ޕޮލިސް ކޮމިޝަނަރުގެ މަގާމަށް އެސިސްޓެންޓް ކޮމިޝަނަރު އަލީ ޝުޖާއު އާއި އެސިސްޓެންޓް ކޮމިޝަނަރު އިސްމާއިލް ނަވީން ކުރިމަތިލައްވައިފި އެވެ.
ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ ޕޮލިސް ކޮމިޝަނަރުގެ މަގާމަށް ހުށަހެޅުއްވުމުގެ މުއްދަތު މިއަދުގެ މެންދުރު 12 އަށް ހަމަވިއިރު ފޯމު ހުށަހެޅުއްވީ އޭސީޕީ ޝުޖާއު އާއި ނަވީން ކަމަށެވެ. އެހެންވެ، އެ ދެ އަދި އޭނާ ވިދާޅުވި ގޮތުގައި ދެބޭފުޅުންގެ ނަންވެސް މިހާރުވަނީ ޕޮލިސް ބޯޑަށް ފޮނުވާފައެވެ.
އޭނާ ވިދާޅުވީ ކޮމިޝަނަރުކަމަށް ބޭފުޅަކު އައްޔަން ކުރާނީ ޕޮލިސް ބޯޑުން ކުރިޔަށް ގެންދާންޖެހޭ ޕްރޮސެސް ކުރިޔަށް ގެންދިއުމށްފަހު ކަމަށެވެ.
ފުލުުހުންގެ ހިދުމަތުގެ ގާނޫނު ބުނާގޮތުން ޕޮލިސް ކޮމިޝަނަރު ކަމަށް އައްޔަން ކުރެވޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ. އަދި އެގާނޫނުގައި ބުނާގޮތުން ޕޮލިސް ކޮމިޝަނަރުކަމަށް އައްޔަން ކުރާނީ އެ މަގާމަށް ކުރިމަތިލާ ބޭފުޅުންގެ ތެރެއިން ޕޮލިސް ބޯޑުން އިންޓަވިއުކޮށް، ގާބިލްކަން ވަޒަން ކުރުމަށް ފަހު ހޮވޭ ބޭފުޅެކެވެ.
އަދި މަގާމަށް ބޭފުޅަކު ކަނޑައަޅާނީ، ޕޮލިސް ބޯޑުން ވަޒަން ކުރުމަށްފަހު، އެ ބޯޑުން މިނިސްޓަރަށް ހުށަހަޅާ ނަންތަކުގެ ތެރެއިން، އަދި މިނިސްޓަރުގެ ލަފާގެމަތިން ރައީސުލްޖުމްހޫރިއްޔާއެވެ.
ޕޮލިސް ކޮމިޝަނަރުގެ މަގާމު މިދިޔަ ނޮވެމްބަރު މަހުގެ 15 އިން ފެށިގެން ހުސްވީ އެ މަގާމުގައި ހުންނެވި މުހައްމަދު ހަމީދު ފުލުހުންގެ ހިދުމަތުން އެ ދުވަހު ރިޓަޔާ ކުރެއްވުމުންނެވެ. އެހެންވެ، އެކްޓިން ކޮމިޝަނަރުގެ މަގާމު މިހާރު ފުރުއްވަނީ އެސިސްޓެންޓް ކޮމިޝަނަރު ފަރުހާދު ފިކުރީ އެވެ.
ކޮމެންޓު ފޮނުވާ