ތަފާތު އެކި ބޭނުންތަކަށް އެހީތެރިކަން ފޯރުކޮށް ދިނުމަށް ފަންޑު ހުޅުވައިގެން އެހީ ހޯދާ ފަރާތްތަކުން ކުރާ ޚަރަދުތައް އޮޑިޓް ކޮށް، މާލީ ޚަރަދުތައް އާންމު ކުރަމުން ނުދާތީ ސޯޝަލް މީޑިއާގައި ބައެއް ފަރާތްތަކުން ފަހަކަށް އައިސް ވަނީ ކަންބޮޑުވުން ފާޅުކުރަން ފަށާފައެވެ.
މިގޮތުން ސޯޝަލް މީޑިއާގައި މިކަމުގެ ކަންބޮޑުވުން ފާޅުކުރަމުންދާ ފަރާތްތަކުން ފާހަގަ ކޮށްފައިވާ ގޮތުގައި، މިދުވަސްވަރަކީ ވަކީން ޚާއްސަކޮށް ގިނަ އަދަދެއްގެ ދިވެހި ރައްޔިތުން، ފަލަސްތީނުގެ ޢައްޒާގައި ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށް ދިނުމަށް ގިނަ އަދަދެއްގެ ފައިސާގެ އެހީތެރިކަން ފޯރުކޮށް ދެމުންދާ ދުވަސް ވަރަކަށް ވުމާއެކު، ޣައްޒާ ފަންޑަށާއި އަދި އެނޫންވެސް އެފަދަ ބޭނުންތަކުގައި އެއްކުރަމުންދާ އެތައް މިލިއަން ރުފިޔާއެއް ހޭދަކުރާ ގޮތުގެ މާލީ އެއްވެސް ހިސާބު ކިތާބެއް އެގެން ނެތުމަކީ ކަންބޮޑުވުމެކެވެ.
މިގޮތުން ޝޯޝަލް މީޑިއާގައި ބައެއް ފަރާތްތަކުން ބުނަމުންދަނީ، ދިވެހި ރައްޔިތުންގެ ފައިސާ، އަމިއްލަ ޖަމިއްޔާއަކުން ފަންޑެއްގެ ގޮތުގައި ޖަމާކޮށް، އެއީ ޣައްޒާގެ ހާލުގައިޖެހިފައިވާ ރައްތިންނަށް އެހީތެރިކަން ފޯރުކޮށްދިނުމުގެ ގޮތުން ނަމަވެސް، ފައިސާ ހޭދަ ކުރިގޮތުގެ މިނިވަން އޮޑިޓެއް ކުރެވިފައި އޮންނަން ޖެހޭ ކަމުގައެވެ. ނުވަތަ އެކައުންޓެބިލިޓީގެ ކޮންމެވެސް އެހެން މެކޭނިޒަމެއް (ޒިންމާދާރު ގޮތުގައި ފައިސާ ހޭދަކުރަމުންދާކަން އެގޭނެ ކޮންމެވެސް އުސޫލެއް) އޮންނާން ޖެހެއެވެ.
އެހެން ނޫންނަމަ، އެތައް މިލިއަން ރުފިޔާއެއް އެހީގެ ގޮތުގައި ފޯރުކޮށް ދިން އާންމު ރައްޔިތުނަށް ފައިސާ ހޭދަކުރެވެމުންދާ ގޮތާއިމެދު އިތުބާރު ގާއިމް ކުރެވޭނެ މަގެއް ނޯންނާނެކަމަށް ފާހަގަކޮށް، އެކަމުގެ ކަންބޮޑުވުން ގިނަބަޔަކު ވަނީ ސޯޝަލް މީޑިއާގައި ފާހަގަ ކޮށްފައެވެ.
ފަލަސްތީނު ފަންޑަށް އެތައް މިލިއަން ރުފިޔާއެއް! ޚަރަދު ކުރާގޮތުގެ ތަފްސީލު އެގެން ބޭނުން!
ފަލަސްތީނުގައި މިހާރު ހިނގަމުންދާ ހަނގުރާމާގައި ހާލުގައި ޖެހިފައިވާ ޣައްޒާގެ ރައްޔިތުންނަށް އެހީވުމުގެ ގޮތުން، ރާއްޖޭގެ އަމިއްލަ ޖަމިއްޔާއެއް ކަމުގައިވާ އިންޓަނޭޝަނަލް އެއިޑް ކެމްޕޭން (އައިއޭސީ)އިން ހުޅުވި ފަންޑަށް މިހާތަނަށްވަނީ 12.5 މިލިއަން ރުފިޔާ ޖަމާވެފައެވެ. އޭގެ އިތުރަށް 8،300 އަށް ވުރެ ގިނަ ޑޮލަރު އެހީގެ ގޮތުގައި މި ފަންޑަށް ލިބައިވާކަމަށްވެސް އިންޓަނޭޝަނަލް އެއިޑް ކެމްޕޭންގެ ފަރާތުން ހާމަކޮށްފައި ވެއެވެ.
