އެންމެންގެ ރުހުންލިބުމަކީ އެއްވެސްމީހަކަށް،ދުވަހަކުވެސް ވާނެކަމެއް ނޫންކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ. ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް ޢިމްރާން ގެންދަވަނީ ރިޔާސީ އިންތިޚާބުން ބަލިވުމާއެކު ތަފާތު ޖަޒުބާތުގެ ޓްރީވީޓުތައް ކުރައްވަމުންނެވެ.
އެގޮތުން މިއަދު ކުރެއްވި ޓުވީޓެއްގައި ވިދާޅުވީ، ހެޔޮ، ރަނގަޅުކަމެއް ކުރަންއެދޭމީހާ މީސްތަކުންގެ ރުހުމާއި، ނުރުހުމައް ނުބަލާ ކުރިޔަށްދާންވީކަމަށެވެ. ކިތަންމެ ބޮޑު ހެޔޮކަމެއް ކުރިޔަސް ނުރުހުންވެ، ދެކޮޅުހަދާނެ ކޮންމެވެސް ބަޔަކު ތިބޭނެކަން ހަނދާންކުރުމަށް ޢިމްރާން ނަސޭހަތްތެރިވެ ވަޑައިގަތެވެ.
އެންމެންގެ ރުހުންލިބުމަކީ އެއްވެސްމީހަކަށް،ދުވަހަކުވެސް ވާނެކަމެއް ނޫނެވެ.
– ޢިމްރާން ވިދާޅުވިއެވެ.
ޢިމްރާން ދާދި ފަހުން ވިދާޅުވެފައިވަނީ، ސިޔާސީ މަސައްކަތުގައި އެއްވާނެއްގައި، އެއްގޮތެއްގައި ދިގުމުއްދަތަކަށް ސާބިތުވެ ހުރުމަކީ ވަރަށް ބޮޑުކަމެއްކަމަށެވެ.
އިމްރާން މިހާތަނަށް އައީ އިދިކޮޅު ޕީޕީއެމް ޕީއެންސީއަށް ވަރަށް ބޮޑަށް ފާޑުވިދާޅުވަމުންނެވެ. ޚާއްޞަކޮށް އިންތިޚާބުގެ ތެރޭގައި ޑރ.މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވިއެވެ. ނަމަވެސް ޢިމްރާނަށްވެސް އެކަމާއި ގުޅިގެން މާބޮޑަށް ފާޑުކިޔުންތައް އަމާޒުވިއެވެ. އެގޮތުން ޢިމްރާން ބޮޑަށް މަސައްކަތްކުރައްވަނީ މަޤާމުގެ ބޭނުމުގައިކަމަށްވެސް ފާޑުކިޔާ ފަރާތްތަކުން ތުހުމަތުކުރެއެވެ.
ސަރުކާރުގައި އަދާލަތު ޕާޓީ އޮތްނަމަވެސް މަޖިލީހުގެ އެމްޑީޕީގެ މެންބަރުން ޢިމްރާނާއި އަދާލަތަށް ޢަމާޒުކުރާ އެންމެ ބޮޑު ފާޑުކިޔުމަކީ، އެޕާޓީއަށް މަޖިލީހުގެ އެއްވެސް ގޮނޑިއެއް ކާމިޔާބު ނުކުރެވުމެވެ. ކައުންސިލް އިންތިޚާބުގައިވެސް ކާމިޔާބުކުރެވުނީ ވަރަށް މަދު ގޮނޑިއެކެވެ.
ޢިމްރަނާއި އަދާލަތު ޕާޓީގެ އިސް ބޭފުޅުންނަކީ ރައީސް އިބްރާހީމް މުޙައްމަދު ޞާލީޙުގެ ވަރަށް އަރިސް ބޭފުޅުންތަކެކެވެ. ނަމަވެސް މިސަރުކާރު އައުމުގެ ކުރިން ޢިމްރާން ވަނީ އެމްޑީޕީއަށްވެސް ވަރަށް ބޮޑަށް ފާޑުވިދާޅުވެފައެވެ.
