އިސްރާއީލްގެ އަސްކަރިއްޔާގެ ސިފައިންނާއި ފަލަސްތީނުގެ ހަމާސް ޖަމާއަތާ ދެމެދު ކުރަމުން އަންނަ ހަނގުރާމަ ހުއްޓާލައި ޣައްޒާ އަށް އެހީ ފޯރުކޮށްދިނުމަށް އދ. ގެ އާންމު މަޖިލިހުން ފާސް ކުރި ގަރާރު ކޯ ސްޕޮންސާ ކުރި ގައުމުތަކުގެ ތެރޭގައި ރާއްޖެ ހިމެނިއްޖެއެވެ.
މި މަހުގެ 7 ވަނަ ދުވަހުން ފެށިގެން އިސްރާއީލާއި ފަލަސްތީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތާ ދެމެދުގައި ކުރިއަށްދާ ހަނގުރާމައިގައި ފަލަސްތީނުގެ ޣައްޒާ އިން 7،300 އަށް ވުރެ ގިނަ މީހުން ވަނީ ޝަހީދުކޮށްލައިފައެވެ. ހަމާސްގެ ހަމަލާތަކުގައި މަރާލާފައި ވަނީ 1،400 އަށް ވުރެ ގިނަ މީހުންނެވެ.
ހަނގުރާމަ ހުއްޓާލުމަށް ގޮވާލައި ގަރާރު އދ. ގެ އާންމު މަޖިލިހުގައި ބައިވެރިވި މެމްބަރު ގައުމުތަކުގެ ތެރެއިން 120 ގައުމެއްގެ ބޮޑު ތާއީދަކާ އެކުގައި ރޭ ވަނީ ފާސްކޮށްފައެވެ. ގަރާރާ ދެކޮޅަށް 14 ގައުމަކުން ވޯޓު ދިން އިރު، އެއްވެސް ކޮޅަކަށް ވޯޓު ނުދީ 45 ގައުމަކުން ތިއްބެވެ.
ގަރާރާ ދެކޮޅަށް ވޯޓު ދިން ގައުމުތައް:
- އޮސްޓްރިއާ
- ކްރޮއޭޝިއާ
- ޗެކް ރިޕަބްލިމް
- ފިޖި
- ގޯޓެމާލާ
- އިސްރާއީލު
- މާޝަލް އައިލޭންޑްސް
- މައިކްރޮނޭޝިއާ
- ޕަޕުއާ ނިއުގިނީ
- ޕެރަގުއޭ
- ޓޮންގާ
- އެމެރިކާ
- ނައުރު (މައިކްރޮނޭޝިއާގައި ހިމެނޭ ޖަޒީރާ ގައުމެއް)
- ހަންގޭރީ
މި ގަރާރު ފާސް ކުރަން ރާއްޖެ އިން ވެސް ވަނީ ވޯޓު ދީފައެވެ. އަދި ރާއްޖެއަކީ މި ގަރާރު ކޯ ސްޕޮންސާ ކުރި 46 ގައުމުގެ ތެރެއިން އެއް ގައުމެވެ.
އިސްރާއީލުން ފަލަސްތީނުގެ ޣައްޒާއަށް ދެމުންދާ ލާއިންސާނީ ހަމަލާތައް ހުއްޓާލާ، އަދި ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ގޮވާލާ ފާސް ކުރި ގަރާރަށް ވޯޓު ނުދެނީ މުސްލިމް ގައުމުތަކުގެ ތެރެއިން އިރާގު އެކަންޏެވެ. އިރާގުން ވަނީ ވަކި ކޮޅަކަށް ވޯޓު ދޭން ބޭނުން ނޫން ކަމަށް ބުނެފައެވެ.
އިސްރާއީލުން އުދުވާނީ ހަމަލާ ދެމުންދާ، ފަލަސްތީނުގެ ޣައްޒާއިން އިންޓަނެޓާއި ކަރަންޓުގެ ޚިދުމަތް ކެނޑި، މުޅި ސިޓީ ކަނު އަނދިރި ކަމަށް މިހާރު ވަނީ ގޮސްފައެވެ. އަދި އިސްރާއީލުން ވަނީ ޣައްޒާ އަށް ދެމުންދާ ހަމަލާތައް ވަރުގަދަކޮށް، އެއްގަމުން މަގުން ވެސް ޣައްޒާ އަށް އަރަން ފަށައިފައެވެ.
ޣައްޒާގައި ހަރަކާތްތެރިވަމުންދާ އެހީދޭ ޖަމިއްޔާތަކާއި މީޑިއާތަކުން ބުނަމުންދަނީ ޣައްޒާގައި ހަރަކާތްތެރިވަމުންދާ އެތަންތަނުގެ މުވައްޒަފުންނާއި މިހާރު މުޅިންހެން ކަހަލަ ގޮތަކަށް ގުޅުން ކެނޑިފައިވާ ކަމަށެވެ.
އިންސާނީ ހިދުމަތް ފޯރުކޮށްދެމުންދާ ފަރާތްތަކުން ބުނަމުން ދަނީ ޣައްޒާގައި ފަލަސްތީނުގެ އެއް މިލިއަން ކުޑަކުދިންނާއި އެކުދިންގެ އާއިލާތަކުން މިހާރު ދިރިއުޅެމުންދަނީ އިންސާނުން ދިރިއުޅުމަށް އެކަށީގެންނުވާ ހާލަތުގައި ކަމަށެވެ.
