އަރަބި ގައުމެއް ކަމަށްވާ އޮމާނަށް ދަތުރުކުރާ ދިވެހިންނަށް 14 ދުވަހުގެ އޮންއެރައިވަލް ވިސާ ލިބޭނެ ކަަމަށް އެ ގައުމުން ފުރަތަމަ ބުނި ކަމަށާއި އެހެން ނަމަވެސް ދިވެހިންނަށް އެ ގައުމުން އޮން އެރައިވަލް ވިސާ ނުދޭކަން މިހާރު އެނގިފައިވާ ކަމަށް ސަރުކާރުން ބުނެފިއެވެ.

އޮމާނުން ދިވެހިންނަށް އޮން އެރައިވަލް ވިސާ ލިބޭނެ ކަމަށް ސަރުކާރުން ބުނީ މިދިޔަ މާޗް މަހުގެ 30 ވަނަ ދުވަހުއެވެ. ފޮރިން މިނިސްޓްރީން އޭރު އެހެން ބުނެފައި އޮތުމުން އޮންއެރައިވަލް ވިސާގައި އެެ ގައުމަށް އެތެރެވާން ދިވެއްސަކު މަސައްކަތްކުރިއެވެ. ނަމަވެސް އެގައުމަށް އެތެރެވުމުގެ ހުއްދަ އޭނާއަށް ނުދިންކަން ސޯޝަލް މީޑިއާގައި ޖެހި ޕޯސްޓެއްގައި ހާމަކުރިއެވެ.

އޮންއެރައިވަލް ވިސާ ލިބޭނީ އޮމާނަށް ދަތުރުކުރާ ދިވެހިންގެ އަތުގައި މުއްދަތު ހަމަނުވާ ޕާސްޕޯޓާއި، ކޮންފާމް ކޮށްފައިވާ ހޮޓެލް ބުކިންގެ އިތުރުން ހެލްތު އިންޝޫރެންސާއި ރިޓާން ޓިކެޓު އޮވެގެން ކަމަށް ވެސް ފޮރިން މިނިސްޓްރީން ބުނެއެވެ. އެ ވާހަކަ ފެތުރުމުން ފޮރިން މިނިސްޓްރީން މިއަދު މީޑިއާތަކަށް ފޮނުވި ބަޔާނެއްގައި ބުނީ އޮމާނުން ދިވެހިންނަށް އޮން އެރައިވަލް ވިސާ ލިބޭނެ ކަަމަށް މާޗް 30، ގައި އިއުލާނުކުރީ އޮމާންގެ ކަމާބެހޭ އިދާރާއިން އެގޮތަށް މައުލޫމާތު ދީފައި އޮތުމުން ކަމަށެވެ.

ނަމަވެސް، އެއަށްފަހު މި މިނިސްޓްރީއަށް މައުލޫމާތު ލިބިފައިވާ ގޮތުގައި، އޮމާންއަށް ދަތުރުކުރާ ދިވެހިންނަށް 14 ދުވަހުގެ އޮން އެރައިވަލް ވިސާ ލިބެނީ ޝަރުތުތައް ޝަރުތުތަކެއް ފުރިހަމަވުމުންނެވެ. އެއީ،

1. އިނގިރޭސިވިލާތް، އެމެރިކާ، ޝެންގަން ގައުމުތައް، ކެނެޑާ، އޮސްޓްރޭލިއާ ނުވަތަ ޖަޕާންގެ މުއްދަތު ހަމަނުވާ ވިސާއެއް އޮތުން ނުވަތަ އެއިން ގައުމެއްގެ ރަށްވެހިކަން އޮތުން.
2. ހޮޓެލް ބުކިން، ދެކޮޅު ޓިކެޓް އަދި ހެލްތު އިންޝޫރަންސް އޮތުން.

ޝަރުތު ހަމަ ނުވާ ދިވެހިން އޮމާނަށް ދަތުރުކުރުމުގެ ކުރިން ވިސާ ނަގަން އެދޭ ކަމަށް ވެސް ބަޔާނުގައި ފޮރިން މިނިސްޓްރީން ބުންޏެވެ.