މި ސަރުކާރުން ދޫކުރާ ގެދޮރުވެރިޔާ ސްކީމުން ފްލެޓް ލިބޭ މީހުންގެ ދާއިމީ ލިސްޓު ނެރެ، ޝަކުވާ އަށް މިރޭ ހުޅުވާލައިފިއެވެ.

ގެދޮރުވެރިޔާ ސްކީމްގެ ދަށުން ފްލެޓަށް ކުރިމަތިލާން ހުޅުވައިލުމުން 20،000 އަށް ވުރެ ގިނަ މީހުން ފޯމު ހުށަހެޅިއެވެ. ސަރުކާރުން އިއުލާން ކޮށްފައިވާ ގޮތުގައި ޝަރުތު ހަމަވާ އެންމެންނަށް ފްލެޓް ދޭނެއެވެ. އެ މީހުންގެ ތެރެއިން ފްލެޓު ލިބޭ މީހުންގެ ވަގުތީ ލިސްޓު މިިދިޔަ މަހުގެ 8 ވަނަ ދުވަހު ނެރެ، މިދިޔަ މަހުގެ ނިޔަލަށް ޝަކުވާ ހުށަހަޅަން ހުޅުވައިލިއެވެ.

ހައުސިން މިނިސްޓްރީން މިރޭ ކުރި އިއުލާނެއްގައި ބުނީ ގެދޮރުވެރިޔާ ސްކީމްގެ ފްލެޓަށް ކުރިމަތިލި މީހުންގެ ތެރެއިން އެ މިނިސްޓްރީން އިއުލާން ކުރި ވަގުތީ ލިސްޓްގައިވާ ޝަރުތު ހަމަވެ، ފްލެޓް ލިބޭ މީހުންނާއި ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވައިލުމުން، ހުށަހެޅި ޝަކުވާތައް ބަލާފައިވާ ކަމަށެވެ.

އެ ޝަކުވާތައް ބެލުމަށް ފަހު، ޝަރުތު ހަމަވާ މީހުންނަށް ފްލެޓް ލިބޭކަން ގެދޮރުވެރިން ޕޯޓަލް މެދުވެރިކޮށް މިހާރު ފެންނަން ހުންނާނެ ކަމަށް ވެސް މިނިސްޓްރީން ބުންޏެވެ. ޝަރުތު ހަމަނުވާ މީހުންނަށް، ޝަރުތު ހަމަނުވީ ކީއްވެކަން ބަޔާންކޮށް ޕޯޓަލް މެދުވެރިކޮށް ޖަވާބު ދީފައިވާނެ ކަމަށާއި އެ މީހުންގެ އިތުރު ޝަކުވާއެއް އޮތް ނަމަ މިއަދުން ފެށިގެން ކުރިއަށް އޮތް ހަތް ދުވަހުގެ ތެރޭގައި ޕޯޓަލް މެދުވެރިކޮށް ޝަކުވާ ހުށަހެޅުމުގެ ފުރުސަތު ވަނީ ހުޅުވާލައިފައެވެ.

ހުޅުމާލޭގައި 8،000 ފްލެޓުގެ މަސައްކަތް ކުރަމުން އަންނަ ކަމަަށް ފަހި ދިރިއުޅުން ކޯޕަރޭޝަނުން ބުނެއެވެ. އޭގެ އިތުރުން 4،000 ފްލެޓް އަޅަން އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް ނަމަކަށް ކިޔާ ކުންފުންޏަކާ 2.5 ބިލިއަން ރުފިޔާއަށް ވަނީ ހަވާލުކޮށްފައެވެ.

ފަހި ދިރިއުޅުން ކޯޕަރޭޝަނުން ބުނި ގޮތުގައި މިހާތަނަށް ގިނަ ޓަވަރުތަކެއްގެ މަަސައްކަތް ވަނީ ނިމުމުގެ މަރުހަލާގަ އެވެ. ސަރުކާރުން ބުނެފައި ވަނީ މި ދައުރު ނިމުމުގެ ކުރިން ފްލެޓްތަކުގައި މީހުން ދިރިއުޅެން ފަށާނެ ކަމަށެވެ.

"ގެދޮރުވެރިޔާ" ސްކީމުގެ ދަށުން ފުލެޓަށް އެދި ޖުމްލަ 20،697 މީހުން ފޯމު ހުށަހަޅާފައިވެއެވެ. އޭގެ ތެރޭގައި 3 ކޮޓަރީގެ އެޕާޓްމަންޓަށް 14،489 މީހުން އަދި 2 ކޮޓަރީގެ އެޕާޓްމަންޓަށް 6،208 މީހުން ފޯމް ހުށައެޅިއެވެ. ފްލެޓް ލިބޭ މީހުންގެ ވަގުތީ ލިސްޓް ސަރުކާރުން އިޢުލާންކުރެއްވީ އޮގަސްޓްމަހުގެ 8ވަނަ ދުވަހުއެވެ. 15،000 އަށްވުރެ ގިނަ މީހުން ޝަރުތުހަމަވާކަމަށް ވަގުތީ ލިސްޓުގައި ވަނީ ކަނޑައަޅާފައެވެ. ނަމަވެސް ޝަކުވާތަކަށް ބަލާ މި ލިސްޓަށް ބަދަލު އަންނާނެކަމަށް މިނިސްޓްރިއިން އޮތީ ވިދާޅުވެފައެވެ.

ވަގުތީ ލިސްޓަށް ހުށައެޅި ޝަކުވާތަކަށްބަލާ، ފްލެޓް ކަށަވަރުވާ މީހުން މިހާރު ޕޯޓަލް މެދުވެރިކޮށް އިނގޭނެއެވެ. އެހެންކަމުން އެމީހެއްގެ އަމިއްލަ ލޮގިން މެދުވެރިކޮށް، ފްލެޓް ލިބޭކަން ނުވަތަ ނޫންކަން މިހާރު ޕޯޓަލްއިން ބެލޭނެއެވެ. ސަރުކާރުން މިހާރު ވަނީ އިތުރު 6000 ފްލެޓަށްވެސް ކުރިމަތިލުމަށް ހުޅުވާލާފައެވެ.