ކުރީ ސަރުކާރުގެ ގެދޮރުވެރިޔާ ސްކީމުން ފްލެޓް ދޭން ނިންމި ލިސްޓު ތަހުގީގު ކުރުމަށްފަހު ޝަރުތު ފުރިހަމަވާކަމަށް ކަނޑައެޅި މީހުންނަށް ފްލެޓް ދިނުން އަވަސް ކުރުމަށް ގޮވާލައި ގަލޮޅު އުތުރު ދާއިރާގެ މެމްބަރު އީވާ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފި އެވެ.
ގެދޮރުވެރިޔާ ސްކީމްގެ ދަށުން ކުރީ ސަރުކާރުން ފްލެޓް ދީފައިވާ 4000 މީހުންގެ މައްސަލަ ތަހުގީގު ކުރުމަށްފަހު އޭސީސީން ބުނެފައިވަނީ، ފްލެޓް ދިން 59.6 ޕަސެންޓް މީހުންނަކީ ޝަރުތު ހަމަނުވާ މީހުން ކަމުގައެވެ.
މިއަދު އީވާ މަޖިލީހަށް ހުށަހެޅި ގަރާރުގައި ބުނެފައިވަނީ، ދަތި ހާލުގައި އާއިލާ ބިނާ ކުރަމުންދާ މީހުންގެ ތަކުލީފުތަކަށް ހައްލެއް ހޯދައި ދިނުމަށް ކުރަން އޮތް އެންމެ މުހިންމު އެއް މަސައްކަތަކީ ޝަރުތު ހަމަވާ މީހުންނަށް ވީ އެންމެ އަވަހަކަށް ފްލެޓުތައް ދިނުމަށް ކަމުގައެވެ.
އެކި ސަބަބުތަކަށްޓަކައި ފްލެޓުތައް ދޫކުރުން މަސައްކަތް ލަސްވުމުގެ ސަބަބުން ފްލެޓޫގެ ހައްގުވެރިންނަށް ނުހަނު ގެއްލުން ލިބޭ. ފްލެޓުތަކުގައި ދިރިއުޅެވެން ދެން ކުލީގެ ގޮތުގައި އާމްދަނީއަށް ލިބޭ ބޮޑު އެއްޗެއް ހޭދަ ކުރަން ޖެހޭ. އާއިލާގެ ހުރިހާ މެމްބަރުންނާއެކު ކުދި ކުދި ތަންކޮޅުގައި އުޅެންޖެހިފައިވާ އެތައް އާއިލާއެއް އެބަ ތިބި.
އީވާ ހުށަހެޅި މައްސަލާގައިވެ އެވެ.
އޭސީސީގެ ތަހުގީގުން ނިންމާފައިވަނީ، ރައީސް ސާލިހުގެ ސަރުކާރުން ފްލެޓު ލިބޭނެ ކަމަށް ކަނޑައެޅި މީހުންގެ ތެރެއިން 60 ޕަސެންޓު މީހުންގެ ޝަރުތުހަމަނުވާ ކަމަށެވެ. އަދި ޝަރުތު ހަމަވާކަމަށް ނިންމި މީހުންގެ ތެރެއިންވެސް، 19.7 ޕަސެންޓު މީހުންގެ ފޯމުގައި މައްސަލަ ހުރި ކަމަށް އޭސީސީން ބުނެފައި ވެއެވެ. އެއްވެސް މައްސަަލައެއް ނެތީ 20 ޕަސެންޓު ފޯމުގަ އެވެ.
