މަގާމުން ވަކިވުމަށް ހަމަޖެހިފައިވާ ލުބުނާންގެ މިހާރުގެ ބޮޑުވަޒީރުގެ މައްޗަށް، މިއަރުގެ އޮގްސްޓް މަހު، ލުބުނާނުގެ ޕޯޓުގައި ހިގި ނުތައްކާތެރި ގޮވުމުގެ މައްސަލާގައި، ދައުވާ އުފުލުމަށް ނިންމައިފިއެވެ. ބޮޑުވަޒީރު ހަސަން ދައިބު ހިމެނޭގޮތުން ކުރީގެ އިތުރު 3 ވަޒީރެއްގެ މައްޗަށް ދައުވާ އުފުލުމަށް ނިންމާފައިވަނީ، މިހާދިސާގައި އެތައްސަތޭކަ ބަޔަކު މަރުވެ އަދި އިތުރު އެތައްހާސް ބަޔަކަށް އަނިޔާވެ ދިއުމުގައި މިއެންމެންގެވެސް އިހުމާލު އޮތްކަމަށް ބުނެއެވެ.
ލުބުނާންގެ ޝަރުއީ ދާއިރާގެ އިސްފަރާތްތަކުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، ޕޯޓުގައި ހިގި ވަރުގަދަ ގޮވުމުގެ މައްސަލާގައި ދައުވާ އުފުލާފައިވަނީ، ލުބުނާނުގެ ބޮޑުވަޒީރު ހަސަން ދައިބުގެ އިތުރުން، ކުރީގެ ޕަބްލިކް ވާކސް މިނިސްޓަރުން ކަމމުގައިވާ ގާޒީ ޒައިޓަރ އާއި ޔޫސުފް ފެނިއަނޯސްގެ އިތުރުން ކުރީގެ ފިނޭންސް މިނިސްޓަރ އަލީ ހަސަން ޚަލީލްގެ މައްޗަށެވެ.
މިމައްސަލަ ތަހުގީގު ކުރަމުންދާ ފަޑިޔާރު ފަޑި ސަވަން، ތުހުމަތު ކުރެވޭ މީހެއްގެ ގޮތުން މާދަމާ، ބޮޑުވަޒީރު ދައިބުއާއި، ބޮޑުވަޒީރުގެ އޮފީހިގައި ސުވާލު ކުރުމަށް ވަނީ ހަމަޖެހިފައެވެ. ހަމަ އެއާއެކު، ކުރީގެ 3 ވަޒީރުންނާވެސް، މިމައްސަލާގައި ތުހުމުކުރެވޭ މީހުންގެ ހައިސިއްޔަތުން ސުވާލުކުރުމަށް ވަނީ ހަމަޖެހިފައެވެ.
މިހާތަނަށް މައްސަލަ ތަހުގީގު ކުރާ ފަޑިޔާރު މި 3 ބޭފުޅުންނާވެސް ސުވާލު ކޮށްފައިވަނީ މިމައްސަލާގެ ހެކިންގެ ގޮތުގައެވެ.
މި 3 ބޭފުޅުންގެ މައްޗަށްވެސް ދައުވާކުރުމަށް ފަޑިޔާރު ނިންމާފައިވަނީ، މީގެ 2 ހަފްތާކުރިން، ދައުލަތުގެ ބައެއް ވަޒީރުންގެ މައްޗަށް މިމައްސާލާގައި ދައުވާ އުފުލުމަށްޓަކާ، ޚާއްސަ ޕާލަމެންޓްރީ ކޯޓެއް އެކުލަވާލުމަށް އެދި، ލުބުނާނުގެ ޕާލަމެންޓަ ފަޑިޔާރު ސިޓީފުޅެއް ފޮނުއްވާފަ ވަނިކޮށެވެ. އެހެންނަމަވެސް، މަޖިލީހުގެ ރައީސް ނަބީހު ބާރީވަނީ މިކަމަށް ދެކޮޅު ހައްދަވާފައެވެ.
