ޖަޕާނަށް އައި ބިންހެލުމާ ގުޅިގެން ރާއްޖެ އަށް ނުރައްކަލެއް ނެތް ކަމަށް ރާއްޖޭގެ މޫސުމާ ބެހޭ ގައުމީ އިދާރާ އިން ބުނެފިއެވެ.
ރާއްޖޭގެ މެޓް އޮފީހުން ވިދާޅުވީ، ޖަޕާނުގެ ހޮންޝޫގެ ހުޅަނގު އައްސޭރި ފަށަށް އައި ބިންހެލުމާއި ގުޅިގެން ރާއްޖެއަށް އެއްވެސް ނުރައްކަލެއް ނެތް ކަމަށެވެ. ޖަޕާނަށް 7.6 ބާރުމިނުގެ ބާރުގަދަ ބިންހެލުމެއް އައިސް، ސުނާމީގެ އިންޒާރު ދިންތާ މާ ގިނަ އިރުތަކެއް ނުވަނީސް އެ ގައުމަށް ވަނީ ސުނާމީގެ ރާޅުތައް އަރަން ފަށައިފައެވެ.
އޭގެއިތުރުން ރަޝިއާ އާއި އުތުރު ކޮރެއާ އާއި ދެކުނު ކޮރެއާ އަށް ސުނާމީ އަރާފާނެ ކަމުގެ އިންޒާރު ދީފައި ވަނިކޮށް ދެކުނު ކޮރެއާ އަށް ވަނީ ކުޑަ ސުނާމީއެއް ވެސް އަރައިފައެވެ. ޖަޕާނަށް އައި ބިންހެލުމާ ގުޅިގެން މަރުވި މީހުންނާއި ޒަހަމްވި މީހުންގެ އަދަދު އަދި ސާފެއް ނުވެއެވެ.
އެކަމަކު، ބިންހެލުމާ ގުޅިގެން ޖަޕާންގެ ބައެއް ސަރަހައްދުތަކަށް ބޮޑެތި ގެއްލުންތަކެއް ލިބިފައިވެއެވެ. އެގޮތުން މަގުތައް ހަލާކުވެ، އިމާރާތްތައް ވެއްޓިފައިވާ ކަމަށްވެއެވެ. އަދި އިމާރާތްތަކުގެ ދަށުގައި ބައެއް މީހުން ތިބި ކަމުގެ ރިޕޯޓު ވެސް މިހާރު ދަނީ ލިބެމުންނެވެ.
ޖަޕާން ސަރުކާރުގެ ތަރުޖަމާން ޔޮޝިމާ ހަޔާޝީ ވިދާޅުވެފައިވަނީ ބިންހެލުން އައި ސަރަހައްދުގައި ހުރި ނިއުކުލިއަރ ޕްލާންޓަށް މި ބިންހެލުމުގެ ސަބަބުން އަސު ކޮށްފައިވާކަމަށް އަދި ބެލެވިފައި ނުވާކަމުގައެވެ.
ޖަޕާންގެ އެންއެޗްކޭ ބްރޯޑްލާސްޓަރއިން ރިޕޯޓު ކޮށްފައިވާ ގޮތުގައި 3 މީޓަރު އުސް ސުނާމީ ޖަޕާންގެ ނިގާތާ ޕްރީފެކްޗަރގެ އިތުރުން ހުޅަނގު އައްސޭރީގެ ޕްރީފެކްޗަރ ތަކަށް އަރާނެކަމަށް ލަފައިވާކަމަށެވެ.
