުމާ ގުޅޭ އިސްލާހަށް އަމަލުކުރުން މަޑުޖައްސާލުމަށް ސުޕްރިމް ކޯޓުން އަމުރު ކޮށްފި

ރައްޔިތުންގެ މަޖިލީހުގެ ގަވައިދަށް ގެނައި އިސްލާހަށް އަމަލުކުރުން މަޑުޖައްސާލަން ސުޕްރީމް ކޯޓުން އަމުރުކޮށްފިއެވެ.

ސުޕްރީމް ކޯޓުން މިއަދު އަމުރު ކޮށްފައިވަނީ، ރައްޔިތުންގެ މަޖިލިހުގެ ގަވާއިދުގެ 49 ވަނަ މާއްދާގެ (ކ)، (އ)، އަދި (ވ) އަށް ގެނެސްފައިވާ އިސްލާހުތަކަށް މިވަގުތަށް އަމަލުނުކުރުމަށެވެ.

ސުޕްރީމް ކޯޓުގެ ފަނޑިޔާރުންގެ ތެރެއިން ފަނޑިޔާރު މަހާޒު އަލީ ޒާހިރު އަދި ފަނޑިޔާރު ހުސްނުއްސުއޫދު ތާއީދުކުރައްވާފައިވާ ފަނޑިޔާރު ޑރ. އަޒްމިރާލްދާ ޒާހިރުގެ، އަޣުލަބިއްޔަތު ރައުޔުގައި ބުނެފައިވަނީ، ޤާނޫނުއަސާސީގެ 88 ވަނަ މާއްދާގެ (ށ) ގައި ބަޔާންކުރާ ރައްޔިތުންގެ މަޖިލިހުގެ ބަރުލަމާނީ އިމްތިޔާޒަށް ރިއާޔަތްކުރުމާއެކު، އާންމު އުސޫލަކީ ރައްޔިތުންގެ މަޖިލިހުގެ ނިންމުމެއް ނުވަތަ ކޮށްފައިވާ ކަމަކާ މެދު ފައިސަލާކުރުމުގެ ފުރުސަތު ކޯޓުތަކަށް ލިބިފައި ނުވުން ކަމަށެވެ. އެހެންނަމަވެސް މީގެ އިސްތިސްނާ ހާލަތަކީ ރައްޔިތުންގެ މަޖިލިހުންވެސް ޤާނޫނުއަސާސީއާ ޚިލާފަށް އަމަލުކުރާކަމަށް ތުހުމަތު ކުރެވޭ މައްސަލަތައް ބެލުމުގެ ފުރުސަތު ކޯޓުތަކަށް އޮތުން ކަމަށް ބުނެފައިވެއެވެ.

ސުޕްރީމް ކޯޓުގެ އަމުރުގައި ބުނެފައިވަނީ މި މައްސަލައިގައި ފައިސަލާ ކުރަނިވި ހުކުމެއް ކުރުމުގެ ކުރިން ވަގުތީ އަމުރެއް ނުނެރެފިނަމަ، މައްސަލައިގެ މައުޟޫއުގައި ހިމެނޭ ކަންކަމުގެ މުއާލާތް ކެނޑުމުގެ އިހުތިމާލު އެބައޮތް ކަމަށެވެ.

މަޖިލިހުގެ މެންބަރުންގެ އަދަދު ކަނޑައެޅީ ޤާނޫނުއަސާސީގެ 71 ވަނަ މާއްދާގައިވާ ގޮތުގެ މަތިންކަމުގައިވެފައި، ޤާނޫނުއަސާސީގެ 86 ވަނަ މާއްދާގައި ރައްޔިތުންގެ މަޖިލިހުގެ ޖަލްސާއެއްގެ ޤާނޫނީ އަދަދު ކަނޑައަޅާފައިވާއިރު، އަދި 87 ވަނަ މާއްދާގައި މަޖިލިހުގެ މެންބަރުންނަށް ނިންމުންތައް ނިންމޭނެ އަދަދާބެހޭ އިރުޝާދު ދީފައިވާއިރު، މަޖިލީހުގެ ޖަލްސާތަކުގެ ކޯރަމް ބިނާވަނީ ޤާނޫނުއަސާސީގެ މި މާއްދާތަކުގެ މަތިންކަމަށް ސުޕްރީމް ކޯޓުން ބުނެފައިވެއެވެ. އަދި މަޖިލީހުގެ ގަވައިދަށް ގެނެސްފައިވާ އިސްލާހަކީ ޤާނޫނުއަސާސީ ޚިލާފަށް ގެނެސްފައިވާ އިސްލާހެއް ކަމަށް ތުހުމަތު ކުރާ ހާލަތުގައި ގަވައިދަށް ގެނެސްފައިވާ އިސްލާހަށް މިވަގުތު އަމަލުކުރުން މަޑުޖައްސާލަންޖެހޭ ކަމަށެވެ.