ރަސްމީ ފަރާތްތަކުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، ފަޑިޔާރުވަނީ، ލުބުނާނުގެ ގާނޫނު ހަދާ މަޖިލީހުން، އެގައުމުގެ ވަޒީރުން މިމައްސަލާގަ އުފުލަންޖެހޭ ޒިންމާތަކަށް ޖަވާބުދާރީ ކުރުވުމަށް މަސައްކަތް ކޮށްފައެވެ. އެހެންނަމަވެސް، މަޖިލީހުން މިޒިންމާ އުފުލުމަށް ދެކޮޅު ހެދުމުގެ ނަތީޖާއެއްގެ ގޮތުން، ފަޑިޔާރު މިވަނީ، މިމައްސަލާގަ ޒިންމާވާން ޖެހޭ ފަރާތްތައް އިންސާފުގެ ކުރިމައްޗަށް ގެނައުމަށްޓަކާ، ދައުވާ އުފުލުމަށް ނިންމާފައެވެ. އަދި މިއީ ލުބުނާނުގެ ގާނޫނުތަކުން ލިބިދޭ ފުރުސަތެއްކަމަށް ފަޑިޔާރު ގަބޫލު ކުރައްވާކަމަށްވެސް، މީޑިއާތަކުން ރިޕޯޓު ކޮށްފައިވެއެވެ.
ލުބުނާނުގެ ބޮޑުވަޒީރު ދައިބުއާއި ކުރީގެ 3 މިނިސްޓަރުންގެ މައްޗަށް ދައުވާ އުފުލުމަށް ނިންމާފައި މިވަނީ، ލުބުނާނުގެ ޕޯޓުގައި 3000 ޓަނުގެ ގޮވާ ޒާތުގެ ކެމިކަލް ރައްކާކުރެވިފައިވާކަން ކާމަކޮށް ލިޔެކިއުމުން މި 3 ބޭފުޅުންނާވެސް ކުރިން ރަސްމީ ފަރާތްތަކުން ކޮށްފައިވާ މުއާމަލާތުތަކުގެ މައްޗަށް ބިނާކޮށެވެ.
ދައިބުގެ މައްޗަށް އުފުލުމަށް ހަމަޖެހިފައިވާ މިދައުވާއާ ގުޅިގެން އޭނާގެ އޮފީހުން މިހާތަނަށް އަދި އެވެސް މައުލޫމާތެއް ހާމަކޮށްފައެއް ނުވެއެވެ. އަދި ކުރީގެ 3 މިނިސްޓަރުންވެސް މީޑިއާތަކަށް އެއްވެސް މައުލޫމާތެއް ދީފައެއް ނުވެއެވެ.
މިހާތަނަށް މި ހާދިސާއާ ގުޅިގެން 37 ފަރާތެއްގެ މައްޗަށް ދައުވާކުރުމަށް ލުބުނާނުގެ ސަރުކާރުން ވަނީ ނިންމާފައެވެ. މީގެތެރޭގައި ހިމެނޭ 25 މީހަކު މިހާރުވެސް ވަނީ ބަންދު ކޮށްފައެވެ.
އޮގްސްޓް މަހު، ލުބުނާނުގެ ޕޯޓުގައި ހިގި ކެމިކަލްތައް ގޮވުމުގެ ވަރުގަދަ މިހާދިސާގައި 2،000 މީހަކު މަރުވެ، 6،000 މީހުންނަށް އަނިޔާވެފައި ވެއެވެ. އަދި އެތައް ބިލިއަން ޑޮލަރެއްގެ ގެއްލުން ވެރިރަށް ބެއިރޫތަށް ލިބިގެން ގޮސްފައި ވެއެވެ.
އަދި، މިގޮވުމުގެ ހާދިސާއަށްފަހު ދައިބުގެ ސަރުކާރު އިސްތިއުފާ ދީފައިވެއެވެ. އެހެންމަވެސް، ދާއިމީ ސަރުކާރެއް އިންތިޚާބު ކުރެވެންދެން، ވަގުތީ ސަރުކާރެއްގެ ގޮތުގައި ދާއިބު ގެންދަވަނީ ބޮޑުވަޒީކަމުގެ ޒިންމާ އަދާ ކުރައްވަމުންނެވެ.
