ރިޔާސީ އިންތިހާބުގެ ދުވަސްވަރު އިންތިހާބީ ރައީސް ޑރ. މުހައްމަދު މުއިއްޒު ވެވަޑައިގެން ހުރިހާ ވައުދުތަކެއް ފުއްދަވާނެކަމުގެ ޔަގީންކަން އެބައޮތް ކަމަށާއި، ރައްޔިތުން އެދޭ ހެޔޮ ބަދަލު އެމަނިކުފާނު ގެނެސް ދެއްވާނެކަމަށް ޕީއެންސީގެ ޗެއާޕާސަން އަބްދުއްރަހީމް ވިދާޅުވެއްޖެއެވެ.
އިދިކޮޅު އެންމެ ބޮޑު ޕާޓީ، ޕީޕީއެމް/ޕީއެންސީގެ ލީޑާޝިޕްގެ ބޭފުޅުން އައްޑޫއަށް ކުރައްވާ ދަތުރުފުޅުގައި މިއަދު އައްޑޫ ހައި ސްކޫލްގައި ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، ގާނޫނު ތަންދޭ އެންމެ ގިނަ ދުވަހަކު އެ ދެ ޕާޓީން ވެރިކަން ކުރުމަކީ އެބޭފުޅުންގެ އުއްމީދެއް ކަމަށެވެ.
ރިއަށްވެސް އޮތީ އުނދަގޫ ދުވަސްތަކެއްކަމަށާއި، ނަމަވެސް މިއީ ފަސޭޙަ ދުވަސްތަކަކަށް ހެދުން އޮތީ ރައްޔިތުންގެ އަތްމަތީގައިކަމަށް ފާހަގަކޮށް އަބްދުއްރަހީމް ވިދާޅުވީ އެއީ ޕީޕީއެމް/ޕީއެންސީއަށް ވެރިކަން ދެއްވި ފަދައިން މަޖިލީހުގެ މެޖޯރިޓީ ދެއްވުންކަމަށެވެ. ޕްރައިމަރީއަށްފަހު، ޕާޓީގެ ކެންޑިޑޭޓަށް ގޮނޑީ ހޯދައިދިނުމަށްޓަކައި ކުރަންޖެހޭ ހުރިހާ މަސައްކަތެއް އެބޭފުޅުން ކުރައްވާނެކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވަނީ 19 ވަނަ ރައްޔިތުންގެ މަޖިލީހުގައި ތިބި ޕީޕީއެމް/ޕީއެންސީގެ މެންބަރުންނަށް ވަރަށް ބޮޑަށް ތައުރީފު ކުރައްވާފައެވެ. އެގޮތުން އެންމެ 8 މެންބަރުންގެ މަސައްކަތުން ސަރުކާރު ކުޑަ ކަކުލަށް ޖެހިކަމަށް ފާހަގަކޮށް އަބްދުއްރަހީމް ވިާޅުވީ މިފަދަ މެންބަރުން މަޖިލީހުގައި ތިބުމަކީ މުހިންމުކަމެއްކަމަށެވެ.
މި ވޭތުވެދިޔަ 5 އަހަރު ދެއްކި އެކުވެރިކަމާއި، އެއްބައިވަންތަކަން ކުރިއަށް އޮތް ތަނުގައި މާ ވަރުގަދައަށް ދައްކަވާށޭ.
– އަދުރޭ ވިދާޅުވިއެވެ.
އަދުރޭ ވަނީ ޕީޕީއެމް ބައިބައި ކުރުމަށް ފުރުސަތު ނުދެއްވުމަށާއި، އެކަމަށް އެއްބާރުލުން ޕާޓީގެ މެންބަރުން ނުދެއްވުމަށް އެދިވަޑައިގެންފައެވެ. ޕީޕީއެމް/ޕީއެންސީ ތެރޭގައި މައްސަލަ ޖެހިފަިއވާކަމަށް އެކި ފަރާތްތަކުން ބުނަމުންދާކަމަށާއި، ނަމަވެސް އެއީ ހަގީގަތާ ޚިލާފު ވާހަކަތަކެއެއް ކަމަށް އަދުރޭ ވިދާޅުވިއެވެ. އަދި ޕީޕީއެމް/ޕީއެންސީން މިހާ ހިސާބަށް މި އާދެވުނީ ލީޑާޝިޕާއި ސަޕޯޓަރުން ދެއްކި ހިތްވަރުން ކަމަށްވެސް އޭނާ ވިދާޅުވިއެވެ.
ޕީޕީއެމް/ޕީއެންސީ އިން ފެށީ ދަތުރުގައި ބޮޑެތި ގޮންޖެހުންތަކަކާއި، ދަތިތަކާއި ކުރިމަތިވި. އަދި ޕާޓީ ހަލާކުވެދާނެއޭ ހީވި ހާލަތްތައްވެސް ދިޔަ. އެހެން ނަމަވެސް ދަތުރުކުރި މިސްރާބަށް ވާސިލްވެވުނު. އެއީ ޕާޓީގެ ލީޑަޝިޕާއި، ސަޕޯޓަރުން ދެއްކި ސާބިތުކަމުގެ ސަބަބުން.
– އޭނާ ވިދާލުވިއެވެ.
ރައްޔިތުންގެ މަޖިލީހުގައި އެޕާޓީގެ މެންބަރުން ތިބިކަން ފާހަގަކުރައްވައި އަދުރޭ ވިދާޅުވީ، އެންމެ އަށް މެންބަރުންގެ ސަބަބުން ސަރުކާރު ކުޑަކަކޫ މައްޗަށް ތިރިވި ކަމަށާއި އެފަދަ މެންބަރުން މަޖިލީހުގައި ތިބުމަކީ ވަރަށް މުހިންމު ކަމެއް ކަމަށެވެ. މީގެ އިތުރުން ރިޔާސީ އިންތިހާބުގެ ދުވަސްވަރު އިންތިހާބީ ރައީސް ޑރ. މުހައްމަދު މުއިއްޒު ވެވަޑައިގެން ހުރިހާ ވައުދުތަކެއް ފުއްދަވާނެކަމުގެ ޔަގީންކަން ދެއްވާ އަބްދުއްރަހީމް ވިދާޅުވީ، ޕީޕީއެމް/ޕީއެންސީއިން ވެރިކަމަށް އަންނަނީ އެންމެ 5 އަހަރު ވެރިކަން ކޮށް ފައިބައިގެންދިއުމަށް ނޫންކަމަށެވެ. ގާނޫނު ތަންދޭ އެންމެ ގިނަ ދުވަހަކު ޕީޕީއެމް/ޕީއެންސީއިން ވެރިކަން ކުރުމަކީ އެބޭފުޅުންގެ އުއްމީދުކަމަށް އަބްދުއްރަހީމް ވިދާޅުވިއެވެ.