އިންޓަނޭޝަނަލް އެއިޑް ކެމްޕޭން (އައިއޭސީ) އިން ހިންގާ 'ގާޒާ އެމަޖެންސީ ރިލީފް ފަންޑަށް' ފައިސާ ހޯދުމަށް މީޑިއާތަކުން ވަނީ "އަހަރެމެން ފަލަސްތީނާއެކު" ނަމުގައި ޓެލެތޯނެއްވެސް ކުރިއަށް ގެންގޮސްފައެވެ. މި ޓެލެތޯން 13 ގަޑިއިރަށް ކުރިއަށް ގެންގޮސްފައި ވެއެވެ. އޭގެ އިތުރުން ގިނަ އަދަދެއްގެ އާންމު ރައްޔިތުންނާއި، މަސްވެރިންނާއި، ސަރުކާރުގެ އިދާރާތަކުންވެސް ވަނީ މި ފަންޑަށް ފައިސާގެ އެހީތެރިކަން ފޯރުކޮށްދީފައެވެ.
ފަލަސްތީނަށް އެހީތެރިކަން ފޯރުކޮށް ދިނުމުގެ ގޮތުން އިންޓަނޭޝަނަލް އެއިޑް ކެމްޕޭން (އައިއޭސީ)އިން ޖަމާކުރާ ފައިސާއިން މިހާރުވެސް ޣައްޒާގެ ހާލުގައި ޖެހިފައިވާ އާންމު ރައްޔިތުންނަށް އެހީތެރިކަން ފޯރުކޮށްދީފައިވާކަން ސޯޝަލް މީޑިއާގެ ވަސީލަތްތައް ބޭނުންކޮށްގެން އެޖަމިއްޔާއިން ވަނީ ހާމަކޮށްފައެވެ. މިގޮތުން، އެހީތެރިކަން ފޯރުކޮށްދެމުން ދަނިކޮށް ނަގާފައިވާ ބައެއް ފޮޓޯތައް އެ ޖަމިއްޔާއިންވަނީ ސޯޝަލް މީޑިއާގައި އާންކޮށްފައެވެ.
އަދި އޭގެ އިތުރުން، ފަލަސްތީނުގެ ރައްޔިތުންނަށް އެހީވުމަށް ފަންޑު ފޮށި ބަހައްޓައިގެންނާއި އަދި އެނޫން ގޮތްގޮތުންވެސް ދިވެހިންގެ ފަރާތުން ހޯދާ ފައިސާއިން ޚަރަދު ކޮށްގެން ފަލަސްތީނުގައި މިސްކިތެއް ބިނާ ކުރަމުންދާ ކަމުގައިވެސް "އިންޓަރނޭޝަނަލް އެއިޑް ކެމްޕޭން" އިން ހާމަ ކޮށްފައި ވެއެވެ.
މިގޮތުން އެ ޖަމިއްޔާއިން ބުނެފައިވަނީ މަސްޖިދުލް ޤުއްދޫސްގެ ނަމުގައި ބިނާކުރެވޭ މި މިސްކިތަކީ މިއީ ފަލަސްތީނުގައި، "ދިވެހިންގެ އެހީގައި ބިނާ ކުރެވޭ ފުރަތަމަ މިސްކިތް" ކަމުގައެވެ.
"އިންޓަރނޭޝަނަލް އެއިޑް ކެމްޕޭން" އިން ވަނީ، ޣައްޒާގައި ބިނާ ކުރެވެމުންދާ މި މިސްކިތުގެ ފޮޓޯތައްވެސް އާންމު ކޮށްފައެވެ. އެ ޖަމިއްޔާއިން ހާމަ ކޮށްފައިވާ ގޮތުގައި، މި ފޮޓޯ ތަކަކީ މަސައްކަތް ކުރިއަށް ދިޔައިރު ނެގިފައިވާ ފޮޓޯތަކެކެވެ. އެޖަމިއްޔާއިން ބުނެފައިވަނީ، މިވަގުތު ޣައްޒާގެ ހާލަތު ހުރިގޮތުން އެންމެ އަޕްޑޭޓެޑް ފޮޓޯތައް ނެގޭގޮތް ވެފައި ނުވިނަމަވެސް، މިސްކިތުގެ އެންމެ ފަހުގެ ފޮޓޯތައް ހޯދުމުގެ މަސައްކަތް ކުރިަޔަށް ދާކަމުގައެވެ.
އާންމު ރައްޔިތުންގެ އެތައް މިލިއަން ރުފިޔާ! އެކައުންޓިބިލީގެ އުސޫލެއް ގާއިމް ވާން ޖެހޭ!
