މިސަރުކާރުގެ ގެދޮރުވެރިޔާ ސްކީމްގެ ދަށުން ދޭން ނިންމާފައިވާ 4،000 ފްލެޓް އެއްވެސް އުސޫލެއްނެތި ބަހަން އުޅޭކަަމަށް ތުހުމަތުކޮށް އޭސީސީއަށް މައްސަލަ ހުށަހަޅައިފިއެވެ.
އާންމު ފަރާތަކުން އޭސީސީއަށް ހުށަހެޅި މައްސަލަގައި ބުނެފައިވަނީ، ފްލެޓް ލިބޭކަމަށް އިއުލާން ކޮށްފައިވާ 13،000 މީހުންގެ ތެރެއިން، ފުރަތަމަ ހަވާލުކުރުމަށް ސަރުކާރުން ނިންމާފައިވާ 4،000 ފްލެޓް ހަވާލުކުރުމަށް އެންމެ އިންސާފުވެރި ގޮތަކީ ފޮއިންޓް ލިބިފައިވާ ތަރުތީބުން ފްލެޓްތައް ހަވާލުކުރުން ކަމުގައެވެ.
އެހެންނަމަވެސް ފްލެޓް ލިބުނު ފަރާތްތަކަށް ޕޮއިންޓް ލިބުނު ގޮތް މިހާތަނަަށްވެސް ސަރުކާރުން ހާމަކޮށްފައި ނުވާކަމަށް އޭސީސީއަށް ހުށަހެޅި މައްސަލާގައި ބުނެފައި ވެއެވެ. މައްސަލާގައި އިތުރަށް ބުނެފައިވަނީ، ފްލެޓް ހަވާލުކުރާނީ ލިބޭ ފަރާތްތަކުގެ ދިރިއުޅުމުގެ ހާލަތަށް ބަލާފައިކަމަށް ބުނެފައިވި ނަމަވެސް ސަރުކާރުގެ ކަމާއި ގުޅުންހުރި އިދާރާތަކުން އެކަން ކޮށްފައި ނުވާކަމަށާއި، އަދި އެކަމަށް މިހާރު ވަގުތުވެސް ނެތްކަމުގައެވެ.
އަދި އޭގެ އިތުރުން މި 4،000 ފްލެޓް ހަވާލުކުރުމަށް އުސޫލެއްވެސް ހާމަކޮށްފައި ނުވާކަމަށްވެސް ބުނެފައި ވެއެވެ.
މައްސަލަ ހުށަހެޅި ފަރާތުން ބުނެފައިވަނީ، އެހެންކަމުން، އާންމު އުސޫލާއި ޚިލާފަށް، ސިއްރު އުސޫލެއްގެ ތެރެއިން، 4،000 ފްލެޓް އިންތިގާލީ މަރުހަލާގެ ފަހު ދުވަސްކޮޅު އިންސާފްވެރިކަމާއެކު ހަވާލުކުރެވޭނެ ގޮތެއް ނޯންނާނެ ކަމުގައެވެ. އަދި އެކަން އެގޮތަށް ކޮށްފިނަމަ ދެން އުފެދިގެންދާ މައްސަލަތައް ހައްލުކުރުން އަންނަ ސަރުކާރަކަށްވެސް ފަސޭހަ ނުވާނޭކަން ފާހަގަ ކުރަމުން މައްސަލަ ހުށަހެޅި ފަރާތުން އެދުނީ އެމައްސަލަ އޭސީސީން ބަލައި ދިނުމަށެވެ.
މިސަރުކާރުގެ ދައުރު ނިމުމުގެ ކުރިން ދޭން ނިންމާފައިވާ 4،000 ފްލެޓް އަޅަމުންދަނީ ފަހި ދިރިއުޅުން ކޯޕަރޭޝަން (އެފްޑީސީ) އިންނެވެ. އެފަރާތުން ބުނެފައިވަނީ މި ފެލެޓްތަކުގެ ލިފްޓް ހަރުކޮށް، ފެނާއި ކަރަންޓު މިއަހަރު ނިމުމުގެ ކުރިން ނިންމާލެވޭނެ ކަމަށެވެ.
