ރިޔާސީ އިންތިޚާބުގެ ދެވަނަ ބުރުގެ ވޯޓުލުން ނިމި މިހާތަނަށް ގުނުނު 250 އަށްވުރެ ގިނަ ފޮށިން ޑރ. މުހައްމަދު މުއިއްޒު ކުރި ހޯއްދަވައިފިއެވެ.
ދެވަނަ ބުރުގެ ނަތީޖާއިން ކޮންމެ ބޭފުޅަކު މޮޅުވި ނަމަވެސް އެބޭފުޅަކު ވެގެންދާނީ ރާއްޖޭގެ ކުރިއަށް އޮތް ފަސް އަހަރުގެ ރައީސުލްޖުމްހޫރިއްޔާ އަށެވެ. އިންތިޚާބުގެ މިހާތަނަށް ގުނުނު ފޮށިތަކަށް ބަލާއިރު ބޮޑެތި އާބަދީތަކުގެ ތެރެއިން، މާލެ، ހުޅުމާލެ، ވިލިމާލެ، އައްޑޫ ސިޓީ، ފުވައްމުލަކު ސިޓީ، ކުޅުދުއްފުށި ސިޓީ ފަދަ ތަންތަނުން މުއިއްޒު އުޅުއްވަނީ ބޮޑު ތަނުން ކުރީގައެވެ.
މީގެ އިތުުރުން މުއިއްޒު ކުރި ހޯއްދަވާ ފޮށިތަކުން ރައީސް ޞާލިހާއި 200 ވޯޓު ތަފާތުކުރައްވައެވެ. ރައީސް ޞާލިހަށް ކުރި ހޯއްދެވޭ ފޮށިތަކުން މާބޮޑުތަނުން ތަފާތެއް ނުކުރެވެއެވެ. އިންތިޚާބުގައި މިހާތަނަށް މާލޭ ސަރަހައްދުން ގުނުނު ހުރިހާ ފޮއްޓެއްވެސް ކާމިޔާބު ކުރެއްވީ ޑރ. މުއިއްޒެވެ.
އިންތިޚާބުގެ ނަތީޖާ ދައްކާގޮތުން ކުރިއަށް ހުރި ފޮށިތަކުން ނަތީޖާ ބޮޑުތަނުން މުއިއްޒު ކޮޅަށް ބުރަވުން ގާތެވެ. ނުގުނި ހުރި ގިނަ ފޮށިތަކަކީ މީގެ ކުރިން މުއިއްޒު ބޮޑު ތަނުން ކުރި ހޯއްދަވާފައިވާ ފޮށިތަކެވެ. މިނަތީޖާ ދައްކާގޮތުން ރައީސް ޞާލިހުގެ މައްޗަށް މިއިންތިޚާބު ބޮޑު ތަނުން މުއިއްޒު ކާމިޔާބު ކުރައްވާތަން ފެނެއެވެ.
މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި 15،000 އަށް ވުރެ ގިނަ ވޯޓުގެ ތަފާތުން އެއްވަނަ ކެންޑިޑޭޭޓުގެ ގޮތުގައި ދެ ވަނަ ބުރަށް ދަތުރު ކުރެއްވީ ޕީޕީއެމް/ޕީއެންސީގެ ޑރ. މުހައްމަދު މުއިއްޒެވެ. އޭނާ އަށް ލިބިވަޑައިގަތީ 101،635 ވޯޓެވެ. އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ.
މުއިއްޒު އިންތިޚާބުވެއްޖެ ނަމަ މުއިއްޒު ވާނީ ޕީޕީއެމް/ޕީއެންސީގެ ފަރާތުން ރާއްޖޭގެ ވެރިކަން ކުރައްވާ ދެވަނަ ބޭފުޅާއަށެވެ. ކުރިން ރައީސްކަން ކުރެއްވީ 2018 ވަނަ އަހަރު ރައީސް ޔާމީނެވެ.