ދުނިޔޭގެ އެކި ކަންކޮޅުތަކުގައި، ހާލުގައި ޖެހޭ، އަޚްވަންތަ މުސްލިމުންނަށް އެހީތެރިކަން ފޯރުކޮށް ދިނުމަކީ ޒަމާނުއްސުރެ ރާއްޖެއިން ވަރަށްބޮޑު އިސްކަމެއް ދީފައިވާ ކަމެކެވެ. މިގޮތުން ޓެލެތޯންތައް ބޭއްވުމާއި، ފަންޑު ފޮށިތައް ބެހެއްޓުމުގެ އިތުރުން، ފެއަރތައް ބާއްވައިގެންވެސް ފައިސާ ޖަމާކޮށް، ދިވެހި ރައްޔިތުން ފާއިތުވެދިޔަ ތަނުގައިވަނީ ހާލުގައިޖެހޭ މުސްލިމް އަޚުންނާއި އުޚުތުންނަށް އެހީތެރިކަން ފޯރުކޮށް ދީފައެވެ.
އެހެންނަމަވެސް ފާހަގަކޮށްލާން ޖެހޭ އެއް ހަގީގަތަކީ މިފަދަ އެހީތެރިކަން ސަރުކާރުން ފޯރުކޮށް ދިނުމާއި، އާންމު ޖަމިއްޔާއަކުން ފޯރުކޮށް ދިނުމާއި ތަފާތުތަކެއް ހުންނާނޭކަމެވެ. އެއް ސަބަބަކީ ސަރުކާރުން ފޯރުކޮށްދޭ އެހީތެރިކަން ފަހުން އޮޑިޓް ކުރެވޭނެ، އަދި "އެކައުންޓެބުލް" (ޒިންމާދާރު ކުރެވޭނެ ގޮތްތައް) ސަރުކާރުގެ ނިޒާމުގެ ތެރޭގައި ހަމަޖެހިފައި ހުންނަ ކަމެވެ.
އެހެންނަމަވެސް، އާންމު ރައްޔިތުން ފޯރުކޮށްދޭ އެތައް މިލިއަން ރުފިޔާއެއް ފަންޑު ފޮއްޓަކަށް ޖަމާކޮށް އަމިއްލަ ޖަމިއްޔާއަކުން އެފައިސާ ބަހާ، އެފައިސާއިން ޚަރަދު ކުރާއިރު، ފައިސާ ޚަރަދުކުރި ގޮތުގަ ތަފްސީލު ފަހުން އެގެން އޮންނާނީ ކޮން ގޮތަކުންތޯ މިއީ ޚުދު އެހީތެރިކަން ފޯރުކޮށްދޭ ފަރާތްތަކުންވެސް ކުރާނޭ ސުވާލެއްކަމީ ކަށަވަރުވެ ޔަގީންވާ ކަމެކެވެ. އެންމެ އާންމު ބަހުރުވައިން ނަމަ، އެފައިސާ ހޭދަ ކުރިގޮތުގެ މިނިވަން އޮޑިޓެއް އޮންނާން ޖެހެއެވެ.
އެއީ ފަހަރެއްގަވެސް އެހީގެ ގޮތުގައި އެއްކުރާ، އެހީދޭ ފަރާތްތަކުގެ އެތައް މިލިއަން ރުފިޔާއަކަށް، އެހީއާ ހަވާލުވާ ފަރާތްތަކުން ޚިޔާނާތްތެރި ވެދާނެތީ ނޫންކަންވެސް މިފުރުސަތުގައި ފާހަގަކޮށްލާން ޖެހެއެވެ. އޭގެ ބަދަލުގައި އެއީ، މިފަދަ މުއާމަލާތްތައް ކުރުމުގައި ގެންގުޅެންޖެހޭ މާލީ އެންމެ ރަގަޅު އުސޫލު ގާއިމްކޮށް، އެ މުއާމަލާތުން ފަހުންނަމަވެސް އުފެދިދާނެ ޝައްކުތަކާއި އަދި ފިތުނައަކުން ބަރީއަވެ ތިބުމަށްޓަކާ، މުޅި މުޖުތަމަޢުގެ ސަލާމަތާއި ރައްކާތެރިކަމަށް އަމަލު ކުރާންޖެހޭ އުސޫލެއްކަމުގައިވެސް ދަންނަވާން ޖެހެއެވެ.
އެހެންކަމުން ޣައްޒާ ފަންޑަށް ނަމަވެސް، އަދި އެނޫން އެހެން މަގުސަދެއްގައި ނަމަވެސް، އާންމު ރައްޔިތުންގެ ފައިސާ ޖަމާކޮށް، އެއިން ޚަރަދު ކުރެވޭނަމަ، އެފައިސާ ހޭދަ ކުރާގޮތުގެ މިނިވަން އޮޑިޓެއް އޮންނާންޖެހެއެވެ. އެހެންނޫންނަމަ، ރަގަޅު މަގުސަދުގައި، ނުހަނު ފުރިހަމަކަމާއެކު ފައިސާއިން ހޭދަކުރި ކަމުގައިވިނަމަވެސް، އެ ފަހިވެގެންދަނީ، އެތައް މިލިއަން ރުފިޔާއެއް ހޭދަ ކުރެވުނު ގޮތާމެދު ޝައްކު އުފެއްދުމުގެ ފުރުސަތެވެ.
