އިސްރާއީލަށް ތާއީދުކޮށް ސޯޝަލް މީޑިއާގައި ހިޔާލު ފާޅު ކުރި ދިވެހި މީހާ އަށް ފުލުހުން މިރޭ ހިމާޔަތް ދީފިއެވެ.
އެނގިފައިވާ ގޮތުގައި އެ ދިވެހި ފިރިހެން މީހާ މާލެ އައި ވަގުތު ޒުވާނުންތަކެއް ވަނީ ބޭންކް އޮފް ސިލޯން (ބީއޯސީ) ކައިރިން އެ ޒުވާނާއާ ދިމާކޮށްލައިފައެވެ. އަދި އެ ސަރަހައްދުގައި ތިބި ބަޔަކު ވަނީ އެ ޒުވާނާ އަށް ހަމަލާ ވެސް ދީފައެވެ.
އެއާއެކު ފުލުހުން ވަނީ އެ ޒުވާނާ ސަލާމަތްކޮށް، ފުލުހުންގެ ކާރަކަށް އަރުވައިފައެވެ. އަދި ފަހުން ގަލޮޅު ޕޮލިސް ސްޓޭޝަނަށް ގެންގޮސް ހިމާޔަތް ދީފައިވެއެވެ.
އެކަމާ ގުޅިގެން ފުލުހުން ވިދާޅުވީ މިރޭ 9:46 ހާއިރު ބޮޑުތަކުރުފާނު މަގު ބޭންކް އޮފް ސިލޯން ކައިރީގައި މާރާމާރީއެއް ހިންގި ކަމުގެ ރިޕޯޓު ލިބިފައިވާ ކަމަށެވެ. އެ މާރާމާރީއާ ގުޅިގެން ތަހުގީގު ފަށާފައިވާ ކަމަށް ބުނުން ފިޔަވާ އެއްވެސް މައުލޫމާތެއް ފުލުހުން ވިދާޅެއް ނުވެއެވެ.
އޭނާ މި ފަހުން އައީ އިސްރާއީލުން ފަލަސްތީނަށް ދެމުން އަންނަ ހަމަލާތަކަށް ތާއިދުކޮށް އަދި އިސްރާއީލްގެ ލާއިންސާނީ ހަމަލާތައް ދިފާއުކޮށް ފަލަސްތީނުގެ ރައްޔިތުންނާ ދެކޮޅަށް ސޯޝަލް މީޑިއާގައި ވާހަކަ ދައްކަމުންނެވެ. ނަމަވެސް މިފަހުން އޭނާ ވަނީ އެ ވާހަކަތަކަށް ދިވެހީންގެ ކިބައިން މާފަށް އެދި ސޯޝަލް މީޑިއާގައި އެކަން ހާމަކޮށްފައެވެ.
