މީޑިއާތަކަށް ދައުލަތުގެ ނިޒާމުގެ ތެރެއިން ފައިސާ ހޯދައިދިނުމުގެ އިތުރުން މިސަރުކާރުން އެކުލަވާލުމަށް ނިންމާފައިވާ މީޑިޔާ ވިލެޖެއް އެކުލަވާލުމުގެ މަސައްކަތް ފެށުމަށް ތައްޔާރީތައް ވަމުންދާ ކަމަށް ރައީސް އޮފީހުން ވިދާޅުވެއްޖެއެވެ.
މިކަން ހާމަ ކޮށްފައިވަނީ، އިއްޔެ ބޭއްވުނު ކެބިނެޓް ބައްދަލުވުމުން ނިންމުންތައް ހާމަ ކުރައްވަމުން މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ރައީސް އޮފީހުގެ މިނިސް ނާޒިމްއެވެ.
ނާޒިމް ވިދާޅުވީ މީޑިއާތަކަށް ދައުލަތުގެ ނިޒާމުގެ ތެރެއިން ފައިސާ ހޯދާ ދިނުމުގެ ބަޖެޓުން މީޑިއާތަކަށް ފައިސާ ފޯރުކޮށްދިނުމަށްވެސް ކެބިނެޓްގައި މަޝްވަރާ ކުރެވުނު ކަމަށެވެ. އޭގެ އިތުރުން މީޑިއާ ވިލެޖް އެކުލަވާލުމަށް ކުރާންޖެހޭ މަސައްކަތްތައް މިހާރު މިހާރަށް ފެށުމަށް ނިންމާފައިވާކަމަށްވެސް އޭނާ ވިދާޅުވިއެވެ. އޭގެ ތެރޭގައި އެކަމަށް ބޭނުންވާ ބިމެއް ހޯދާ ބިން ޔުޓިލައިޒް ކުރުމާއި، އެ މަޝްރޫއު ފެށުމުތެ ތައްޔާރީތައް ކެބިނެޓުގައި މަޝްވަރާކޮށް ނިންމާފައިވާކަމަށްވެސް ނާޒިމް ވިދާޅުވިއެވެ.
މީޑީޔާތަކަށް ދައުލަތުން އެހީތެރިވުމުގެ ގޮތުން ހުށަހެޅުނު ކަރުދާހަށް މަޝްވަރާކޮށް، ހާއްސަކޮށް މީޑިޔާތަކަށް ދައުލަތުގެ ނިޒާމުގެ ތެރެއިން ފައިސާ ހޯދައިދިނުމާއި ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާކޮށް ނިންމުނު އެންމެ މުހިންމު ނިންމުމަކީ މީޑިޔާ ވިލެޖެއް އެކުލަވާލުމަށްޓަކައި ކުރަންޖެހޭ މަސައްކަތް ކަމާއިބެހޭ ފަރާތްކާއި ގުޅިގެން ކުރިޔަށް ގެންދިޔުން.
ނާޒިމް ވިދާޅުވިއެވެ.
މީޑީއާތައް ހިންގުމަށް ދައުލަތުން ފައިސާގެ އެހީތެރިކަން ފޯރުކޮށްދިނުމަށް ރައީސް މުއިއްޒު ވަނީ މީގެ ކުރިން ނިންމާފައެވެ. މި އަހަރުގެ ބާކީ ހަރަދުތައް ހަމަޖެއްސުމަށް ރައްޔިތުންގެ މަޖިލިހަށް ހުށަހެޅި 6.5 ބިލިއަން ރުފިޔާގެ ބަޖެޓުގައިވެސް މީޑިއާތަކަށް 6.5 މިލިއަން ރުފިޔާ ވަނީ ހިމަނާފައެވެ.
އެހެންނަނަމަވެސް އެ ފައިސާ ފޯރުކޮށްދޭނޭ ގޮތުގެ ތަފްސީލެއް އަދި ރައީސް އޮފީހުން ހާމަކޮށްފައެއް ނުވެއެވެ.
