ރާއްޖޭގެ ބޭނުން ކުރެވޭ ރިޒާވް އެއްކޮށް ހުސްވަމުންދާ ކަމަށާއި ރާއްޖޭގެ ބޭނުން ކުރެވޭ ރިޒާވްގައި ހުރީ 68 މިލިއަން ޑޮލަރު ކަމަށް ރައްޔިތުންގެ މަޖިލިހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެއެވެ.
އިންތިހާބީ ރައީސް ޑރ. މުހައްމަދު މުއިއްޒުގެ ފަރާތްޕުޅުން އަންނަ އަހަރުގެ ބަޖެޓު އެކުލަވާލުމަށް ހެދި ކޮމިޓީގެ ޗެއާކަން ކުރައްވާ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ނިމިގެން މިދާ 19 ވަނަ ރައްޔިތުންގެ މަޖިލީހުގައި އެންމެ ބޮޑަށް ދެއްކި އެއް ވާހަކަ އަކީ ދައުލަތުގެ ރިޒާވުގެ ވާހަކަ ކަމަށެވެ.
ނިމިގެންމިދާ މަޖިލީހުގެ ދައުރުގައި ވަރަށްބޮޑަށް “ރިޒާވް”ގެވާހަކަމިދިޔައީ ދައްކަމުން؛
ރާއްޖޭގެ ބޭނުންކުރެވޭ ރިޒާވްމިހާރު އެއްކޮށްހުސްވަނީ!!
68މ ޑޮލަރަށް ވެއްޓުންއިރު ސަރުކާރާއި MMAދަނީ އެކަންސިއްރުކުރަމުން!މިއީ ރައީސްޞޯލިހުގެ ސަރުކާރުން މިޤައުމު ވައްޓާލި ނުރައްކާތެރި ޙާލަތެއް
— Mohamed Saeed (@em_saeed) October 18, 2023
ރާއްޖޭގައި ބޭނުން ކުރެވޭ ރިޒާވް ދުވަހެއް ދުވަހަކަށް ދަށްވަމުންދާ ކަމުގެ ކަންބޮޑުވުން ތަކުރާރުކޮށް ފާޅުކުރި ނަމަވެސް އެކަން ސަރުކާރުން ދިޔައީ އޮޅުވާލާ ސިއްރު ކުރަމުން ކަމަށް ވެސް ސައީދު ވިދާޅުވިއެވެ.
"ރާއްޖޭގެ ބޭނުންކުރެވޭ ރިޒާވްމިހާރު އެއްކޮށްހުސްވަނީ. 68 މިލިއަން ޑޮލަރަށް ވެއްޓުނު އިރު ސަރުކާރާއި އެމްއެމްއޭ ދަނީ އެކަން ސިއްރު ކުރަމުން،" ސައީދު ވިދާޅުވިއެވެ.
ސައީދު ވިދާޅުވި ގޮތުގައި މިއީ ރައީސް އިބްރާހިމް މުހައްމަދު ސޯލިހްގެ ސަރުކާރުން މި ގައުމު ވައްޓާލި ނުރައްކާތެރި ހާލަތެކެވެ.
