މިދިޔަ ސަރުކާރު ނިމެން ކައިރިވެފައިވަނިކޮށް ސިޓީއެއްގެ ދަރަޖަ ދީފައިވާ ތިނަދޫ ގުތުން ސިޓީ ކައުންސިލަށް ބަދަލުކޮށް، ސިޓީ ކައުންސިލަކަށް ދޭންޖެހޭ ފުރިހަމަ ދަރަޖައާއި ހައިސިއްޔަތު ދިނުމަސް ދައުލަތުގެ މުއައްސަސާތަކަށް އަންގަން ރައްޔިތުންގެ މަޖިލީހުގެ ލާމަރުކަޒީ ކޮމިޓީން ނިންމައިފިއެވެ.
މިދިޔަ ސަރުކާރުގައި ރައީސް ޞާލިޙް ވަނީ ރިޔާސީ ކެމްޕެއިންގެ ތެރެއިން ތިނަދުއަށް ވަޑައިގެން ކެމްޕެއިން އިވެންޓެއްގައި، އެރަށަށް ސިޓީއެއްގެ ދަރަޖަ ދެއްވާފައިވާކަން އިއުލާންކުރައްވާފައެވެ. ނަމަވެސް ޤާނޫނީގޮތުން ފުރިހަމަވާންޖެހޭ ގިނަ ކަންތައްތަކެއް ފުރިހަމަނުވާކަމަށް ބައެއް ޤާނޫނީ ބޭފުޅުން އަންނަނީ ވިދާޅުވަމުންނެވެ. އަދި ތިނަދޫ ކައުންސިލްވެސް ސިޓީ ކައުންސިލަކަށް ބަދަލުވެފައެއް ނުވެއެވެ.
މިކަމާއި ގުޅިގެން ތިނަދޫ ކައުންސިލުން ވަނީ އެކި އިދާރާތަކުން އެ ކައުންސިލަށް އެކި ގޮތްގޮތަށް އެޑްރެސް ކުރާ މައްސަލަ އާއި ބަޖެޓާއި މެންބަރުންގެ މުސާރައާއި، އެނޫންވެސް ގިނަ ޚިދުމަތްތަކެއް ދިނުމުގައި ޚިލާފްތަކެއް އުޅޭކަމަށް ބުނެ މަޖިލީހަށް ސިޓީއެއް ފޮނުވާފައެވެ.
މިއާއެކު ކަމާގުޅުންހުރި ފަރާތްތަކާ ބައްދަލުކުރުމަށްފަހު ކޮމިޓީން ވަނީ ނަދޫގެ މިހާރުގެ ކައުންސިލް ވަގުތުން ސިޓީ ކައުންސިލަކަށް ބަދަލުވެފައިވާކަން ބަޔާންކޮށް ކަންތައްތަކެއް ފާހަގަކޮށްފައެވެ.
މިގޮތުން ކޮމިޓީން ނިންމި ރިޕޯޓްގައި ފާހަގަކޮށްފައިވާ ކަންކަމުގެ ތެރޭގައި ތިނަދޫ ކައުންސިލާ މުހާތަބު ކުރާނީ ސިޓީއެއް ގޮތުގައިކަމަށް ބުނެފައިވެއެވެ. އަދި ރަށު ކައުންސިލުން ދައުރު ހަމަވަންދެން އެ ސިޓީ ކައުންސިލް ހިންގަން ޖެހޭނެކމަށާއި، ދައުރުގެ މެދު ތެރެއިން ސިޓީއެއްގެ ދަރަޖަ ލިބިއްޖެނަމަ އެ ކައުންސިލްގެ ހައިސިއްޔަތު ސިޓީއެއްގެ ދަރަޖައަށް ބަދަލުވާނެކަމަށްވެސް ބުނެފައިވެއެވެ.
މީގެ އިތުރުން ށު ކައުންސިލު އުވި ސިޓީ ކައުންސިލަށް ލިބޭ ހުރިހާ ބާރުތަކެއް ތިނަދޫ ސިޓީ ކައުންސިލަށް ލިބެންޖެހޭކަމަށްވެސް ބުނެފައިވެއެވެ.
އެގޮތަށް ފާސްކުރީ ކޮމިޓީގައި ބައިވެރިވެވޑައިގެންނެވި މެންބަރުންގެ އިއްތިފާގުންނެވެ.
