ރައްޔިތުންގެ މަޖިލިހުގެ މެމްބަރުންގެ ތެރެއިން ހަޒިރީ ދަށް މެމްބަރުންގެ މުސާރައިން މި ދައުރުގައި ކަނޑަން ފަށާފައިވާކަމަށް ރައްޔިތުންގެ މަޖިލިހުގެ ނާއިބު ރައީސްކަމުން އިސްތިއުފާ ދެއްވި ގަލޮޅު އުތުރު ދާއިރާގެ މެމްބަރު އީވާ ވިދާޅުވެއްޖެއެވެ.
އީވާ މިހެން ވިދާޅުވީ އޭނާ މަޖިލިސް ނާއިބު ރައީސްކަމުން ވަކިކުރުމަށް މަޖިލިހަށް ހުށަހެޅި ގަރާރާ ދެކޮޅަށް ވާހަކަ ދެއްކުމަށް މިއަދު ރައްޔިތުންގެ މަޖިލިހުގައި ލިބު ފުރުސަތުގައި ވާހަކަ ދައްކަވަމުންނެވެ.
މިއަދު ރައްޔިތުންގެ މަޖިލިހުގައި ވާހަކަ ދައްކަވަމުން އީވާ ވިދާޅުވީ، އޭނާއާއި، މަޖިލިސް ރައީސްކަމުން އިސްތިއުފާ ދެއްވި މުހައްމަދު ނަޝީދުއައި ދެބޭފުޅުންގެ ދައުރުގައި މަޖިލިހުގެ ހިންގުމުގެ ނިޒާމަށް ބޮޑެތި ހެޔޮ ބަދަލުތަކެއް ގެންނަވާފައިވާކަމުގައެވެ.
އެގޮތުން އީވާ ފާހަގަ ކުރެއްވި އެއްކަމަކީ، ރައްޔިތުންގެ މަޖިލިހުގެ ހާޒިރީ ދަށް މެމްބަރުންގެ މުސާރައިން ކަނޑަންފަށާފައިވާ ވުމެވެ.
އަޅުގަނޑުމެން އަބަދު މި ވާހަކަ އިއުލާން ނުކުރި ކަމުގައިވިޔަސް، ހާޒިރު ނުވާ މެމްބަރުންގެ މުސާރައިން އަލަށް ކަނޑަން ފެށި މަޖިލީހަށް މި މަޖިލިސް ހެދުނު.
ރައްޔިތުންގެ މަޖިލިހަށް ހާޒިރުނުވާ މެމްބަރުންގެ މުސާރައިން މިހާރު އުނިކުރާކަމަށް ވިދާޅުވަމުން އީވާ ވިދާޅުވިއެވެ.
ރައްޔިތުންގެ މަޖިލިހުގެ މުސާރައިން އުނިކުރުމަކީ މިހާތަނަށް، ރައްޔިތުންގެ މަޖިލިހުގެ އެއްވެސް ދައުރެެއްގައި ތަންފީޒު ކުރެވިފައިވާ ކަމެއް ނޫނެނެވެ. އޭގެ އެއް ސަބަބަކީ ރައްޔިތުންގެ މަޖިލިހުގެ މެމްބަރުންގެ މުސާރައަށް އެއްވެސް ބަދަލެއް ގެނައުމަށް މެމްބަރުންގެ ތާއީދު ލިބިފައި ނެތުމެވެ.
އެހެންނަމަވެސް މަޖިލިހަށް ހާޒިރު ނުވާ މެމްބަރުންގެ މުސާރައިން އުނިކުރުމަށް އަބަދުވެސް ރައްޔިތުންގެ ބޮޑު ޑިމާންޑެއް އޮވެއެވެ.
ހާޒިރީ ދަށް މެމްބަރުންގެ މުސާރައިން އުނިކުރަން ފަށާފައިވާކަމެއް މިހާތަނަށް ރައްޔިތުންގެ މަޖިލިހުން ހާމަކޮށްފައެއް ނުވެއެވެ.
