ޒުވާނުންނަށް ޚުޡުބާ ކިއުމަށް ހުޅުވާލުމާއެކު، 100 ޒުވާނުން ޚުޡުބާ ކިއުމުގެ ފުރުސަތަށް އެދިއްޖެއެވެ.
އެއަށް ފަހު އިންޝާ ﷲ މި ޒުވާނުން މިންވަރުތަކުން ފެނިގެންދާނެ. ރޯދަ މަހުގެ ކުރުން މިހުރިހައިކަމެއް ނިމޭނެ.
ހަތީބުންނަށް ފުރުސަތު ދިނުމުގައި އިސްލާމިކް މިނިސްޓްރީން އަމަލު ކުރުމަށް ނިންމާފައިވާ ގޮތަކީ، ޚުޡުބާ ކިއުމުގެ ހުއްދައަށް ކުރިމަތިލާފައިވާ މީހުންގެ އިންޓަވިއު މާލޭގައި ނަމަ އެމީހަކު ހާޒިރުވެގެން އިންޓަރވިއު ބާއްވާ ގޮތަށެވެ. އަދި ރަށުގައި އެމީހަކު ހުރިނަމަ އިންޓަވިއު ބާއްވާނީ އޮންލައިންކޮށެވެ.
އިންޓަވިއުގައި ކުރިއަށްދާނީ ގުރުއާން ކިޔެވުމާއި އަޑު އެހުމުގެ ބައިތަކެވެ. އަދި އިސްލާމިކް މިނިސްޓްރީގެ ވެބްސައިޓުގައި އާންމުކޮށްފައިވާ ހުތުބާތަކުން، އެމީހަކު އިހްތިޔާރު ކުރާ ހުތުބާއެއް އަޑުއެހުމަށްފަހު ހުއްދަ ދޭނެއެވެ. ހުއްދަ ދެވޭ މީހުންނަށް ޚާއްސަ ތަމްރީނެއް ދިނުމަށް ވުޒާރާ އިން ވަނީ ނިންމާފައެވެ.
އިސްލާމިކް މިނިސްޓްރީން ބުނެފައިވަނީ، އިމާމްކަމުގެ ތަމްރީނު ކުރިއަށްދާނީ އަތޮޅުތަކުގައ އުޅޭ މީހުންނަށް އަތޮޅުތަކުގައި ކަމަށެވެ. އަދި މާލެ ސަރަހައްދުގައި އުޅޭމީހުންނަށް މާލޭގައި ތަމްރީންތައް ކުރިއަށް ގެންދާ ގޮތަށްވެސް ވަނީ ހަމަޖެހިފައެވެ. އެގޮތުން ތަމްރީނު ދެވޭނީ މޮސްކް މެނޭޖްމަންޓް، ހުތުބާ ކިޔުމުގެ ފަންނު، ޖަނާޒާގެ ކަންކަން، އިމާމުގެ އަހުލާގު، މިސްކިތުގެ ދައުރު، ނަމާދު ފިގުހަށެވެ. މި ތަމްރީނުތަކަށްފަހު އިމްތިހާނެއް ނޯންނާނެ ކަމަށް ވެސް ވުޒާރާ އިން ބުންޏެވެ.
ގްރޭޑް 10،11،12 ނިންމާފައިވާ ދަރިވަރުންނަށް އިމާމުވެ ހުކުރުކޮށް، ހުތުބާ ކިއުމުގެ ހުއްދަ ދެން އިސްލާމީ ކަންތައްތަކާއި ބެހޭ އެންމެ މަތީ ވުޒާރާ އިން ނިންމީ ޒުވާން އިމާމުންނާއި ހަތީބުންނަށް ފުރުސަތު ފަހިކޮށްދިނުމުގެ ގޮތުންނެވެ.
