މިދިޔަ ހޮނިހިރު ދުވަހު ފަލަޞްޠީނުގެ ހިތްވަރުގަދަ މުޖާހިދުން ފެށި ޖިހާދުގެ އާ މަރުޙަލާ އަކީ މުސްލިމުންނާއި ޢަރަބީންގެ ކަރާމަތާއި ޝަރަފަށް ޓަކާ ފެށި ޚުތޫރަތްތެރި އާ މަރުޙަލާއެއްކަމަށް ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެއެވެ.
ފަލަސްތީނުގައި އިސްރާޢީލުން ހިންގާ ލާއިންސާނީ ހަމަލާތަކާއިގުޅިގެން ރައީސް މައުމޫން ވިދާޅުވީ، ފަލަސްޠީނަށް ނަސްރު ދެއްވުން އެދި ދުޢާ ދަންނަވާފައެވެ.
ޙަމާސްއަކީ ފަލަސްޠީނުގެ މިނިވަންކަމަށް ޖިހާދު ކުރާ މުޖާހިދުންގެ މައްޗަށް އެކުލެވިގެންވާ ޖަމާޢަތެކެވެ. އަދި، ޣައްޒާގައި ސިޔާސީ ގޮތުން ވެރިކަން ކުރަނީ ވެސް އެ ޖަމާޢަތުންނެވެ. އިސްރާޢީލާ ދެކޮޅަށް އެ ޖަމާޢަތުން ފެށި ބާރުގަދަ އަސްކަރީ ކެމްޕޭންގެ ދަށުން މުޖާހިދުންގެ ޓީމުތަކުން ވަނީ އިސްރާޢީލުގެ ދެކުނުގެ ރަށްތަކަށް އަރައި، ޔަހޫދީންނާ ދެކޮޅަށް ހަނގުރާމަ ކުރަން ފަށާފައެވެ.
ހަމާސްގެ ހަނގުރާމަވެރިން އިސްރާއީލުގެ ދެކުނުގެ އަވަށްތަކަށް ވަދެ ދިން ހައިރާންކުރުވަނިވި ހަމަލާގައި އިޒްރޭލުގެ އެތައް ސަތޭކަ ބަޔަކު މަރާލުމާއި ގުޅިގެން އިސްރާއީލުން ދަނީ ފާއިތުވި ތިން ދުވަހު ގާޒާއަށް ހަމަލާދެމުންނެވެ.
ގާޒާއިން ފޮނުވާލި އެތައް ހާސް ރޮކެޓްތަކާއެކު، ހަމާސްގެ މުޖާހިދުން އިސްރާއީލުގެ ސަރަހައްދުތަކަށް ވަދެ ދިން ބަޑީގެ ހަމަލާތަކުގައި މުޖާހިދުންވަނީ ގާތްގަނޑަކަށް 100 އެއްހާ އިސްރާއީލު މީހުން ރަހީނުކޮށްގެން އެނބުރި ގާޒާއަށް ގެންގޮސްފަ އެވެ. އިޒްރޭލުގެ އަސްކަރިއްޔާގެ ތަރުޖަމާނަކު ހޯމަ ދުވަހު ވިދާޅުވީ، ގާތްގަނޑަކަށް 30 ވަރަކަށް ރަހީނުކުރި މީހުންގެ ތަފްސީލް އެ މީހުންގެ އާއިލާތަކަށް ދީފައިވާ ކަމަށެވެ.
