ވެރިކަންކުރާ ޕާޓީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ސާލިހް ވޯޓު ލައްވައިފިއެވެ.
ރައީސް ވޯޓު ލެއްވީ ޖަމާލުއްދީން ސްކޫލްގައި ބަހައްޓާފައިވާ ވޯޓު ފޮއްޓަށެވެ. ވޯޓުލެއްވުމަށް ފަހު ރައީސް ސޯލިހް ވަނީ ވަނީ ވީހާ ވެސް އަވަހަށް ނިކުމެ ވޯޓު ލާން ރައްޔިތުންނަށް އިލްތިމާސް ކުރައްވާފައެވެ.
ރައީސް ޞާލިހުގެ އިތުރުން މިއިންތިޚާބުގައި ވާދަ ކުރައްވާ ޑރ. މުއިއްޒު ވަނީ ވަރަށް ހެނދުނާ ވޯޓު ލައްވާފައެވެ. މުއިއްޒުގެ އިތުރުން އެމްޑީޕީ އަދި ޕީޕީއެމްއާއި އެހެން ޕާޓީތަކުގެ އިސްބޭފުޅުން ދަނީ ވޯޓު ލައްވަމުންނެވެ. ހެނދުނު 10 ޖެހުމާއި ހަމައަށް 56،500 އަށްވުރެ ގިނަ މީހުން ވަނީ ވޯޓު ލާފައެވެ.
މިފަހަރުގެ ރިޔާސީ އިންތިޚާބުގައި 282،804 މީހުންނަށް ވޯޓުލުމުގެ ޙައްޤު ވަނީ ލިބިފައެވެ. މިއަދު ހެނދުނު 8 ޖެހުމާއެކު މާލެއާއި އަތޮޅުތަކުގައި ވޯޓުލުމުގެ ކަންކަން ވަނީ ފަށާފައެވެ. ފުރަތަމަ ބުރުގެ ތަޖުރިބާއަށް ބަލާ ވީހާވެސް ގިނަ ރައްޔިތުންނަށް ވޯޓުލުމުގެ ފުރުޞަތު ފަހިކޮށްދިނުމުގެ ގޮތުން މިފަހަރު އިލެކްޝަންސް ކޮމިޝަނުން ވަނީ ވޯޓުލާ ގަޑިއަށް އިތުރު އެއްގަޑިއިރު އިތުރުކޮށްދެއްވާފައެވެ.
އެގޮތުން ރިޔާސީ އިންތިޚާބުގެ ދެވަނަ ބުރުގެ ވޯޓުލުން މިއަދު ހެނދުނު 8 ފެށިގެން ހަވީރު 5 ޖެހުމާއި ހަމައަށް ކުރިއަށްދާނެއެވެ. ހެނދުނު 7:30 އިން ފެށިގެން ވޯޓުލާ މަރުކަޒުތަކުގައި އާއްމުން ވަނީ ކިޔުތައް ހަދަން ފަށާފައެވެ. ވޯޓުލާން ފުރަތަމަ އައި 2 މީހުންގެ ހާޒިރުގައި ސެކިޔުރިޓީ އުރަ ކެނޑުމަށްފަހު، 8 ޖެހިއިރު ވަނީ ވޯޓުލުން ފަށާފައެވެ.
