ޣައްޒާގައި ހިންގަމުންދާ އެންމެ ބޮޑު ދެ ހޮސްޕިޓަލް ހުއްޓުމަށް އައިސްފައިވާކަމަށް ޣައްޒާގެ ހެލްތު މިނިސްޓްރީން ބުނެފިއެވެ. މިގޮތުން ޣައްޒާގެ އެންމެ ބޮޑު ދެ ހޮސްޕިޓަލް ކަމަށްވާ އަލްޝިފާ އާއި އަލް ޤުދުސް ވެސް މިހާރު ބަންދު ކޮށްފައިވާކަމަށް ހެލްތު މިނިސްޓްރީން ވަނީ ބުނެފައެވެ.
ހަމަ އެއާއެކު، ބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިޔޭސުސް ވަނީ ޣައްޒާގެ ހޮސްޕިޓަލްތަކުގައި ނުރައްކާތެރި ހާލަތްތައް މެދުވެރިވެދާނެ ކަމުގެ އިންޒާރު ދެއްވައި، ދުވަސް ނުފުރާ އުފަންވާ ކުދިން ހިމެނޭ ގޮތަށް އިތުރު ބަލި މީހުން "ހިތާމަވެރި ގޮތެއްގައި" މަރުވަމުންދާ ކަމަށް ވިދާޅުވެފައެވެ. އަދި އިސްރާއީލުގެ ސްނައިޕަރުން ދަނީ އަލްޝިފާ ހޮސްޕިޓަލް ކައިރީގައި މީހުންނަށް އަމާޒުކޮށް ބަޑީގެ ހަމަލާތައް ދެމުންނެވެ. އަލްޝިފާ ހޮސްޕިޓަލަކީ ސަލާމަތްތެރިކަން ހޯދުމަށް އެތައްބަޔަކު މިހާރުވެސް ވަދެތިބި ހޮސްޕިޓަލެކެވެ.
އިންޓަނޭޝަނަލް ކޮމިޓީ އޮފް ދަ ރެޑް ކްރޮސް އިން ބުނެފައިވަނީ ޣައްޒާގައި މީހުން އެއްތަނުން އަނެއްތަނަށް ބަދަލުކުރަމުންދާ ހާލަތަކީ ނުރައްކާތެރި ހާލަތެއް ކަމަށެވެ. ޔޫރަޕިއަން ޔޫނިއަން (އީޔޫ)ގެ ޚާރިޖީ ސިޔާސަތުގެ ވެރިޔާ ޖޯސެފް ބޮރެލް ވިދާޅުވީ، އަވަސް ފަރުވާ ބޭނުންވާ ހޮސްޕިޓަލްތަކުގައި ތިބި ބަލި މީހުން ނެރުމަށް " ހަމަލާތަކަށް މަޑުޖެހުމެއް" ބޭނުންވާ ކަމުގައެވެ.
މިދިޔަ އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި ފަލަސްތީނުގެ 11،100 އަށް ވުރެ ގިނަ މީހުން ޝަހީދުވެފައިވާއިރު، ހުކުރު ދުވަހު މުހިންމު ހޮސްޕިޓަލްތަކާ ގުޅުން ކެނޑުނު ފަހުން އެ އަދަދު އަޕްޑޭޓްކޮށްފައެއް ނުވެއެވެ. އިޒްރޭލުގައި ހަމާސް ޖަމާއަތުން ދިން ހަމަލާތަކުގައި މަރުވި މީހުންގެ އަދަދު 1،200 އަށް ވުރެ މައްޗަށް އަރާފައިވާކަމަށް އިސްރައީލުން ވަނީ ބުނެފައެވެ. މިއީ ހަމާސްގެ ކުއްލި ހަމަލާގައި މަރުވެފައިވާކަމަށް ކުރިން އެގައުމުން ބުނަމުން އައި 1،400 މީހުންގެ އަދަދު އަލުން އިސްލާހުކޮށް، އިސްރާއީލުން ހާމަކޮށްފައިވާ އަދަދެކެވެ.
