މި ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 ފްލެޓް ލިބޭ މީހުންގެ ލިސްޓަށް އިހުމާލްވެފައި ނުވާނެ ކަމަށާއި ބިރުގަންނަން ޖެހޭ އެއްވެސް ކަމެއް ނެތް ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވެއްޖެއެވެ.
މިދިޔަ ހޮނިހިރު ދުވަހު އާންމުކުރި ގެދޮރުވެރިޔާ ފުރަތަމަ ބުރުގެ 4،000 ފްލެޓު ލިބޭ މީހުންގެ ދާއިމީ ލިސްޓުގައި ބޭއިންސާފުން ވަކި ބަޔަކަށް ފްލެޓް ދީފައިވާ ކަމަށް ބުނެ، އާންމުންގެ ގިނަ ބަޔަކު ދަނީ އެކަމާ މެދުގައި ހިތްހަމަނުޖެހުން ފާޅުކޮށް އެ މައްސަލަތައް ބަލަން ގޮވާލަމުންނެވެ. ވަކި ބަޔަކަށް ފްލެޓް ދޭން މަސައްކަތްކޮށްފައިވާ ނަމަ ފިޔަވަޅު އަޅާނެ ކަމުގެ އިންޒާރާ އެކު، ފްލެޓު ދިނުން މަޑުޖައްސާލަން އިންތިހާބީ ރައީސްގެ އޮފީހުން މިއަދު ވަނީ އެދިފައެވެ.
ހައުސިން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އަކްރަމް ވިދާޅުވީ މައުލޫމާތު ސާފުކުރުމަށް މިނިސްޓްރީ އަށް ވަޑައިގެންނެވި އެންޓި ކޮރަޕްޝަން ކޮމިޝަން (އޭސީސީ) ގެ ޓީމުން ވެސް ހުރިހާ އެއްޗެއް ބެއްލެވި ކަމަށެވެ. އަދި އެ ބޭފުޅުންނަށް ނުދައްކާ އެއްޗެއް ނޯންނާނެ ކަމަށާއި އެ ޓީމު ވަޑައިގަތީ ހިތްހަމަޖެހިގެން ކަމަށް އޭނާ ވިދާޅުވިއެވެ.
"އަޅުގަނޑުމެން ނުދައްކާ އެއްޗެއް ނޯންނާނެ. ހުރިހާ އެއްޗެއް ބެއްލެވި. އަޅުގަނޑަކަށް ހިއެއް ނުވޭ މީގައި އަޅުގަނޑުމެން ބިރުގަންނަން ޖެހޭ ކަމެއް އޮތް ހެނެއް. އިހުމާލުވެފައެއް (ނުވާނެ)." އަކްރަމް ވިދާޅުވިއެވެ.
ފިޔަވަޅު އެޅޭނެ ކަމެއް އޮންނާނެތޯ ނޫސްވެރިއަކު ސުވާލު ކުރުމުން އަކްރަމް ވިދާޅުވީ ފިޔަވަޅު އެޅޭނެ ކަމެއް ނޯންނާނެ ކަމަށާއި ފިޔަވަޅު ނުވެސް އެޅޭނެ ކަމަށެވެ.
އަކުރަމް ވިދާޅުވީ ކުރީގެ ރައީސް އަބްދުﷲ ޔާމީންގެ ސަރުކާރުގައި، އިންތިހާބީ ރައީސް ޑރ. މުހައްމަދު މުއިއްޒުގެ ހައުސިން މިނިސްޓަރަކަށް ހުންނެވިއިރު، އެ ސަރުކާރުން ހިންގި ބޯހިޔާވަހިކަމުގެ މަޝްރޫއުތަކުގެ ފްލެޓު ލިބޭ ކަމުގެ ލިޔުންތައް ހަވާލުކުރުމުގެ މަސައްކަތް، 2018ގައި ރައީސް އިބްރާހިިމް މުހައްމަދު ސޯލިހު ރައީސްކަމުގެ ހުވާކުރެއްވި ދުވަހުގެ މެންދުރާ ހަމައަށް ވެސް ކުރަމުން ދިޔަ ކަމަށެވެ.
އަކްރަމް ވިދާޅުވީ މި ސަރުކާރު ދެމިއޮތްހާ ހިނދަކު މަސައްކަތްތައް ހުއްޓުމަކަށް ނާންނާނެ ކަމަށެވެ. އަދި ހައްގު ނޫން ބަޔަކަށް ފްލެޓު ދިން ކަމަށް ދައްކަން މަސައްކަތް ކުރަނީ ސިޔާސީ ބަޔަކު އަޑީގައި ތިބެގެން ކަމަށާއި މިކަމާމެދު ރައްޔިތުން ވެސް އަދި އޭސީސީ ފަދަ މުއައްސަސާތަކުން ވެސް ކަންބޮޑުވެގެން ނޫޅުއްވާ ކަމަށް އޭނާ ވިދާޅުވިއެވެ. ފްލެޓު ދިނުމުގެ މަސައްކަތް ނޮވެމްބަރު 17 ގެ ކުރިން ނިންމާލެވޭތޯ މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.
"ރައްޔިތުން ކެކިއަރަނީކީ ވެސް ނޫން، ބަޔަކު އިސްވެ ތިބެ އައިސް އަޑުގަދަ ކުރީ. ވަކި ބަޔަކު އައިސް އަޑުގަދަކުރީ، ސޯޝަލް މީޑިއާގައި ވެސް އެހެން،. މިދެން ހަމަ އިންޑިއާ އައުޓް ކަހަލަ ކަމެއް. ވަކި ބަޔަކު އެކަން ކުރަނީ ސަރުކާރުގެ އަގު ވައްޓާލައި މި ކަން ކުރަމުން ދާތީ ރަނގަޅު ނޫން ގޮތަކަށް ދައްކަން،" އަކްރަމް ވިދާޅުވިއެވެ.
ގެދޮރުވެރިޔާ ސްކީމުގެ ދާއިމީ ލިސްޓަށް ޝަކުވާ ހުށަހެޅުން ހަމަވާނީ އަންނަ ބުރާސްފަތި ދުވަހުއެވެ. ޝަކުވާ ހުށަހަޅަން ޖެހޭނީ ގެދޮރުވެރިޔާ ޕޯޓަލްއަށެވެ.
