ގިނަ ބަޔަކު އިންތިޒާރު ކުރަމުން އަންނަ ފިލްމް "ޑަންކީ" ގެ ޕްރޮމޯޝަނަލް ލަވަ "އޯ މާހީ" އާންމުންނަށް ދޫކޮށްލައިފި އެވެ.
މިދިއަ ހަފްތާގައި ޓްރެއިލާ ވެސް ދައްކައިލައިފައިވާ މި ފިލްމްގެ ޕްރޮމޯޝަނަލް ލަވަ ދައްކައިލި އިރުގައި މި ލަވައިން ފެނިގެންދަނީ ފިލްމްގެ ލީޑުން ފެނިގެންދާ ޝާހުރުކް ހާން އާއި ތާޕްސީ ޕައްނޫއެވެ.
ޕްރިތަމް މިއުޒިކް ހަދާފައިވާ ލަވަ ކިޔާފައި ވަނީ އަރިޖިތު ސިންގް ރަން އަޑުންނެވެ. ފިލްމުގެ ޕްރޮމޯޝަނަލް ލަވަ އާންމުކުރި އިރު، ތާޕްސީ މި ވަގުތު ހުރީ ޗުއްޓީ އަށް ރާއްޖޭގަ އެވެ.
"ޑަންކީ" އަކީ ކުޅަދާނަ ޑައިރެކްޓަރު ރާޖްކުމާރު ހިރާނީ ހަދާފައިވާ ސޯޝަލް ކޮމެޑީއެކެވެ. އޭނަ އަކީ "ސަންޖޫ" އާއި "ޕީކޭ" އާއި "3 އިޑިއަޓްސް" އަދި "މުންނާއީބާއީ" ގެނެސްދިން ޑައިރެކްޓަރެވެ.
މި މަހުގެ 21 ގައި ރިލީޒްކުރަން ހަމަޖެހިވާ "ޑަންކީ" އަކީ ހިޖުރަކުރުމާ ގުޅޭ ގޮތުން ހަދާފައިވާ ކޮމެޑީ ޑްރާމާއެކެވެ. މީގެ ކާސްޓްގައި ވިކީ ކޯޝަލް، ބޮމަން އިރާނީ، ސަތިޝް ޝާހް، ދިއާ މިރުޒާ އަދި ދަރުމެންދުރާ ހިމެނެ އެވެ.
