މި ސަރުކާރުގެ ވަޒީރުންނަށް ރުހުން ނުދީ، ދައުރު ނިންމާ މަޖިލިސް ޗުއްޓީއަށް ގޮސްފައި ވަނިކޮށް، ވަޒީރުންނަށް ރުހުން ދިނުމުގެ މައްސަލަ ތާވަލްކޮށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުމެއް މާދަމާއަށް އެޖެންޑާ ކޮށްފިއެވެ.
މި ދައުރުގެ މަސައްކަތްތައް ނިންމާ މަޖިލިސް ޗުއްޓީއަށް ދިޔައިރު އަދިވެސް ވަޒީރުންނަށް ރުހުން ދިނުން އޮތީ ކޮމިޓީ މަރުހަލާގައެވެ.
ވަޒީރުންނަށް ރުހުން ދިނުން މިމަހުގެ 18 ވަނަ ދުވަހަށް މަޖިލީހުގައި އެޖެންޑާ ކުރެވުނު ނަމަވެސް، ވަޒީރުންގެ މަޖިލިހަށް ރުހުން ހޯދުމަށް ރައްޔިތުންގެ މަޖިލިހުގެ ކޮމިޓީން މަޖިލިހުގެ ތަޅުމަށް ފޮނުވި ރިޕޯޓު ފުރިހަމަ ނުވާކަމަށް ނިންމާ، ރިޕޯޓު އެޖެންޑާއިން އުނިކޮށް އަލުން އިސްލާހު ކުރުމަށް ވަނީ ކޮމިޓީއަށް ފޮނުވާފައެވެ.
މިގޮތުން، މާދަމާއަށް ތާވަލުކޮށްފައިވާ ކޮމިޓީ ބައްދަލުވުމުގެ އެޖެންޑާގައި އޮތީ ވަޒީރުންގެ މަޖިލީހުގެ 22 ވަޒީރުންނަށް ރުހުން ދިނުމުގެ މައްސަލައާ ގުޅޭގޮތުން ކޮމިޓީން ނިންމައި، މަޖިލިސް ތަޅުމަށް ފޮނުވި ރިޕޯޓު އަނބުރާ ކޮމިޓީއަށް ފޮނުވާފައިވާތީ، އެ ރިޕޯޓާ މެދު ގޮތެއް ނިންމުމެވެ.
މި ކޮމިޓީގެ ބައްދަލުވުމެއް މާދަމާ ބޭއްވުމަށް ނިންމާފައިވާއިރު، ކުރިން އެމްޑީޕީގައި ތިއްބެވި 12 މެމްބަރަކު ކޮންގްރެސް ޕާޓީއާއި ގުޅުމާއި ގުޅިގެން، އެކޮމިޓީގައި އެމްޑީޕީއަށް އޮތް މެޖޯރިޓީ މިހާރު ވަނީ ގެއްލިފައެވެ.
މަޖިލީހުގެ ގަވާއިދު ބުނާ ގޮތުން ޑިސެމްބަރު މަހު މަޖިލިސް ޗުއްޓީއަށްދާނެއެވެ. ނަމަވެސް މި ސަރުކާރުގެ ވަޒީރުންނަށް ރުހުން ނުދީ ދިގުދަންމާލާފައިވާތީ މަޖިލީހުގެ ދައުރު ނިމުންވެސް ވަނީ 3 ފަހަރެއްގެ މަތިން ދިގުދަންމާލާފައެވެ. އިއްޔެ ބޭއްވުނު ދައުރުގެ އެން،މެ ފަހު ޖަލްސާގައި މަޖިލިސް ރައީސް އަސްލަމް ވިދާޅުވީ މެމްބަރުން ބޭނުންފުޅުވާނަމަ ވަޒީރުންނަށް ރުހުން ދިނުމަށް ދައުރުން ބޭރު ޖަލްސާއެއް ބޭއްވިދާނެ ކަމުގައެވެ.
