ރައީސް އޮފީހުގެ އިސް ތަރުޖަމާނުގެ މަގާމުގައި ހުންނެވި މުހައްމަދު ޝަހީބު ފޮރިން މިނިސްޓްރީއަށް ބަދަލު ކޮށްފިއެވެ.
ޝަހީބު ސަރުކާރުގެ ތަރުޖަމާންކަމުން ރަސްމީކޮށް ވަކިކޮށްފައިވާކަން ސަރުކާރުން ހާމަކޮށްފައި ނުވިނަމަވެސް، ރައީސް އޮފީހުގެ ވެބްސައިޓުގައި ވާގޮތުން ޝަހީބު މިހާރު ހުންނެވި މަގާމަކީ މިނިސްޓަރ އޮފް ސްޓޭޓް ފޮރ ފޮރިން އެފެއާޒްގެ މަގާމެވެ.
ރައީސް މުއިއްޒު ރައީސް ކަމާއި ހަވާލުވެވަޑައިގެންނެވުމަށްފަހު ސަރުކާރުގެ ރަސްމީ ތަރުޖަމާނަކު އައްޔަން ނުކޮށް ގިނަ ދުވަސް ފާއިތުވެގެންދާތީ ގިނަ ބައެއްގެ ފާޑުކިއުން ސަރުކާރަށް އަމާޒުވެފައި ވަނިކޮށް، ސަރުކާރުގެ ރަސްމީ ތަރުޖަމާނަކަށް ޝަހީބު ހަމަޖެއްސެވީ ނިމިދިޔަ ޑިސެމްބަރުމަހުގެ 13 ވަނަ ދުވަހުއެވެ.
އެހެންނަމަވެސް ޝަހީބު އެމަގާމަށް އައްޔަން ކުރެއްވުމަށްފަހު، ބައެއް ނޫސްކޮންފަރެންސްތައް ކުރިޔަށް ގެންދާގޮތާމެދު ބައެއް ފަރާތްތަކުން ވަނީ ޝަކުވާ ކޮށްފައެވެ. އަދި ބައެއް ނޫސްވެރިންވަނީ އެކަމުގެ ހިންހަމަނުޖެހުން ފާޅުވެސް ކޮށްފައެވެ. އެއަށްފަހު ބައެއް ޕްރެސްތަކަށް ޝަހީބު ނޫން އެހެން ބައެއް ބޭފުޅުންވެސް ސަރުކާރުގެ ފަރާތުން އަރުއްވާފައި ވެއެވެ.
އެހެންނަމަވެސް ޝަހީބު ފޮރިން މިނިސްޓްރިއަށް ބަދަލުކުރި ވަކި ސަބަބައެެއް ސަރުކާރުން ހާމަކޮށްފައެއް ނުވެއެވެ.
