ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފާއި، ފޭދޫ ދާއިރާގެ މެންބަރު މުހައްމަދު ނިހާދަށް ބަޔަކު ހަމަލާދިނން މައްސަލަ އެޗްއާރުސީއެމްއިން ހަރުކަށި އިބާރާތުން ކުށްވެރި ކޮށްފިއެވެ.
ނިހާދާއި ޝަރީފަށް ހަމަލާދިނީ މިއަދުގެ ވޯޓާއި ގުޅިގެން ހިނގައިދިޔަ ހަމަނުޖެހުން ތަކެއްގައެވެ. އެޗްއާރުސީއެމްއިން ބުނީ ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފާއި، ފޭދޫ ދާއިރާގެ މެންބަރު މުހައްމަދު ނިހާދަށް ބަޔަކު ހަމަލާދީ އަދިި މި ދެ ހާދިސާ ހިނގި ތަނުގައި ތިބި އާންމު ރައްޔިތުންނަށްވެސް އެކިވަރުގެ ހަމަލާ ދީފައިވާކަން އެ ކޮމިޝަނުން ހަރުކަށި އިބާރާތުން ކުށްވެރިކުރާކަމަށެވެ.
ސިޔާސީ ދެބަސްވުންތަކުގައްޔާއި ފިކުރު ތަފާތުވާ ހާލަތްތަކުގައިވެސް އެކަކު އަނެކަކަށް ޖިސްމާނީ އަނިޔާ ދިނުމާއި، އަބުރަށް އަރައިގަތުމާއި، ނަފްރަތުގެ އަމަލުތައް އިސްކުރުމަކީ ކޮމިޝަނުން ކަންބޮޑުވާކަމެއް ކަމަށާއި، މި އަމަލުތަކަކީ ގާނޫނީ ގޮތުންވެސް ޖިނާއީ ކުށްތަކެއްކަށާއި، މިފަދަ މައްސަލަތައް ކަމާގުޅުންހުރި އިދާރާތަކުން ވީހާވެސް އަވަހަށް ތަހުގީގުކޮށް ފިޔަވަޅު އެޅުމަށް އެޗްއާރުސީއެމްއިން ވަނީ ގޮވާލާފައެވެ.
ޝަރީފަށް ހަމަލާދީފައިވާ ފޮޓޯއެއް އޭނާގެ ދަރިކަނބަލުންވެސް ވަނީ ޢާންމުކުރައްވާފައެވެ. އެގޮތުން ލޯ ކައިރި ވަރަށް ބޮޑަށް ދުޅަވެ ރަތްވެފައިވެއެވެ. އަދި ލޯކައިރި ވަނީ ކުޑަކޮށް ޒަޚަމްވެފައެވެ.
އައްޑޫ ފޭދޫ ދާއިރާގެ މެންބަރަށްވެސް ބަޔަކު ހަމަލާދީން މައްސަލައެއް ފުލުހުން އަންނަނީ ބަލަމުންނެވެ. ނިހާދަށް ހަމަލާދީފައިވަނީ ފޭދޫގައި ހުންނަވަނިކޮށެވެ.
