އެކި މައްސަލަތަކުގައި ފުލުހުންގެ ބެލުމުގެދަށަށް ގެނެސްފައިވާ ތަކެތީގެ ތެރެއިން، ގއ. ވިލިނގިލި އަދި ދ. ކުޑަހުވަދޫ ޕޮލިސް ސްޓޭޝަނުގެ ބެލުމުގެ ދަށުގައިހުރި ބަނގުރާ ނައްތާލައިފިއެވެ.
ބަނގުރާ ނައްތާލާފައިވަނީ ފުލުހުންގެ ބެލުމުގެދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުންނެވެ.
އެގޮތުން، ވިލިނގިލި ޕޮލިސް ސްޓޭޝަނުން ޑިސެމްބަރު 14 ވަނަ ދުވަހު ނައްތާލާފައިވަނީ 100 ފުޅި ބަނގުރަލާއި 40 ދަޅު ބަނގުރަލެވެ.
މިތަކެއްޗަކީ މި އަހަރުގެ ނޮވެމްބަރު މަހުގެ 1 އިން ޑިސެމްބަރު 2 އަށް ކޫއްޑޫ އެއާޕޯޓަށް ފުރަންދިޔަ ފަތުރުވެރިންގެ އަތުން އެއާޕޯޓުގެ އޭވިއޭޝަން ސެކިއުރިޓީން ހިފަހައްޓައި ފުލުހުންނާ ހަވާލުކޮށްފައިވާ ތަކެއްޗެވެ.
ކުޑަހުވަދޫ ޕޮލިސް ސްޓޭޝަނުން ޑިސެމްބަރު 14 ވަނަ ދުވަހު ނައްތާލާފައިވަނީ 58 ފުޅި ބަނގުރަލާއި 166 ދަޅު ބަނގުރަލެވެ.
މިތަކެއްޗަކީ އެޕްރީލް 2022 އިން ފެށިގެން މި އަހަރުގެ ސެޕްޓެމްބަރު މަހުގެ 1 އިން ޑިސެމްބަރު 2 އަށް ދާލު އެއާޕޯޓަށް ފުރަންދިޔަ ފަތުރުވެރިންގެ އަތުން އެއާޕޯޓުގެ އޭވިއޭޝަން ސެކިއުރިޓީން ހިފަހައްޓައި ފުލުހުންނާ ހަވާލުކޮށްފައިވާ ތަކެއްޗެވެ.
ކޮމެންޓު ފޮނުވާ