ރިޔާސީ އިންތިޚާބުގެ މިހާތަނަށް ގުނުނު ވޯޓު ފޮށިތަކުން ކުރީގައި އުޅުއްވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއެވެ.
މިހާތަނަށް ވަނީ 120 ފޮށީގެ ނަތީޖާ ލިބިފައިވާއިރު، މުއިއްޒު އުޅުއްވަނީ ނަތީޖާތަކުން ކުރީގައެވެ. ގިނަ ރިސޯޓްތަކުންވެސް މުއިއްޒުއާއި ރައީސް ޞާލިހު ގާތް ގާތުން ވާދަކުރިއިރު، ރަށްތަކުން ބޮޑު ތަފާތަކުން މުއިްއޒު ގެންދަނީ ކުރި ހޯއްދަވަމުންނެވެ. މާލެއިން މިހާތަނަށް ގުނުނު ވޯޓު ފޮށިވެސް ކާމިޔާބު ކުރައްވާފައިވަނީ މުއިއްޒުއެވެ.
ރިޔާސީ އިންތިޚާބުގައި ރައީސް ޞާލިހު އެއްބުރުން ކާމިޔާބު ކުރައްވަން މަސައްކަތް ކުރި ނަމަވެސް ރައީސް ޞާލިހު ދިޔައީ ދެވަނަ އަށެވެ. އިންތިޚާބުގައި ސަރުކާރުން އުންމީދު ކުރި ވަރާއި ގާތަށްވެސް ވޯޓެއް ނުލިބުނެވެ. މިއިންތިޚާބުގައި ރައީސް ޞާލިހަށް 125،000 ވޯޓު ލިބޭނެކަމަށް އެމްޑީޕީގެ އިސް ބޭފުޅުން ގެންދެވީ ތަކުރާރުކޮށް ވިދާޅުވަމުންނެވެ.
މިއިންތިހާބުގެ ދެވަނަ ބުރުގައި ވޯޓުލުމުގެ ހައްގު ޖުމްލަ 282،804 މީހުންނަށް ލިބުނުއިރު މީގެ ތެރޭގައި 144،410 ފިރިހެނުންނާއި 138،394 އަންހެނުން ހިމެނެ އެވެ. އިންތިހާބުގެ ދެވަނަ ބުރުގައި މުޅިން އަލަށް 408 މީހުން ވޯޓުލުމުގެ ހައްގު ލިބުނެވެ.
ރިޔާސީ އިންތިހާބުގެ ދެވަނަ ބުރުގައި ވާދަކުރައްވަނީ ފުރަތަމަ ބުރުގައި އެންމެ ގިނަ ވޯޓު ލިބިވަޑައިގެންނެވި ދެ ކެންޑިޑޭޓުންނެވެ. އެއީ ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއާއި އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އެވެ.
އިންތިހާބުގެ ފުރަތަމަ ބުރުގައި މުއިއްޒަށް ލިބިވަޑައިގަތީ 101،635 ވޯޓެވެ. ރައީސް ސޯލިހަށް ލިބިވަޑައިގަތީ 86،161 ވޯޓެވެ.
