މާލޭ ސިޓީގެ މޭޔަރާއި، ތިން ކައުންސިލަރުން ހޮވުމަށް މިއަަދު ބާއްވާ ބައި-އިލެކްޝަންގައި ވީހާވެސް ގިނަ ރައްޔިތުން ވޯޓުލުމަށް ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނައިބު އައިޝަތު އާޒިމާ ޝުކޫރު މިއަދު ވިދާޅުވެއްޖެއެވެ.
ބައިލ އިލެކްޝަންގައި ވޯޓުލެއްވުމަށް ފަހު ނޫސްވެރިންނާ ވާހަކަ ދައްކަވަމުން އާޒިމާ ވިދާޅުވީ މާލޭގެ ރައްޔިތުންގެ ކިބައިން އެދިވަޑައިގަންނަވަނީ ވީހާވެސް އަވަހަށް ވޯޓުލުމަށް ނުކުމެވަޑައިގަތުމަށް ކަމަށެވެ. އަދި މިއީ ޑިމޮކްރެޓިކް ޕްރޮސެސް އެއް ކަން އާޒިމާ ފާހަގަ ކުރެއްވިއެވެ.
"އެހެންވީމަ، ރައްޔިތުންގެ ހައްގެއް އަދި ޒިންމާއެއް މިއީ. އެހެންވީމަ ރައްޔިތުންގެ ހައްގު އަދި ޒިންމާ އަދާކޮށް ދިނުމަށް އަޅުގަނޑު ހުރިހާ ބޭފުޅުންނަށް ދަންނަވަން. އަޅުގަނޑު އުންމީދަކީ ޑިމޮކްރެޓީކް މި ޕްރޮސެސްގައި ރައްޔިތުން ބައިވެރިވުން." އާޒިމާ ވިދާޅުވިއެވެ.
އާޒިމާ ވަނީ މިއަދުގެ އިންތިހާބު ކާމިޔާބު ވާނެ ކަމުގެ އުންމީދު އޮތް ކަމަށް ވެސް ވިދާޅުވެފައެވެ.
މާލޭގެ މޭޔަރުގެ ގޮނޑި ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރައީސް ކަމަށް އިންތިހާބުވެވަޑައިގެން، ވެރިކަމުގެ ހުވާ ކުރެއްވުމުންނެވެ. އަދި ސިޓީ ކައުންސިލްގެ ތިން ގޮނޑި ހުސްވީ އެ މަގާމުތަކުގައި ތިއްބެވި ބޭފުޅުން ސަރުކާރުގެ މަގާމުތަކަށް ވަޑައިގަތުމުންނެވެ.
މާލޭގެ މޭޔަރަކަށް ވާދަކުރައްވަނީ ވެރިކަންކުރާ ޕީއެންސީގެ ފަރާތުން ކުރީގެ ބަންޑާރަ ނައިބު އައިޝަތު އާޒިމާ ޝަކޫރާއި އިދިކޮޅު އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް އާއި ޑިމޮކްރެޓްސްގެ ފަރާތުން ކައުންސިލްުގެ ގަލޮޅު އުތުރު ދާއިރާގެ މެންބަރު ސައިފް ފާތިހް (އައިކޮ) އާއި އަމިއްލަ ގޮތުން ކުރީގެ ޕޮލިސް ކޮމިޝަނަރު ހުސެން ވަހީދާއި ޝުއައިބު އަލީއެވެ.
މާލޭގެ އެކި ދާއިރާތަކުން ވޯޓު ދިނުމުގެ ހައްގު 54،680 މީހަކަށް ލިބިފައިވެއެވެ. އަދި މާލެ ސަރަހައްދުގައި 54 ވޯޓު ފޮއްޓެއް ވަނީ ބަހައްޓައިފައެވެ.
