މޯލްޑިވްސް އިސްލާމިކް ބޭންކު (އެމްއައިބީ) އިންއުޖާލާ ކޭޝްގެ ނަމުގައި އާ ފައިނޭންސިން ފެސިލިޓީއެއް ތައާރަފް ކޮށްފިއެވެ.
އެމްއައިބީން ހާމަކޮށްފައިވާ ގޮތުގައި އަލަށް ތައާރަފްކުރި މި ފެސިލިޓީގެ ބޭނުން ކޮށްގެން ވަކިވަކި ފަރުދުންގެ ޒަރޫރީ ބޭނުންތަކަށް ފައިސާ ޚަރަދު ކުރެވޭނެ ފުރުސަތު ތަނަވަސް ވެގެންދާނެއެވެ. އެގޮތުން މި ފެސިލިޓީގެ ބޭނުން ކުރެވޭ ކަންކަމުގެ ތެރޭގައި ދަރަނި އަދާކުރުމަށާއި، ސިއްހީ ފަރުވާއާއި، މަރާމާތު ކުރުމަށާއި، މޫސުމީ ކާރިސާތަކުން ލިބޭ ގެއްލުން ފޫބެއްދުމަށާއި ގެ ބަދަލުވުމަށް ބޭނުންވާ އެޑްވާންސް ފައިސާ ދެއްކުމަށާއި، ގެދޮރު ގަންނަން ބޭނުންވާ އިކުއިޓީ ރެއިސް ކުރުންވެސް ހިމެނެއެވެ.
މި ފައިނޭންސް ފެސިލިޓީއަށް އެދުމަށް، އެމްއައިބީގެ އެޕްލައި-ނައު ޕޯޓަލުން އެޕްލިކޭޝަން ހުށަހެޅޭނެއެވެ. އެއަށްފަހު ބޭންކުން އުޖާލާ ފައިނޭންސްގެ ލިމިޓް ކަޑައެޅުމުން ފައިސާއަށް އެދެވޭނެއެވެ. އިތުރު ލިޔުމަކާ ނުލާ މި ފެސިލިޓީއަށް އެދެވޭއިރު، ބޭންކުން ހަމަޖައްސާ ލިމިޓްގެ 30 އިންސައްތައާއި ހަމައަށް ކޭޝް ފެސިލިޓީ ބޭނުން ކުރެވޭނެ ކަމަށްވެސް އެމްއައިބީން ބުނެފައި ވެއެވެ.
އެހެންނަމަވެސް ކޭޝް ފެސިލިޓީއަށް ލިބޭ 30 އިންސައްތައަށްވުރެ އިތުރަށް ފައިސާ ބޭނުންވާނަމަ ސަޕޯޓިން ޑޮކިއުމަންޓް ހުށަހަޅަން ޖެހެއެވެ.
އެމްއައިބީ އުޖާލާ ކޭޝްގެ ނަމުގައި އާ ފެސިލިޓީއެއް ތައާރަފް ކުރި ނަމަވެސް، ކުރިއެކޭވެސް އެއްގޮތަށް އުޖާލާ ދިރިއުޅުން ފެސިލިޓީ ބޭނުން ކުރެވޭނެ ކަމަށްވެސް ބޭންކުން ބުނެފައި ވެއެވެ.
