ބީއެމްއެލްގެ ބޯޑުން ވަކިކުރި ދެ ޑައިރެކްޓަރަކު އަލުން ބޯޑަށް!

ބޭންކް އޮފް މޯލްޑިވްސް (ބީއެމްއެލް)ގެ ބޯޑުން ވަކިކުރި ބައެއް މެމްބަރުން އަލުން ބޯޑަށް ސަރުކާރުން އައްޔަންކޮށްފައިވާކަމަށް މައުލޫމާތު ލިބިއްޖެއެވެ.

މައުލޫމާތު ލިބިފައިވާ ގޮތުގައި މިދިޔަ ބުރާސްފަތި ދުވަހުގެ ރޭ ސަރުކާރުން ބޯޑު މެންބަރުކަމުން ވަކިކުރި ފަސް ބޭފުޅުންގެ ތެރެއިން، އަލުން މެމްބަރުކަމަށް އައްޔަން ކުރިކަމުގެ ލިޔުން މިހާތަނަށް ހަވާލު ކޮށްފައިވަނީ ދެ ބޭފުލަކަށެވެ.

އެނގިފައިވާ ގޮތުގައި، ބޯޑުގެ މެމްބަރުކަމުން ވަކިކުރި އިތުރު ބައެއް މެމްބަރުންވެސް ބޯޑަށް އައްޔަން ކުރާނެއެވެ. އެހެންނަަމެވެސް އެއީ ކޮންމެބަރުންނެއް ކަމެއް އަދި ސާފުވެފައެއް ނުވެއެވެ.

ބައެއް މަސްދަރުތަކުން އެގިފައިވާ ގޮތުގައި ބޯޑަށް އައްޔަން ކޮށްފައިވާ، ކުރިންވެސް ބޯޑުގައި ތިބި ދެމެމްބަރުންނަކީ،  އަބްދުﷲ ހަސަން އާއި އައިޝަތު ސަޖުނީ އެވެ. އެ ދެބޭފުޅުންނާ އެކީ މިހާރު ބޯޑުގައި ތިބީ ހަތް މެމްބަރުންނެވެ.

ބޭންކް އޮފް މޯލްޑިވްސް (ބީއެމްއެލް) ގެ ޗެއާމަން ހިމެނޭ ގޮތަށް އެ ކުންފުނީގެ ފަސް ނޮން އެގްޒެކެޓިވް ޑައިރެކްޓަރަކު ކުއްލި ގޮތަކަށް މަގާމުން ވަކިކުރި ނަމަވެސް ޚިދުމަތްތަކަށް ބުރޫ ނާރާނެކަމަށް އެ ބޭންކުން ބުނެފައި ވެއެވެ.

ސަރުކާރު ހިއްސާވާ، ދައުލަތުގެ ބޭންކު ކަމުގައިވާ ބީއެމްއެލް ބޯޑުގެ އެގްޒެކެޓިވް މެމްބަރުންގެ ތެރެއިން ފަސް މެމްބަރަކު ވަކި ކޮށްފައިވާ ކަން ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ) އިން ބީއެމްއެލް އަށް އަންގާފައިވަނީ އިއްޔެއެވެ. ބީއެމްއެލް ބޯޑުގައި އިއްބަވާ 10 މެންބަރުންގެ ތެރެއިން ވަކި ކޮށްފައިވަނީ ވަކިކުރެއްވީ ނޮން އެގްޒެކްޓިވް 5 މެންބަރުންނެވެ.

ބީއެމްއެލްގެ ޑިރެކްޓަރުގެ ބޯޑުން ވަކިކޮށްފައިވަނީ ޗެއާމަން ޔޫޝާއު ސައީދާއި ބޯޑު މެމްބަރުން ކަމަށްވާ ޖުވޭރިޔާ ސައީދާއި އަބްދުﷲ ހަސަނާއި އައިޝަތު ސަޖުނީ އާއި އަބްދުﷲ ހުޝާމު ޝަރީފެވެ.

10 މެންބަރުން ތިއްބަވާ ބީއެމްއެލް ބޯޑުން ވަކި ނުކުރައްވަނީ އެގްޒެކެޓިވް މެމްބަރުންގެ ގޮތުގައި ތިއްބެވި މެނޭޖިން ޑިރެކްޓަރު ކާލް ސްޓުމަކް އާއި އައިޝަތު ނޫރައްދީނެވެ. ދެން ތިއްބަވާނީ ހިއްސާދާރުންގެ ތެރެއިން އިންތިހާބުކޮށްފައިވާ ތިން މެމްބަރުންނެވެ. އެހެންކަމުން މިވަގުތު ބޯޑުގައި ތިއްބަވާނީ 5 މެންބަރުންނެވެ.