ތިލަމާލެ ބްރިޖު މަޝްރޫޢު ނުހިނގާ އޮތީ ސަރުކާރުގެ ޤާބިލުކަން ނެތުމުންކަމަށާއި، އެ މަޝްރޫޢުގެ ހުރި މައްސަލަތައް ބަލައި، ބާރު ސްޕީޑުގައި ގެންގޮސް މަޝްރޫޢު ނިންމާނެކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ސަންގު ޓީވީން ގެނެސްދިން ޕްރޮގްރާމެއްގައި ރޭ ވާހަކަފުޅު ދައްކަވަމުން ޑރ.މުޢިއްޒު ވިދާޅުވީ، ބްރިޖު މަޝްރޫޢު ނުހިނގާ އޮތީ ކީއްވެތޯ ބައްލަވާނެކަމަށެވެ. އެގޮތުން އެއީ ކޮންތެކްޓުގެ މައްސަލައެއްތޯ ނުނީ އެގްރިމަންޓު މައްސަލައެއްތޯ ބަލާނެކަމަށް މުޢިއްޒު ވިދާޅުވިއެވެ. އިންތިޚާބީ ރައީސް ވިދާޅުވީ، އެ މަޝްރޫޢު މިހާތަނަށް ނުހިނގާ އެއޮތީ ގައިމުވެސް ސަރުކާރުގެ އެ ޤާބިލުކަން ނެތީމަކަމަށާއި، އެކަން ކުރުމަށް ވުޒާރާގައި ތިބީ ސިނަމާލެ ބްރިޖު މަޝްރޫޢު ހިންގިއިރުވެސް ތިބި ޓީމުކަމަށެވެ.
އެ މަޝްރޫޢު ބާރަށް ނުހިނގާ މައްސަލަ ބާލަފައި، އެ އެގްރިމަންޓުގައި އޮތް މައްސަލައެއްތޯ ނޫނީ ކޮންޓްރެކްޓުގައި އޮތް މައްސަލައެއްތޯ ގައިމު ސަރުކާރުގެ މައްސަލައެއް އޮތީމަ، ސަރުކާރު ހިންގުމުގެ ޤާބިލްކަން ނެތީމަތާ ނުހިނގާ އެ އޮތީ. ކަމާބެގޭ މިނިސްޓްރީގަ ތިބީ އެއްޓީމެއް. އަޅުގަނޑުމެން ސިނަމާލެ ބްރިޖު ހެދިއިރު އޮތް ޓީމު އެތާ އޮތީ ގާތްގަނޑަކަށް.
– އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވިއެވެ.
އިންތިޚާބީ ރައީސް ވިދާޅުވީ ބްރިޖު މަޝްރޫޢު ހިންގުމުގައި ސިޔާސީ ގޮތުން އައްޔަންކޮށްފައި ތިެއްބެވި ބޭފުޅުންގެ ޤާބިލުކަންވެސް ނެތްކަމަށެވެ. އެހެންކަމުން އެމަނިކުފާނުގެ ވިސްނުންފުޅަކީ ވީހާވެސް ބާރަށް މަޝްރޫޢު ކުރިއަށް ގެންދަވައި، އެ މަޝްރޫޢު އެއްކޮށް ނިންމުންކަމަށް މުޢިއްޒު ވިދާޅުވިއެވެ.
އަޅުގަނޑުމެންގެ ވިސްނުމަކީ އެ ޕްރޮޖެކްޓު ބާރަށް ހިންގުމޭ. ދެން ދިމާވާ މައްސަލަތައް ހައްލުކުރާނީ. ހައްލުކޮށްގެން އެ މަޝްރޫޢު އިއރާދަކުރެއްވިއްޔާ ނިންމުން.
– އިންތިޚާބީ ރައީސް ވިދާޅުވިއެވެ.
ޑރ.މުޢިއްޒު ވިދާޅުވީ، އެ މަޝްރޫޢުއަށް ޚަރަދުތަކެއް ކޮށްފައިވާއިރު، އެއީ ދިމާވެދާނެ ބޮޑު ގޮންޖެހުމަކަށް ވެދާނެކަމަށެވެ.
މައުލޫމާތު ލިބުނީމަ އިނގޭނީ ކޮންކަހަލަ ގޮންޖެހުމެއްތޯ އެއީ. އެގްރިމަންޓުތޯ ނުނީ އިންޖިނިއަރިންތޯ ނުނީ ޚަރަދުތަކެއް ކޮށްފައިވާއިރު އެކަމާ އެއްވަރުގެ މަސައްކަތް ނުހިނގާނަމަ ބޮޑު ގޮންޖެހުމަކަށްވާނެ.
– އިންތިޚާބީ ރައީސް ވިދާޅުވިއެވެ.
އެމަނިކުފާނު ވިދާޅުވީ ބްރިޖު މަޝްރޫޢު ހިންގުމަށް އިންޑިއާ ސަރުކާރާއެކީ މަޝްވަރާކޮށް ހައްލުތަކެއް ހޯއްދަވާނެކަމަށެވެ. އަދި އެ މަޝްރޫޢުއަށް އިތުރު ބައިތަށް ހިމަނަންޖެހޭކަމަށާއި، އެގޮތުން މިހާރު އެ މަޝްރޫޢު އޮތްގޮތުން އޮތީ ގިރާވަރު ފަޅާހަމައަށް ގުޅުވާލާގޮތަށް ނޫންކަމަށެވެ. ނަމަވެސް ގިރާވަރުފަޅު ހިއްކައި ގޯތި ދޫކުރާއިރު، އެ ބްރިޖު އެ ސަރަހައްދަށް ގުޅުވާލުންފަދަ ބައެއް ބަދަލުތައް ގެންނަންޖެހޭކަމަށްވެސް މުޢިއްޒު ވިދާޅުވިއެވެ.
ތިލަމާލެ ބްރިޖު ސަރުކާރުން ނިންމަން އެކި ތާރީޚުތައް ދިނެވެ. ނަމަވެސް އެ މަޝްރޫޢު އެ ތާރިޚުތަކަށް ނިމިފައެއް ނުވެއެވެ. ޚާއްބަކޮށް ނިމިދިޔަ ސެޕްޓެމްބަރު މަހު މާލެއާއި ވިލިމާލެ ގުޅާލެވޭނެކަމަށް ސަރުކާރުން ބުނިނަމަވެސް، އެކަން ހިނގާތަނެއް ނުފެނެއެވެ.