މީގެއިތުރުން ސުޕްރީމް ކޯޓުން ގޮތެއް ކަނޑައަޅަންދެން ފެށުނީއްސުރެ މަޖިލީހުން އަމަލުުރަމުންދިޔަ ގޮތް ދެމި އޮންނަންޖެހޭ ކަމަށް ދެކޭ ކަމަށާއި، މިއީ އާންމު މަސްލަހަތު ދެމެހެއްޓުމަށްޓަކައި ވަގުތީ އަމުރެއް ނެރެންޖެހޭ ހާލަތެއްކަމަށް އަމުރުގައި ބަޔާން ކޮށްފައިވެއެވެ.

"އެހެންކަމުން، ރައްޔިތުންގެ މަޖިލިހުގެ ގަވާއިދުގެ 49 ވަނަ މާއްދާގެ (ކ)، (އ)، އަދި (ވ) އަށް ގެނެސްފައިވާ އިޞްލާޙުތަކަށް މިވަގުތަށް ޢަމަލުނުކުރުމަށް މިމައްސަލަ ބަލާ ފަނޑިޔާރުންގެ އަޣުލަބިއްޔަތުން ރައްޔިތުންގެ މަޖިލިހަށް އަންގަމެވެ." ސުޕްރީމް ކޯޓުން ނެރެފައިވާ ވަގުތީ އަމުރުގައި ބުނެފައިވެއެވެ.

ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ކަނޑައެޅުމާ ގުޅޭގޮތުން ރައްޔިތުންގެ މަޖިލީހުގެ ގަވާއިދަށް ގެނައި އިސްލާހު ބާތިލުކުރުމަށް އެދި ބަންޑާރަނައިބުގެ އޮފީހުން ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅާފައިވަނީ ޖެނުއަރީ 28 ވަނަ ދުވަހުއެވެ.

އޭޖީން ހުށަހެޅި ދުސްތޫރީ މައްސަލަ:

މި މައްސަލައާ ގުޅޭގޮތުން ބަންޑާރަނައިބުގެ އޮފީހުން މީގެކުރިން ބުނެފައިވަނީ، ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ކަނޑައެޅުމާ ގުޅޭގޮތުން، ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާއަށް އިތުރުކޮށްފައިވާ (ކ)، (އ) އަދި (ވ) ގައި، "މަޖިލީހުގެ ޖުމްލަ މެންބަރުން" މި އިބާރާތަށް ދީފައިވާ މާނަކުރުމަކީ ޤާނޫނޫއަސާސީއާ ހިލާފަށް ދީފައިވާ މާނަކުރުމެއް ކަމަށެވެ.

ރައްޔިތުންގެ މަޖިލީހުގެ ގަވާއިދުގައި "މަޖިލީހުގެ ޖުމްލަ މެންބަރުން" މި އިބާރާތަށް އެ މަޖިލީހުން މިހާރު ދީފައިވާ މާނަކުރުމަކީ ޤާނޫނުއަސާސީގެ 71 ވަނަ މާއްދާގައި ބުނާ މަޖިލީހުގެ ޖުމްލަ އަދަދާ ޚިލާފު މާނަކުރުމެއް ކަމަށްވެސް ބަންޑާރަނައިބުގެ އޮފީހުން ބުނެފައިވެއެވެ. އަދި މިއީ ޤާނޫނުއަސާސީގެ މާއްދާތަކާ ތައާރުޟުވާ މާނަކުރުމެއް ކަމަށްވެސް ބުނެފައިވެއެވެ.

ރައްޔިތުންގެ މަޖިލީހުގެ ގަވައިދަށް ގެނައި އިސްލާހުގައި އެ ގަވާއިދުގެ 49 ވަނަ މާއްދާއަށް އިތުރު ކޮށްފައިވާ އަކުރުތަކުގައި ބުނެފައިވަނީ، މަޖިލީހުގެ ޖުމުލަ މެންބަރުންގެ އަދަދު ގުމުގައި ބަލާނީ އެވަގުތު މަޖިލީހުގެ މެންބަރުކަމުގައި ދެމިތިބި މެންބަރުންގެ ޖުމުލަ އަދަދަށް ކަމަށެވެ. އަދި ދާއިރާއެއްގެ ގޮނޑި ހުސްވެއްޖެނަމަ، އެ އިންތިހާބީ ދާއިރާއެއްގެ ގޮނޑިއަށް މެންބަރަކު އިންތިހާބުކުރުމާ ހަމައަށް، މަޖިލީހުގެ ޖުމުލަ މެންބަރުންގެ އަދަދު ގުނުމުގައި އެ ދާއިރާއެއް ނުގުނާނެ ކަމަށެވެ.