ރިޔާސީ އިންތިޚާބުގެ ދެވަނަ ބުރުގެ ނަތީޖާ ދައްކާ ގޮތުން، ޕީޕީއެމް/ޕީއެންސީިގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އިންތިޚާބު ކާމިޔާބު ކުރުމާއި ދިމާލަށް މިސްރާބު ޖަހައިފިއެވެ.
މިިހާތަނަށް ވޯޓުލީ މީހުންގެ ޖުމްލަ އަދަދަށް ބަލާއިރު މުއިއްޒު އުޅުއްވަނީ ރައީސް ޞާލިހަށް ވުރެ 12،000 ވޯޓު ކުރީގައެވެ. މިހާތަނަށް ގުނުނު ވޯޓު ފޮށިތަކަށް ބަލާއިރު ބޮޑެތި އާބާދީތަކުން ބޮޑުތަނުން ކުރި ހޯއްދެވީ ޑރ. މުއިއްޒުއެވެ. އިންތިޚާބުގެ ނަތީޖާތަކުން އެންމެ ބޮޑު ކުރިއެރުމެއް މުއިއްޒުއަށް ލިބުނީ ފުރަތަމަ ބުރު ރައީސް ޞާލިހު ކުރި ހޯއްދެވި ރަށްތަކުންނެވެ. އެރަށްތަކުން ރައީސް ވަނީ ބޮޑު ތަނުން ކުރި ހޯއްދަވާފައެވެ.
ބާކީ ހުރި ފޮށިތަކަށް ބަލާއިރު މުއިއްޒުއަށް ބޮޑުތަނުން ކުރި ލިބޭނެ ފޮށިތައްވެސް ގިނައެވެ. އެހެންކަމަށްވާއިރު މިއިންތިޚާބު ދެން ރައީސް ޞާލިހަށް ކާމިޔާބު ކުރުމަކީ ވަރަށް ނާދިރު ކަމެކެވެ. އިންތިޚާބުގެ ނަތީޖާ ދައްކާ ގޮތުން ޑރ. މުއިއްޒު 60 އިންސައްތަ ވޯޓު ހޯއްދެވުމަކީ ގާތް ކަމެކެވެ.
އިންތިޚާބުގައި ރައީސް ޞާލިހު ބަލިވެފައިވަނީ ރާއްޖޭގެ އާބާދީީގެ ބޮޑު އިންސައްތައެއްގެ ވޯޓުންނެވެ. ބޮޑެތި އާބާދީތަކާއި، ރާއްޖޭގެ އަތޮޅުތަކާއި ރަށްތަކުގެ ސުޕަ މެޖޯރިޓީ ހޯއްދެވީ ޑރ. މުއިއްޒެވެެ.
ޑރ. މުއިއްޒު އިންތިޚާބުވެ ހުވާ ކުރައްވާނީ ނޮވެމްބަރު މަހުގެ 17 ވަނަ ދުވަހުއެވެ. އެހާތަނަށް ރައީސަކަށް ހުންނާނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެއެވެ. ޕީޕީއެމްގެ ސަޕޯޓަރުން އެންމެ ބޮޑަށް އުންމީދު ކުރަނީ ނޮވެމްބަރު މަހުގެ 17 ވަނަ ދުވަހަށެވެ. އެއީ އެދުވަހު ހުވާ ކުރުމަށްފަހު ރައީސް ޔާމީން ގެޔަށް ބަދަލު ކުރެވިގެންދާނެތީއެވެ.
