ކުރީގެ ޓޫރިޒަމް މިނިސްޓަރު އަލީ ވަހީދު، ރައްޔިތުންގެ މަޖިލިހުގެ ކުޅުދުއްފުށީ ދެކުނު ދާއިރާގެ ގޮނޑިއަށް ވާދަކުރައްވާނެކަން އިއުލާން ކުރައްވައިފިއެވެ.
އަލީ ވަހީދު ކުޅުދުއްފުށީ ދެކުނު ދާއިރާގެ ގޮނޑިއަށް ވާދަކުރައްވާނެކަން އިއުލާން ކުރެއްވީ "އެކްސް" ގައި މިއަދު ކުރެއްވި ޕޯސްޓެއްގައެވެ. އޭނާ ވިދާޅުވީ ކުޅުދުއްފުއްޓަށް ހައްގު، އިންގިލާބީ ބޮޑު ބަދަލު ހޯދުމަށްޓަކައި ސިޔާސީ ބާރުވެރި ފުދުންތެރި ބޮޑު ތިލަދުންމައްޗަކަށް އަމާޒު ހިފުމަށް، 20 ވަނަ މަޖިލީހުގެ ކުޅުދުއްފުށީ ދެކުނު ދާއިރާއަށް ނިންމާފައިވާ ކަމަށެވެ.
އަލީ ވަހީދު ވަނީ ކުޅުދުއްފުށީ ދެކުނު ދާއިރާގެ ތާއީދަށް ވެސް އެދިވަޑައިގެންފައެވެ.
މިދިޔަ ރިޔާސީ އިންތިހާބުގެ ތެރޭގައި އަލީ ވަހީދު މަސައްކަތް ކުރެއްވީ ޖުމްހޫރީ ޕާޓީ (ޖޭޕީ) އާ އެކުގައި އެ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ ކެމްޕެއިން އެޖެންޓެއްގެ ގޮތުގައެވެ. ރިޔާސީ އިންތިހާބުގެ ދެވަނަ ބުރުގައި އަލީ ވަހީދު ވަކިކޮޅެއް ނަންގަވާފައެއް ނުވެއެވެ.
ރިޔާސީ އިންތިހާބަށް ފަހު ޖުމްހޫރީ ޕާޓީން ވަކިވެވަޑައިގެން މާ ގިނަ ދުވަސްތަކެއް ނުވެ، އަލީ ވަހީދު ވަނީ އެމްޑީޕީއާ ގުޅިވަޑައިގެންފައެވެ. އެހެންވެ، އޭނާ މަސައްކަތް ކުރައްވާނީ ކުޅުދުއްފުށީ ދެކުނު ދާއިރާގެ ގޮނޑި އަށް އެމްޑީޕީގެ ޓިކެޓުގައި ވާދަކުރެއްވުމަށެވެ.
ކުޅުދުއްފުއްޓަށް ނިސްބަތްވެވަޑައިގަންނަވާ އަލީ ވަހީދު މީގެކުރިން ވަނީ މަޖިލިހުގެ ތޮއްޑޫ ދާއިރާގެ މެމްބަރު ކަން ވެސް ކުރައްވައިފައެވެ. އެ ފަހަރު އޭނާ އެގޮނޑިއަށް އިންތިހާބުވެވަޑައިގެންނެވީ ޑީއާރުޕީގެ ޓިކެޓުގައެވެ. އެކަމަކު ފަހުން އޭނާ ވަނީ އެމްޑީޕީ އާ ގުޅިވަޑައިގެންފައެވެ.
ރައްޔިތުންގެ މަޖިލިހުގެ ކުޅުދުއްފުށީ ދެކުނު ދާއިރާގެ މިހާރުގެ މެމްބަރަކީ ޖަމްޝީދު މުހައްމަދެވެ. ނަމަވެސް ކުރިއަށް އޮތް އިންތިހާބުގައި އެމްޑީޕީގެ އެ މެމްބަރު ވާދަކުރައްވަން ޖަމްޝީދު ނިންމެވިކަމެއް އަދި ސާފެއް ނޫނެވެ.
