ރައީސް ޑރ. މުހައްމަދު މުއިއްޒުގެ ކެބިނެޓަށް އައްޔަނުކުރައްވާފައިވާ 22 ވަޒީރުންވެސް ވަޒީރު ކަމުގެ ޝަރުތު ހަމަވާކަމަށް ނިންމާ ހުރިހާ ވަޒީރުންނަށްވެސް ތަޅުމުގައި ވަކިވަކިން ވޯޓަށް އަހައިގެން ރުހުން ދޭން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ނިންމައިފި އެވެ.
މިއަދުގެ ކޮމިޓީގެ ބައްދަލުވުމިގައި، މުގައްރިރު އަދި މާފަންނު ހުނޅަގު ދާއިރާގެ މެމްބަރު މުހައްމަދު ފަލާހް ވިދާޅުވީ މުއިއްޒުގެ ކެބިނެޓްގައި ހިމެނޭ ޕަބްލިކް ވާކްސް މިނިސްޓަރަށް އައްޔަނުކުރެއްވި ޑރ. އަލީ ހައިދަރާއި ހަޔާ އެޑިޔުކޭޝަން މިނިސްޓަރު ޑރ. މަރިޔަމް މާރިޔާއާއި ދެބޭފުޅުންގެވެސް އެހެން ގައުމެއްގެ ރައްޔިތުކަން އޮތްތޯ ކޮމިޓީން ބަލާފައިވާ ކަމުގައެވެ.
އޭނާ ވިދާޅުވީ ދެބޭފުޅުންވެސް ވަޒީރުކަމަށް އައްޔަން ކުރެއްވުމުގެ ކުރިން ގައުމުން ބޭރުގެ ރައްޔިތުކަން ދޫކޮށްލައްވާފަ ވާކަމުގައެވެ.
އަދި ކޮމިޓީގެ މެމްބަރު އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވީ ކަމާއި ގުޅުންހުރި ހުރިހާ އިދާރާތަކުންވެސް ހޯދާފައިވާ މައުލޫމާތުތަކުން އެނގޭގޮތުގައި ހުރިހާ ވަޒީރުންގެސް ވަޒީރުކަމުގެ ގާނޫނީ ޝަރުތު ފުރިހަމަވާ ކަމުގައެވެ. އަދި އޭނާ ހުށަހެޅުއްވީ ކޮންމެ ވަޒީރަކަށްވެސް ވަކިން ވޯޓަށް އަހައިގެން ރުހުން ހޯދުމަށެވެ.
ޝިފާއުގެ ހުށަހެޅުން ފާސްކޮށްފައިވަނީ ކޮމިޓީގެ މެމްބަރުންގެ އިއްތިފާގުންނެވެ.
އަންނަ ހަފްތާގައި ކެބިނެޓަށް ރުހުން ހޯދަން ތަޅުމުގައި އެޖެންޑާ ކުރާނެކަމަށް ބެލެވެއެވެ. އެމްޑީޕީގެ ޕާލަމެންޓްރީ ގުރޫޕުގެ ބައެއް މެމްބަރުން ވަނީ ކެބިނެޓްގެ ބައެއް ވަޒީރުންނަށް ރުހުން ދިނުމާއި ދެކޮޅަށް ވާހަކަ ދައްކާފައެވެ. އެހެންނަމަވެސް އެމްޑީޕީގެ ޕީޖީގެ ރަސްމީ ނިންމުމެއް މިކަމާއި ގުޅޭގޮތުން އަދި މިހާތަނަށް ނިންމާފައެއް ނުވެއެވެ.
