ފަލަސްތީނުގެ ޣައްޒާ އަށް ނިއުކްލިއާ ބޮން އެޅުމަކީ އިހްތިޔާރުގައި އޮތް ކަމެއް ކަމަށް ބުނެ އިސްރާއީލްގެ ހެރިޓޭޖް މިނިސްޓަރު އަމިހައި އެލިޔަހު ދެއްކި ވާހަކަތައް ދިވެހި ސަރުކާރުން ކުށްވެރިކޮށްފިއެވެ.

ފޮރިން މިނިސްޓްރީން މިއަދު ނެރުނު ބަޔާނުގައި ބުނީ ފަލަސްތީނުގައި ކުށެއް ނެތް އެތައް އާންމުންނަކަށް އިސްރާއީލްގެ އަސްކަރިއްޔާގެ ސިފައިން ހަމަލާތައް ދެމުންދާ ދަނޑިވަޅެއްގައި މިފަދަ ވާހަކައެއް ދެއްކުމަކީ ވަރަށް ކަންބޮޑުވާ ކަމެއް ކަމަށެވެ.

ބައިނަލްއަގުވާމީ އިންސާނީ ގާނޫނުތަކާ ހިލާފު ވާހަކައެއް ދެއްކިޔަސް، އެކަމަށް އިސްރާއީލް ސަރުކާރުން އެކަށީގެންވާ ޖަވާބެއް ނުދޭ ކަމަށް ވެސް ފޮރިން މިނިސްޓްރީން ކަންބޮޑުވުމާ އެކު ފާހަގަ ކުރިއެވެ.

ފަލަސްތީނު ރައްޔިތުންގެ ފުރާނައަށް ނުރައްކާވާ އަދި އިންޓަނޭޝަނަލް ހިއުމަން ރައިޓްސް ގާނޫނާ ހިލާފު މި ފަދަ ވާހަކަތަކަށް ފިޔަވަޅު އަޅަން ވެސް ރާއްޖެއިން ވަނީ ބައިނަލްއަގުވާމީ ފަރާތްތަކަށް ގޮވާލައިފައެވެ.

ކުށެއް ނެތް އާންމުންނަށް ދޭ ހަމަލާތައް ހުއްޓުވުމަށް ބައިނަލްއަގްވާމީ މުޖުތަމައު އަށް އަވަސް ފިޔަވަޅު އެޅުމަށް ދިވެހި ސަރުކާރުން ތަކުރާރުކޮށް ގޮވާލާއިރު، ފަލަސްތީނުގެ ރައްޔިތުންނަށް ހުރަހެއް ނެތި އިންސާނީ އެހީ ފޯރުކޮށްދިނުމަށް ފުރުސަތު ދިނުމަށާއި ވަގުތުން ހަނގުރާމަ ހުއްޓާލުމަށް ވެސް ރާއްޖެ އިން ވަނީ ގޮވާލައިފައެވެ.

ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ރާއްޖޭގައި ތަފާތު އެކިއެކި ހަރަކާތްތައް ދަނީ ހިންގަމުންނެވެ. އަދި އިސްރާއީލުން ފަލަސްތީނުގެ ޣައްޒާގައި ހިންގަމުންދާ ގަތުލުއާންމާ ދެކޮޅަށް މާލެ އާއި ރާއްޖޭގެ އެކިކަންކޮޅުތަކުގައި ތަފާތު އެކި އެއްވުންތަކާއި ހިނގާލުންތައް ވެސް އަންނަނީ ބާއްވަމުންނެވެ.

އިސްރާއީލްގެ ހަމަލާތަކުގައި ފަލަސްތީނުގެ ޣައްޒާ އިން ޝަހީދުވި މީހުންގެ އަދަދު 10،000 އާ ގާތް ކުރާ އިރު، އޭގެތެރޭގައި 4،000 އެއްހާ ކުޑަކުދިން ވެސް ހިމެނެއެވެ. އަދި 2،000 އަށް ވުރެ ގިނަ އަންހެނުން ހިމެނެއެވެ. މި ހަމަލާތަކުގައި 25،000 އެއްހާ މީހުން ވަނީ ޒަހަމްވެފައެވެ.